ಜಪಾನ್‌: ವಾಣಿಜ್ಯ ನೌಕೆ ಮುಳುಗಿ 11 ಭಾರತೀಯ ನಾವಿಕರು ನಾಪತ್ತೆ

ಟೋಕಿಯೋ: ಫಿಲಿಪ್ಪೀನ್ಸ್‌ ಕಡಲಿನಲ್ಲಿ ಪ್ರಬಲ ಚಂಡಮಾರುತ ಬೀಸಿದ ಪರಿಣಾಮ ವಾಣಿಜ್ಯ ನೌಕೆಯೊಂದು ಮುಳುಗಿ 11 ಮಂದಿ ಭಾರತೀಯ ನಾವಿಕರು ನಾಪತ್ತೆಯಾಗಿದ್ದಾರೆ. ಹಾಂಕಾಂಗ್‌ ನೋಂದಾಯಿತ ಎಮರಾಲ್ಡ್‌ ಸ್ಟಾರ್‌ ನೌಕೆಯಲ್ಲಿ ಒಟ್ಟು 26 ನಾವಿಕರಿದ್ದು, ಶುಕ್ರವಾರ ಬೆಳಗಿನ ಜಾವ ಅಪಾಯದ ಸಂಕೇತಗಳನ್ನು ಜಪಾನ್‌ನ ಕೋಸ್ಟ್‌ಗಾರ್ಡ್‌ಗೆ ರವಾನಿಸಿತು. ಈ ನೌಕೆಯ ಸಮೀಪವಿದ್ದ ಇತರ ಮೂರು ನೌಕೆಗಳು 15 ಮಂದಿ ನಾವಿಕರನ್ನು ರಕ್ಷಿಸುವಲ್ಲಿ ಯಶಸ್ವಿಯಾದರೆ ಉಳಿದ 11 ಮಂದಿ ನಾವಿಕರು ನಾಪತ್ತೆಯಾಗಿದ್ದಾರೆ ಎಂದು ಕೋಸ್ಟ್‌ಗಾರ್ಡ್‌ನ ವಕ್ತಾರರು ತಿಳಿಸಿದರು.

ನಾಪತ್ತೆಯಾಗಿರುವ ನಾವಿಕರ ಪತ್ತೆಗಾಗಿ ಎರಡು ಗಸ್ತು ಬೋಟ್‌ಗಳನ್ನು ಮತ್ತು 3 ಲಘು ವಿಮಾನಗಳನ್ನು ಬಳಸಿಕೊಳ್ಳಲಾಗಿದೆಯಾದರೂ ಚಂಡಮಾರುತದಿಂದಾಗಿ ಇವು ಸಂಕಷ್ಟದಲ್ಲಿ ಸಿಲುಕಿರುವ ವಾಣಿಜ್ಯ ನೌಕೆಯ ಸನಿಹಕ್ಕೆ ತೆರಳಲು ಸಾಧ್ಯವಾಗಿಲ್ಲ ಎಂದವರು  ತಿಳಿಸಿದರು.