100 ಲಕ್ಷ ಕೋ.ರೂ. ಯೋಜನೆ ಜಾರಿಗೆ ಕಾರ್ಯಪಡೆ

ಹೊಸದಿಲ್ಲಿ: ದೇಶದ ಆರ್ಥಿಕತೆ ಕುಸಿತವನ್ನು ನಿಯಂತ್ರಿಸಲು ಕೆಲವೇ ದಿನಗಳ ಹಿಂದೆ ಹಲವು ಘೋಷಣೆ ಮಾಡಿದ್ದ ವಿತ್ತ ಸಚಿವೆ ನಿರ್ಮಲಾ ಸೀತಾರಾಮನ್‌ ಈಗ ಮುಂದಿನ 5 ವರ್ಷಗಳವರೆಗೆ ದೇಶದ ಮೂಲ ಸೌಕರ್ಯ ಯೋಜನೆಗಳ
ರೂಪುರೇಷೆಗೆ ಕಾರ್ಯಪಡೆ ರಚಿಸುವುದಾಗಿ ಘೋಷಿಸಿದ್ದಾರೆ.

ಈಗಾಗಲೇ ಮೂಲ ಸೌಕರ್ಯಕ್ಕಾಗಿ 100 ಲಕ್ಷ ಕೋಟಿ ರೂ.ಗಳನ್ನು ನೀಡುವುದಾಗಿ ಕೇಂದ್ರ ಘೋಷಿಸಿದ್ದು, ಈ ಕಾರ್ಯ ಪಡೆಯು ಪ್ರಸ್ತುತ ಹಣಕಾಸು ವರ್ಷ, ಮುಂದಿನ 5 ವರ್ಷ ಕೈಗೊಳ್ಳಲಾಗುವ ಯೋಜನೆಗಳನ್ನು ಗುರುತಿಸಲಿದೆ. ತಾಂತ್ರಿಕವಾಗಿ, ಆರ್ಥಿಕವಾಗಿ ಸೂಕ್ತವಾದ ಯೋಜನೆಗಳನ್ನು ಗುರುತಿಸುವುದು, ಯೋಜನೆ ವೆಚ್ಚ ಅನಗತ್ಯ ವಾಗಿ ಹೆಚ್ಚಳವಾಗುವುದು, ವಿಳಂಬವಾಗುವುದನ್ನು ತಡೆಯುವ ನಿಟ್ಟಿನಲ್ಲಿ ಈ ಕಾರ್ಯಪಡೆ ರೂಪುರೇಷೆ ಸಿದ್ಧಪಡಿಸಲಿದೆ.

ಕಾರ್ಯಪಡೆಯಲ್ಲಿ ಯಾರಿರುತ್ತಾರೆ?
ಹಣಕಾಸು ಸಚಿವಾಲಯದ ಆರ್ಥಿಕ ವ್ಯವಹಾರಗಳ ಕಾರ್ಯದರ್ಶಿ ನೇತೃತ್ವ ವಹಿಸ ಲಿದ್ದು, ಇತರ ಅಧಿಕಾರಿಗಳು ಇರುವರು.

ಒಟ್ಟು ಆರು ಸದಸ್ಯರು ಈ ಕಾರ್ಯಪಡೆಯಲ್ಲಿ ಇರಲಿದ್ದಾರೆ. ಅ. 31ರ ವೇಳೆಗೆ ಈ ವರ್ಷದ ಯೋಜನೆಯನ್ನು ಒದಗಿಸಲಿದೆ ಮತ್ತು 2021-25ರ ರೂಪುರೇಷೆಯನ್ನು ಡಿ.31ರಂದು ನೀಡಲಿದೆ.

ಆರ್ಥಿಕತೆಯ ಗುರಿ
5 ಟ್ರಿಲಿಯನ್‌ ಡಾಲರ್‌ ಆರ್ಥಿಕತೆ ಗುರಿಯನ್ನು ಸಾಧಿಸಲು ಗುಣಮಟ್ಟದ ಮೂಲಸೌಕರ್ಯ ಅತ್ಯಂತ ಪ್ರಮುಖ. ದೇಶದ ಅಭಿವೃದ್ಧಿ ದರ ಹೆಚ್ಚಳ ಕಾಣಲು ಮೂಲ ಸೌಕರ್ಯದಲ್ಲಿ ಹೂಡಿಕೆ ಮಾಡಬೇಕಾಗುತ್ತದೆ ಎಂದು ನಿರ್ಮಲಾ ಸೀತಾರಾಮನ್‌ ಹೇಳಿದ್ದಾರೆ.