100 ಕೋಟಿ ಆಧಾರ್‌, ಬ್ಯಾಂಕ್‌ ಖಾತೆ, ಮೊಬೈಲ್‌ ಲಿಂಕ್‌?

ಹೊಸದಿಲ್ಲಿ: 100 ಕೋಟಿ ಮಂದಿಗೆ ಬ್ಯಾಂಕ್‌ ಖಾತೆ, ಅಷ್ಟೇ ಮಂದಿಗೆ ಆಧಾರ್‌ ಕಾರ್ಡ್‌. ಇನ್ನೇನಿದೆ ಪ್ರಧಾನಿ ಮೋದಿ ಅವರ ಕನಸು ಯೋಚಿಸುವವರಿಗೆ ಇಲ್ಲಿದೆ ಉತ್ತರ. ಅದುವೇ 100 ಕೋಟಿ ಮೊಬೈಲ್‌ ಸಂಪರ್ಕ.

ಅಂದರೆ ದೇಶದ ಎಲ್ಲರಿಗೂ ಕೇಂದ್ರದ ವತಿಯಿಂದ ಮೊಬೈಲ್‌ ನೀಡಲಾಗುತ್ತದೆ ಎಂದು ತಿಳಿದುಕೊಳ್ಳಬೇಡಿ. 100 ಕೋಟಿ ಆಧಾರ್‌ ನಂಬರ್‌ ಅನ್ನು ಮೊಬೈಲ್‌ ಮತ್ತು ಬ್ಯಾಂಕ್‌ ಖಾತೆಗಳಿಗೆ ಜೋಡಣೆ. ಈ ಮೂಲಕ 100 ಕೋಟಿ ಮೊಬೈಲ್‌-100 ಕೋಟಿ ಆಧಾರ್‌-100 ಕೋಟಿ ಬ್ಯಾಂಕ್‌ ಖಾತೆ ಎಂಬ ವಿಶೇಷ ಲಿಂಕ್‌ ಮಾಡುವ ವ್ಯವಸ್ಥೆ ಜಾರಿ ಮಾಡುವ ಬಗ್ಗೆ ಅವರು ಕನಸು ಕಂಡಿದ್ದಾರೆ.

ನೋಟು ಅಮಾನ್ಯಗೊಳಿಸಿ ಡಿಜಿಟಲ್‌ ಮಾಧ್ಯಮದ ಮೂಲಕ ಹಣಪಾವತಿಗೆ ಹೆಚ್ಚಿನ ಒತ್ತು ನೀಡುವುದರ ಜತೆಗೆ “1 ಪ್ಲಸ್‌ 1 ಪ್ಲಸ್‌ 1′ ಎಂಬ ಕನಸಿನ ಯೋಜನೆ ಜಾರಿಯಾಗಲಿದೆ ಎಂದು ಕೇಂದ್ರ ಸರಕಾರದ ಹಿರಿಯ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ. ಅಧಿಕೃತ ಮಾಹಿತಿಯಂತೆ ಸೆ.17ಕ್ಕೆ ಕೊನೆಗೊಂಡಂತೆ ದೇಶದಲ್ಲಿ 12 ಲಕ್ಷ ಕೋಟಿ ರೂ. ಮೌಲ್ಯದ ಕರೆನ್ಸಿ ನೋಟುಗಳು ಚಾಲನೆಯಲ್ಲಿವೆ. 2016ರ ನ.7ರಂದು ದೇಶದಲ್ಲಿ 15.44 ಕೋಟಿ ರೂ. ಮೌಲ್ಯದ ನೋಟುಗಳು ಚಾಲ್ತಿಯ ಲ್ಲಿದ್ದವು. ಅಮಾನ್ಯದ ಮೂಲಕ 6 ಲಕ್ಷ ಕೋಟಿ ರೂ. ಮೊತ್ತದಷ್ಟನ್ನು ತಗ್ಗಿಸಲಾಗಿದೆ. ಈ ಮೂಲಕ ಅಷ್ಟು ಮೊತ್ತದ ಕಪ್ಪುಹಣ ಸಂಗ್ರಹವನ್ನು ತಪ್ಪಿಸಿದಂತಾಗಿದೆ.