ಕೋವಿಡ್-19ಗೆ ಕಲಬುರಗಿ ತಲ್ಲಣ: 10 ವರ್ಷದ ಬಾಲಕಿ ಸೇರಿ ‌ಮತ್ತೆ ಮೂವರಿಗೆ ಸೋಂಕು

ಕಲಬುರಗಿ: ಕೋವಿಡ್-19 ಸೋಂಕಿನಿಂದ ಈಗಾಗಲೇ ಮೂರು ಸಾವುಗಳಿಂದ ತಲ್ಲಣಿಸಿರುವ ಕಲಬುರಗಿಯಲ್ಲಿ ಮಂಗಳವಾರ ಮತ್ತೆ ಮೂರು ಹೊಸ ಪ್ರಕರಣಗಳು‌ ದೃಢ ಪಟ್ಟಿವೆ. 10 ವರ್ಷದ ಬಾಲಕಿ ಸೇರಿ‌ ಮೂವರಲ್ಲಿ ಮಹಾಮಾರಿ ಸೋಂಕು ಕಾಣಿಸಿಕೊಂಡಿದ್ದು, ಕೋವಿಡ್-19 ಪೀಡಿತರ ಸಂಖ್ಯೆ 16ಕ್ಕೆ ಏರಿಕೆಯಾಗಿದೆ.

ಕೋವಿಡ್-19 ಸೋಂಕಿನಿಂದಲೇ ಏ.7ರಂದು ಮೃತಪಟ್ಟ ಹಣ್ಣಿನ ವ್ಯಾಪಾರಿ ಸಂಪರ್ಕಕ್ಕೆ ಬಂದ ಹತ್ತು ವರ್ಷದ ಬಾಲಕಿ ಹಾಗೂ 35 ವರ್ಷದ ಮಹಿಳೆಗೆ ಸೋಂಕು ಪತ್ತೆಯಾಗಿದೆ. ಈ ಹಿಂದೆ ಈ ವ್ಯಕ್ತಿಯ ಸೊಸೆ ಹಾಗೂ ಆತ ಚಿಕಿತ್ಸೆ ಪಡೆದ ಬಹಮನಿ ಖಾಸಗಿ ಆಸ್ಪತ್ರೆಯ ಆಯಾಗೆ ಕೋವಿಡ್-19 ಸೋಂಕು ಖಚಿತವಾಗಿತ್ತು.

ಆದರೆ, ಈಗ ಸೋಂಕು ಪತ್ತೆಯಾದ ಇಬ್ಬರು ಯಾರು ಎಂಬುವುದು ಗೊತ್ತಾಗಬೇಕಿದೆ. ಮೃತ ವ್ಯಕ್ತಿಯ ಕುಟುಂಬದವರೋ ಅಥವಾ ಮನೆ ಪಕ್ಕದವರೋ, ಇಲ್ಲವೇ ಹಣ್ಣು ಖರೀದಿ ಮಾಡಿದವರೋ ಎಂಬ ಬಗ್ಗೆ ಮಾಹಿತಿ ಸಿಗಬೇಕಿದೆ.

ಇನ್ನು, ಕೋವಿಡ್-19 ಸೋಂಕಿನಿಂದಲೇ ಸೋಮವಾರ ಸಂಜೆ ಸಾವನ್ನಪ್ಪಿದ ಬಟ್ಟೆ ವ್ಯಾಪಾರಿಯ‌ 51 ವರ್ಷದ ಸಹೋದರನಿಗೂ ಹೆಮ್ಮಾರಿ‌ ಸೋಂಕು ದೃಢಪಟ್ಟಿದ್ದು, ಬಿಸಿಲೂರು ಜನತೆಯಲ್ಲಿ‌ ಅಕ್ಷರಶಃ ಮತ್ತಷ್ಟು ತಲ್ಲಣ ಉಂಟಾಗಿದೆ.