ಸಂಗನಹಾಳದಲ್ಲಿ ಈಗ ಸಂತಸದ ಅಲೆ

„ಮಲ್ಲಪ್ಪ ಮಾಟರಂಗಿ
ಯಲಬುರ್ಗಾ: ತಾಲೂಕಿನ ಸಂಗನಹಾಳ ಗ್ರಾಮದ ಕೆರೆಯನ್ನು ಶ್ರೀಕ್ಷೇತ್ರ ಧರ್ಮಸ್ಥಳ ಗ್ರಾಮಾಭಿವೃದ್ಧಿ ಸಂಸ್ಥೆ ದತ್ತು ಪಡೆದು ಅಭಿವೃದ್ಧಿ ಪಡಿಸಿದ್ದು, ವರುಣನ ಕೃಪೆಯಿಂದ ಈ ಬಾರಿ ಮಳೆಯಾದ ಪರಿಣಾಮ ಕೆರೆಗೆ ನೀರು ಬಂದಿದೆ. ಧರ್ಮಸ್ಥಳ ಸಂಸ್ಥೆಯ ಕಾರ್ಯಕ್ಕೆ ಗ್ರಾಮದಲ್ಲಿ ವ್ಯಾಪಕ ಮೆಚ್ಚುಗೆ ವ್ಯಕ್ತವಾಗಿದೆ.

2.886 ಜನಸಂಖ್ಯೆ ಇರುವ ಸಂಗನಹಾಳದಲ್ಲಿ ಒಟ್ಟು 998 ಕುಟುಂಬಗಳಿವೆ. ಗ್ರಾಮದಲ್ಲಿರುವ ಕೆರೆ 1 ಎಕರೆ 8 ಗುಂಟೆ ಇದ್ದು, ಕೆರೆ ಅಭಿವೃದ್ಧಿಗೆ ಧರ್ಮಸ್ಥಳ ಗ್ರಾಮಾಭಿವೃದ್ಧಿ ಸಂಸ್ಥೆ 3 ಲಕ್ಷ ಅನುದಾನ ವಿನಿಯೋಗಿಸಿದರೆ, ಗ್ರಾಮಸ್ಥರು 9 ಲಕ್ಷ ರೂ. ಸಂಗ್ರಹಿಸಿದ್ದಾರೆ. ಒಟ್ಟು 12 ಲಕ್ಷ ರೂ ವೆಚ್ಚದಲ್ಲಿ ಕೆರೆ ಅಭಿವೃದ್ಧಿಗೊಂಡಿದೆ.

2019 ಮಾರ್ಚ್‌ 28ರಂದು ಕುಕನೂರಿನ ಅನ್ನದಾನೇಶ್ವರ ಶಾಖಾಮಠದ ಮಹಾದೇವ ದೇವರು ಕೆರೆ ಅಭಿವೃದ್ಧಿ ಕಾರ್ಯಕ್ಕೆ ಚಾಲನೆ ನೀಡಿದ್ದರು. ಎರಡು ತಿಂಗಳಲ್ಲಿ ಕೆರೆ ಸಂಪೂರ್ಣ ಅಭಿವೃದ್ಧಿಗೊಂಡಿತ್ತು. ಬಳಿಕ ವರುಣನ ಕೃಪೆಯಿಂದ ಕೆರೆ ತುಂಬಿದ್ದರಿಂದ ಗ್ರಾಮಸ್ಥರ ಸಂತಸ ಇಮ್ಮಡಿಗೊಳಿಸಿದೆ. ಗ್ರಾಮಸ್ಥರು ಹಾಗೂ ಜಾನುವಾರುಗಳಿಗೆ ಈ ಕೆರೆ ಅನುಕೂಲವಾಗಿದೆ.