ಯಾದಗಿರಿ: ಜಿಲ್ಲೆಯಲ್ಲಿ ಅತೀ ಹೆಚ್ಚು ಜನರು ಗುರುಮಠಕಲ್‌ ಕ್ಷೇತ್ರದಿಂದ ಗುಳೆ ಹೋಗುವುದು ಸಾಮಾನ್ಯವಾಗಿತ್ತು. ಇದೀಗ ಅದೇ ಕ್ಷೇತ್ರದವರು ಮಹಾರಾಷ್ಟ್ರದಿಂದ ಹೆಚ್ಚಿನ ಸಂಖ್ಯೆಯಲ್ಲಿ ಸ್ವಗ್ರಾಮಗಳಿಗೆ ಹಿಂತಿರುಗಿದ್ದು ಅವರೇ ಹೆಚ್ಚಿನ ಸಂಖ್ಯೆಯಲ್ಲಿ ಕೋವಿಡ್ ಮಹಾಮಾರಿಗೆ ಗುರಿಯಾಗುತ್ತಿರುವುದು ಕಂಡು ಬಂದಿದೆ.
ಬುಧವಾರ ಜಿಲ್ಲೆಯಲ್ಲಿ ಪತ್ತೆಯಾಗಿರುವ 27 ಜನ ಸೋಂಕಿತರಲ್ಲಿ 23 ಜನರು ಗುರುಮಠಕಲ್‌ ತಾಲೂಕಿನವರೇ ಆಗಿದ್ದು, ಯಲಸತ್ತಿ ಗ್ರಾಮದ 7 ವರ್ಷದ ಬಾಲಕಿ (ಪಿ-5946) ಸೇರಿ ಒಂದೇ ಗ್ರಾಮದ 9 ಜನರಲ್ಲಿ ಸೋಂಕು ವಕ್ಕರಿಸಿದೆ. ಅಲ್ಲದೆ ತೋಟ್ಲೂರ ಗ್ರಾಮದ 7 ಜನ, ಅಜಲಾಪುರನ 22 ವರ್ಷದ ಮಹಿಳೆ (ಪಿ-5929), ಚಲೇರಿ ಗ್ರಾಮದ 35 ವರ್ಷದ ಪುರುಷ (ಪಿ-5930) ಸೇರಿದಂತೆ ದೊಡ್ಡ ಸಂಬ್ರ, ವಡವಟ್‌ ಹಾಗೂ ಮಾಧ್ವಾರ ಸೇರಿದಂತೆ ಶಹಾಪುರ ತಾಲೂಕಿನ ಗೋಗಿಪೇಟ್‌ ಗ್ರಾಮದ 20 ವರ್ಷದ ಪುರುಷ (ಪಿ-5952) ಮತ್ತು 60 ವರ್ಷದ ಮಹಿಳೆ (ಪಿ-5953) ಹಾಗೂ ಹುಣಸಗಿ ತಾಲೂಕಿನ ಮುದನೂರ ಗ್ರಾಮದ 19 ವರ್ಷದ ಪುರುಷ (ಪಿ- 5954), ಕೆಂಭಾವಿಯ 20 ವರ್ಷದ ಯುವತಿ (ಪಿ-5965) ರಲ್ಲಿ ಸೋಂಕು ಪತ್ತೆಯಾಗಿದೆ. ಬುಧವಾರ 17 ಜನ ಪುರುಷರು, 10 ಮಹಿಳೆಯರಲ್ಲಿ ಮಹಾಮಾರಿ ಹೊಕ್ಕಿದೆ. ಮಂಗಳವಾರವಷ್ಟೇ 61 ಜನ ಸೇರಿ 642 ಜನರಿಗೆ ಸೋಂಕು ದೃಢವಾಗಿತ್ತು. ಬುಧವಾರ 27 ಸೋಂಕಿತರು ಸೇರಿ ಜಿಲ್ಲೆಯಲ್ಲಿ ಸೋಂಕಿತರ ಸಂಖ್ಯೆ 669ಕ್ಕೇರಿಕೆಯಾಗಿದೆ.
841 ಜನರ ವರದಿ ಬಾಕಿ: ಕೋವಿಡ್ ವೈರಸ್‌ ಪರೀಕ್ಷೆಗಾಗಿ ಜಿಲ್ಲೆಯಲ್ಲಿ ಈವರೆಗೆ 19,250 ಜನರ ಮಾದರಿಗಳ ಪರೀಕ್ಷೆ ನಡೆಸಲಾಗಿದ್ದು, ಇನ್ನು 841 ಜನರ ವರದಿ ಮಾತ್ರ ಬರಬೇಕಿದೆ. ಬುಧವಾರ 194 ಜನರ ಮಾದರಿಯನ್ನು ಸಂಗ್ರಹಿಸಲಾಗಿದೆ. ಬುಧವಾರ 763 ನೆಗೆಟಿವ್‌ ವರದಿ ಸೇರಿ ಈವರೆಗೆ 17,740 ಜನರ ವರದಿ ನೆಗೆಟಿವ್‌ ಬಂದಿವೆ ಎಂದು ಅಪರ ಜಿಲ್ಲಾಧಿಕಾರಿ ಪ್ರಕಾಶ್‌ ಜಿ.ರಜಪೂತ ಪ್ರಕಟಣೆಯಲ್ಲಿ ತಿಳಿಸಿದ್ದಾರೆ.
ಜಿಲ್ಲೆಯಲ್ಲಿ ಕೋವಿಡ್19 ಖಚಿತಪಟ್ಟ 669 ವ್ಯಕ್ತಿಗಳ ಪೈಕಿ 119 ಜನ ಗುಣಮುಖರಾಗಿದ್ದು, ಒಬ್ಬರು ಮೃತಪಟ್ಟಿದ್ದಾರೆ. ಸೋಂಕಿತರೊಂದಿಗೆ ಪ್ರಾಥಮಿಕ ಸಂಪರ್ಕದಲ್ಲಿದ್ದ 1,133 ಜನ ಮತ್ತು ದ್ವಿತೀಯ ಸಂಪರ್ಕದಲ್ಲಿದ್ದ 2,530 ಜನರನ್ನು ಪ್ರತ್ಯೇಕವಾಗಿರಿಸಲಾಗಿದೆ. ಜಿಲ್ಲೆಯಲ್ಲಿ 32 ಕಂಟೈನ್‌ಮೆಂಟ್‌ ಝೋನ್‌ಗಳನ್ನು ರಚಿಸಲಾಗಿದೆ ಎಂದು ಮಾಹಿತಿ ನೀಡಿದ್ದಾರೆ.
ಹೊಸ ಜಿಲ್ಲಾಸ್ಪತ್ರೆಯಲ್ಲಿ 149 ಜನರನ್ನು ಪತ್ಯೇಕವಾಗಿರಿಸಲಾಗಿದೆ. ಶಹಾಪುರ ಕೊರೊನಾ ಕೇರ್‌ ಸೆಂಟರ್‌ನಲ್ಲಿ 96 ಜನರನ್ನು, ಸುರಪುರ ಕೋವಿಡ್ ಕೇರ್‌ ಸೆಂಟರ್‌ನಲ್ಲಿ 86 ಮತ್ತು ಏಕಲವ್ಯ ಕೊರೊನಾ ಕೇರ್‌ ಸೆಂಟರ್‌ನಲ್ಲಿ 179 ಜನರನ್ನು ಅವಲೋಕನೆಗಾಗಿ ಇರಿಸಲಾಗಿದೆ. ಜಿಲ್ಲೆಯ 34 ಸಾಂಸ್ಥಿಕ ಕ್ವಾರಂಟೈನ್‌ ಸೆಂಟರ್‌ಗಳಲ್ಲಿ ಒಟ್ಟು 1423 ಜನರನ್ನು ಪ್ರತ್ಯೇಕವಾಗಿರಿಸಲಾಗಿದೆ
