Ram ಪ್ರಾಣ ಪ್ರತಿಷ್ಠೆಯಂದು ಒಂದೇ ರಾಗದಲ್ಲಿ ಹಾಡಿ ವಿಶ್ವದಾಖಲೆ ಸಂಕಲ್ಪ: ಗುಡಿ

ಧಾರವಾಡ: ಸಂಗೀತ ಕ್ಷೇತ್ರದಲ್ಲಿ ನಿರಂತರ ಗಾಯನ ಮೂಲಕ ಈಗಾಗಲೇ ಎರಡು ವಿಶ್ವ ದಾಖಲೆ ಮಾಡಿದ್ದು, ಈಗ ಜ.22ರಂದು ಶ್ರೀರಾಮನ ಪೂಜೆ, ಸಂಗೀತ ಸೇವೆ ಮೂಲಕ ಮೂರನೇ ವಿಶ್ವ ದಾಖಲೆಯ ಸಂಕಲ್ಪ ಕೈಗೊಳ್ಳುವುದಾಗಿ ಹಿರಿಯ ಗಾಯಕ ಪಂ|ಡಾ|ಪ್ರಸನ್ನ ಮಾಧವ ಗುಡಿ ಹೇಳಿದರು.

ಈ ಹಿಂದೆ 2008ರಲ್ಲಿ 26 ತಾಸು (ಗಂಟೆ) ನಿರಂತರ ಗಾಯನ ಮೂಲಕ ಮೊದಲ ವಿಶ್ವದಾಖಲೆ ನಿರ್ಮಿಸಿದ್ದ ಇವರು, 2016ರಲ್ಲಿ 29.38 ತಾಸು ನಿರಂತರ ಗಾಯನ ಮೂಲಕ ನನ್ನದೇ ವಿಶ್ವದಾಖಲೆ ಬದಿಗೊತ್ತಿ 2ನೇ ವಿಶ್ವದಾಖಲೆ ಮಾಡಿದ್ದರು. ಈ ಸಲ ಒಂದೇ ರಾಗದಲ್ಲಿ ನಿರಂತರ 15ರಿಂದ 18 ತಾಸು ಗಾಯನ ಮೂಲಕ ಹೊಸ ಪ್ರಯೋಗ ಮಾಡಿ ವಿಶ್ವದಾಖಲೆಯ ಗುರಿ ಹೊಂದಲಾಗಿದೆ. ಜ.22ರಂದು ಶ್ರೀರಾಮನ ಪೂಜೆ ಮೂಲಕ ಸಂಕಲ್ಪ ಕೈಗೊಂಡು, ಶ್ರೀರಾಮನಿಗೆ ಸಂಗೀತ ಸೇವೆ ನೀಡುವ ಮೂಲಕ ಚಾಲನೆ ನೀಡಲಾಗುವುದು ಎಂದರು.