ಜನಪ್ರತಿನಿಧಿಗಳ ಆಪ್ತ ಸಹಾಯಕರಿಗೆ ಕಾರ್ಯಾಗಾರ 

ಬೆಂಗಳೂರು: ರಾಜ್ಯದ ಬಿಜೆಪಿ ಸಂಸದರು, ಶಾಸಕರ ಪರಿಣಾಮಕಾರಿ ಕಾರ್ಯ ನಿರ್ವಹಣೆ, ಉತ್ತಮ ಸಾರ್ವಜನಿಕ ಸಂಪರ್ಕಕ್ಕೆ ಪೂರಕವಾಗಿ ನೆರವಾಗುವ ನಿಟ್ಟಿನಲ್ಲಿ ಬಿಜೆಪಿಯು ಇದೇ ಮೊದಲ ಬಾರಿಗೆ ಸಂಸದರು, ಶಾಸಕರ ಆಪ್ತ ಸಹಾಯಕರು, ಆಪ್ತ ಕಾರ್ಯದರ್ಶಿಗಳಿಗೆ ತರಬೇತಿ ಕಾರ್ಯಾಗಾರ ಹಮ್ಮಿಕೊಂಡಿದ್ದು, ಸೋಮವಾರ ಆರಂಭವಾಯಿತು. ನಗರದ ಜಕ್ಕೂರು ವಾಯುನೆಲೆ ಬಳಿಯ ಖಾಸಗಿ ಹೋಟೆಲ್‌ನಲ್ಲಿ ಆಯೋಜನೆಯಾಗಿರುವ ದಕ್ಷಿಣ ಭಾರತದ ಬಿಜೆಪಿ ಸಂಸದರು, ಶಾಸಕರ ಆಪ್ತ ಸಹಾಯಕರು,
ಆಪ್ತ ಕಾರ್ಯದರ್ಶಿಗಳಿಗೆ ಆಯೋಜಿಸಲಾಗಿದ್ದ ಕಾರ್ಯಾಗಾರಕ್ಕೆ ಕೇಂದ್ರ ಸಚಿವ ರಮೇಶ್‌ ಜಿಗಜಿಣಗಿ ಚಾಲನೆ ನೀಡಿದರು.

ಬಹಳಷ್ಟು ಜನಪ್ರತಿನಿಧಿಗಳು ಆಪ್ತ ಸಹಾಯಕರ ಮೇಲೆ ನಂಬಿಕೆಯಿಟ್ಟು ಕಡತಗಳು, ದಾಖಲೆ, ಪತ್ರಗಳಿಗೆ ಸಹಿ ಮಾಡುತ್ತಾರೆ. ಹಾಗಾಗಿ ನಂಬಿಕೆ ಉಳಿಸಿಕೊಂಡು ಹೋಗುವ ಜತೆಗೆ ಜನಪ್ರತಿನಿಧಿಗಳ ವರ್ಚಸ್ಸು ಹೆಚ್ಚಿಸುವ ರೀತಿಯಲ್ಲಿ ಆಪ್ತ ಸಹಾಯಕರು ಕಾರ್ಯ  ನಿರ್ವಹಿಸಬೇಕು ಎಂದು ಅವರು ಕಿವಿಮಾತು ಹೇಳಿದರು. ಕಾರ್ಯಾಗಾರದಲ್ಲಿ ಜನಪ್ರನಿಧಿ ಗಳು ಹಾಗೂ ಸಾರ್ವಜನಿಕರು, ಕಾರ್ಯಕರ್ತರೊಂದಿಗೆ ಸಂಪರ್ಕ, ಸ್ಪಂದನೆ, ಸೌಜನ್ಯದ ನಡವಳಿಕೆ, ಸಂಸದರು, ಶಾಸಕರಾಗಿ ಏಕೆ ಗೆಲ್ಲಬೇಕು, ಅವರ
ಕಾರ್ಯ ಜವಾಬ್ದಾರಿಗಳೇನು, ಪಕ್ಷದ ಸಿದ್ಧಾಂತ, ಕಾರ್ಯಯೋಜನೆ, ಆದ್ಯತೆ ಇತರೆ ವಿಚಾರಗಳ ಬಗ್ಗೆ ಕಾರ್ಯಾಗಾರದಲ್ಲಿ ಮಾಹಿತಿ ನೀಡಲಾಯಿತು. ಜತೆಗೆ ವ್ಯಕ್ತಿತ್ವ ವಿಕಸನ, ಕೌಶಲ್ಯ ತರಬೇತಿ, ಮಾಧ್ಯಮ ನಿರ್ವಹಣೆ ಬಗ್ಗೆಯೂ ವಿಷಯ ತಜ್ಞರು, ಹಿರಿಯರು ಮಾಹಿತಿ ನೀಡಿದರು.

ಕರ್ನಾಟಕದಲ್ಲಿ ಇದೇ ಮೊದಲ ಬಾರಿಗೆ ಸಂಸದರು, ಶಾಸಕರ ಆಪ್ತ ಸಹಾಯಕರು, ಆಪ್ತ ಕಾರ್ಯದರ್ಶಿಗಳಿಗೆ ಕಾರ್ಯಾಗಾರ
ಆಯೋಜಿಸಲಾಗಿತ್ತು. ಕರ್ನಾಟಕ ಸೇರಿ ಆಂಧ್ರ ಪ್ರದೇಶ, ತಮಿಳುನಾಡು, ತೆಲಂಗಾಣ, ಪಾಂಡಿಚೇರಿ, ಕೇರಳದಿಂದ ಒಟ್ಟು 130 ಆಪ್ತ ಸಹಾಯಕರು ಪಾಲ್ಗೊಳ್ಳಬೇಕಿತ್ತು. ಸೋಮವಾರ 97 ಮಂದಿ ಪಾಲ್ಗೊಂಡಿದ್ದರು. ಇದರಲ್ಲಿ 84 ಮಂದಿ ರಾಜ್ಯದವರಾಗಿದ್ದರೆ 13 ಮಂದಿ ಅನ್ಯ ರಾಜ್ಯದವರಾಗಿದ್ದರು. ಮಂಗಳವಾರವೂ ಕಾರ್ಯಾಗಾರ ಮುಂದುವರಿಯಲಿದೆ ಎಂದು ಬಿಜೆಪಿ ಪ್ರಶಿಕ್ಷಣ ಪ್ರಕೋಷ್ಠದ ರಾಜ್ಯ ಸಹ ಸಂಚಾಲಕ ಜಗದೀಶ್‌ ಹಿರೇಮನಿ ತಿಳಿಸಿದರು. 

ಬಿಜೆಪಿ ಕೇಂದ್ರೀಯ ಪ್ರಶಿಕ್ಷಣ ಪ್ರಕೋಷ್ಠದ ಸದಸ್ಯ ರವೀಂದ್ರ ಸಾಠೆ, ಬಿಜೆಪಿ ರಾಜ್ಯ ಸಂಘಟನಾ ಕಾರ್ಯದರ್ಶಿ ಅರುಣ್‌ ಕುಮಾರ್‌, ಬಿಜೆಪಿ ರಾಜ್ಯ ಕಾರ್ಯಕಾರಿ ಸಮಿತಿ ಸದಸ್ಯೆ ಮಧುಶ್ರೀ ಇತರರು ಉಪಸ್ಥಿತರಿದ್ದರು.