ಪಾಂಡವಪುರ: ಇತ್ತೀಚೆಗೆ ನಿಧನರಾದ ಶಾಸಕ ಪುಟ್ಟಣ್ಣಯ್ಯ ಅವರ ಪುತ್ರ ದರ್ಶನ್ ಪುಟ್ಟಣ್ಣಯ್ಯ ಅವರಿಗೆ ಚುನಾವಣಾ ಠೇವಣಿ ಕಟ್ಟಲು ಪಟ್ಟಣದ ವಿ.ಸಿ. ಕಾಲೋನಿಯ ಬೀಡಿ ಕಾರ್ಮಿಕ ಮಹಿಳೆಯರು, ಕೂಲಿ ಕಾರ್ಮಿಕರು, ಪರಿಶಿಷ್ಟ ಜನಾಂಗದವರು, ಪೌರಕಾರ್ಮಿಕರು ತಮ್ಮ ಒಂದು ದಿನದ ಕೂಲಿ ಹಣ ನೀಡಿ ಮಾನವೀಯತೆ ಮೆರೆದರು. ಸೋಮವಾರ ರಾತ್ರಿ ವಿ.ಸಿ.ಕಾಲೋನಿಗೆ ಭೇಟಿ ನೀಡಿದ ದರ್ಶನ್ ಪುಟ್ಟಣ್ಣಯ್ಯ ಅವರನ್ನು ಸ್ಥಳೀಯ ಯುವಕರು ಪಟಾಕಿ ಸಿಡಿಸಿ ಸ್ವಾಗತಿಸಿದರು. ಈ ವೇಳೆ ದರ್ಶನ್ ಕಾಲೋನಿಯ ಪ್ರಮುಖ ಬೀದಿಗಳಲ್ಲಿ ಸಂಚರಿಸಿದ ಬಳಿಕ ಮಸೀದಿಗೆ ತೆರಳಿ ಸನ್ಮಾನ ಸ್ವೀಕರಿಸಿದರು. ಈ ಸಂದರ್ಭದಲ್ಲಿ ಮಕ್ಕಳು ಚುನಾವಣಾ ಠೇವಣಿ ಕಟ್ಟಲು ತಾವು ಸಂಗ್ರಹಿಸಿದ್ದ ಕೂಲಿ ಹಣ ನೀಡುತ್ತಿದ್ದಂತೆ ದರ್ಶನ್ ಕಣ್ಣಾಲಿಗಳು ತೇವಗೊಂಡವು. ನಿಮ್ಮ ಕೂಲಿ ಹಣದಿಂದಲೇ ನನ್ನ ಚುನಾವಣಾ ಠೇವಣಿಗೆ ಹಣಕಟ್ಟಿ ಚುನಾವಣೆಯಲ್ಲಿ ಗೆದ್ದು ನಿಮ್ಮ ಋಣ ತೀರಿಸುತ್ತೇನೆಂದು ಹೇಳಿದರು.
