ಮುನೀರ್‌ಗೆ ಯುವತಿ ಬೆಂಬಲ: ಫೇಸ್‌ಬುಕ್‌ನಲ್ಲಿ ಅವಹೇಳನ; ದೂರು

ಮಂಗಳೂರು: ಮಂಗಳೂರು ಉತ್ತರ ವಿಧಾನಸಭಾ ಕ್ಷೇತ್ರದಲ್ಲಿ ಸಿಪಿಎಂ ಅಭ್ಯರ್ಥಿಯಾಗಿ ಡಿವೈಎಫ್‌ಐ ರಾಜ್ಯಾಧ್ಯಕ್ಷ ಮುನೀರ್‌ ಕಾಟಿಪಳ್ಳ ಸ್ಪರ್ಧಿಸಲಿದ್ದು,  ಈ ವಿಚಾರ ಸಾಮಾಜಿಕ ಜಾಲತಾಣಗಳಲ್ಲಿ ಚರ್ಚೆಯಾಗುತ್ತಿದ್ದಂತೆ  ಅವರನ್ನು  ಬೆಂಬಲಿಸಿರುವ ಯುವತಿಗೆ ಕಿಡಿಗೇಡಿಯೊಬ್ಬ ಅವಹೇಳನ ಮಾಡುವಂತಹ ಕಮೆಂಟ್ಸ್‌ಗಳನ್ನು  ಫೇಸ್‌ಬುಕ್‌ನಲ್ಲಿ  ಹಾಕಿರುವ ಬಗ್ಗೆ  ಉರ್ವ ಠಾಣೆಗೆ ದೂರು ನೀಡಲಾಗಿದೆ.

ಮುನೀರ್‌ ಕಾಟಿಪಳ್ಳ  ಸ್ಪರ್ಧಿಸುವ ವಿಚಾರ  ತಿಳಿಯುತ್ತಿದ್ದಂತೆ  ಡಿವೈಎಫ್‌ಐಯಲ್ಲಿ ಸಕ್ರಿಯರಾಗಿರುವ ಯುವತಿ ಮುನೀರ್‌ ಅವರನ್ನು ಬೆಂಬಲಿಸಿದ್ದರು. 

ಇದನ್ನು ವಿರೋಧಿಸಿದ ಹರೀಶ್‌ ರಾಜ್‌ ಎಂಬಾತ ಜಾತಿ ನಿಂದನೆ ಮಾಡುವ ಮೂಲಕ ಕೀಳು ಭಾಷೆಯಲ್ಲಿ  ಜರೆದು ಫೇಸ್‌ಬುಕ್‌ನಲ್ಲಿ ಪೋಸ್ಟ್‌ ಮಾಡಿದ್ದ.  ಈತನ ವಿರುದ್ಧ  ಯುವತಿ ಉರ್ವ ಠಾಣೆಯಲ್ಲಿ ದೂರು ನೀಡಿದ್ದಾರೆ.  ಆರೋಪಿಯನ್ನು ಕೂಡಲೇ ಬಂಧಿಸುವಂತೆ ಡಿವೈಎಫ್‌ಐ ಕಾರ್ಯಕರ್ತರು  ಆಗ್ರಹಿಸಿದ್ದಾರೆ.