ಅರಣ್ಯ ರಕ್ಷಣೆಗೆ ಮಹಿಳಾ ಪಡೆ; ಜಾರ್ಖಂಡ್‌ ಹಳ್ಳಿಯೊಂದರಲ್ಲಿ ಒಗ್ಗೂಡಿದ ಹೆಂಗಳೆಯರು

ರಾಂಚಿ: ಕಾಡಿನ ರಕ್ಷಣೆಯಾಗಬೇಕೆಂದು ಪ್ರತಿಯೊಬ್ಬರೂ ಹೇಳುತ್ತಾರಾದರೂ ಅದರತ್ತ ಕೆಲಸ ಮಾಡುವವರು ಎಲ್ಲೋ ಕೆಲವರು ಮಾತ್ರ. ಜಾರ್ಖಂಡ್‌ನ‌ ಹಳ್ಳಿಯೊಂದರ ಮಹಿಳೆಯರು ಮಾತ್ರ ಆ ಮಾತನ್ನು ಗಂಭೀರವಾಗಿ ತೆಗೆದುಕೊಂಡಿದ್ದು, ತಮ್ಮೂರಿನ ಕಾಡಿನ ರಕ್ಷಣೆಗೆ ತಾವೇ ಗುಂಪು ಕಟ್ಟಿ ನಿಂತಿದ್ದಾರೆ.

ಆನಂದಪುರ ಬ್ಲಾಕ್‌ನ ಮಹಿಷಗಢ ಗ್ರಾಮದ ಮಹಿಳೆಯರು ಏಳು ಸ್ವಸಹಾಯ ಗುಂಪುಗಳನ್ನು ಸೇರಿಸಿಕೊಂಡು, ಒಟ್ಟು 104 ಮಹಿಳೆಯರ ತಂಡವೊಂದನ್ನು ರಚಿಸಿಕೊಂಡಿದ್ದಾರೆ. ಆ ತಂಡದ ಮೂಲಕ “ಜಂಗಲ್‌ ಬಚಾವೋ’ ಅಭಿಯಾನ ಆರಂಭಿಸಿದ್ದಾರೆ. 25 ಜನರ ನಾಲ್ಕು ತಂಡಗಳನ್ನು ರಚಿಸಿಕೊಂಡು, ಪ್ರತಿದಿನ ಶಿಫ್ಟ್ ಗಳಲ್ಲಿ ಕಾಡು ಕಾಯುತ್ತಿದ್ದಾರೆ.

ಯಾರಾದರೂ ಕಾಡಿನಲ್ಲಿ ಮರ ಕಡಿಯುವುದಾಗಲೀ ಅಥವಾ ಅವ್ಯವಹಾರ ನಡೆಸುವುದನ್ನು ಕಂಡರೆ ತಕ್ಷಣ ಅವರಿಗೆ 5 ಸಾವಿರ ರೂ.ಗಳಷ್ಟು ದಂಡ ವಿಧಿಸುತ್ತಿದ್ದಾರೆ.

ಇದನ್ನೂ ಓದಿ:ಪರಿಸ್ಥಿತಿ ಹೀಗಾದರೆ ಹಿಂದೂ, ಮುಸ್ಲಿಂ ಗ್ಯಾಪ್ ಹೆಚ್ಚಳ : ಸಚಿವ ಈಶ್ವರಪ್ಪ

ಮರ ಕಡಿಯುವವರಿಗೆ ಮಾತ್ರವಲ್ಲ, ಕಾಡು ಕಾಯುವ ಕೆಲಸಕ್ಕೆ ಯಾವುದಾದರೂ ಮಹಿಳೆ ಗೈರಾದರೆ ಆಕೆಗೂ ತಂಡವೇ 200 ರೂ. ದಂಡ ವಿಧಿಸುತ್ತದೆ. ಈ ರೀತಿ ದಂಡದಿಂದ ಬಂದ ಹಣವನ್ನು ಸಸಿ ನೆಡುವುದಕ್ಕೆ ಬಳಕೆ ಮಾಡಿಕೊಳ್ಳಲಾಗುತ್ತಿದೆ.

ಕಾಡು ನಾಶಕ್ಕೆ ಫುಲ್ ಸ್ಟಾಪ್‌:
ಯೋಧರು ಬಂದೂಕು ಹಿಡಿದು ಗಡಿ ಕಾಯುವಂತೆಯೇ, ಬೆತ್ತದ ಕೋಲನ್ನು ಹಿಡಿದು ಕಾಡು ಕಾಯುವ ಈ ಹೆಣ್ಣು ಮಕ್ಕಳಿಂದಾಗಿ ಸುತ್ತಮುತ್ತಲಿನ ಜನರು ಸಾಕಷ್ಟು ಎಚ್ಚೆತ್ತುಕೊಂಡಿದ್ದಾರಂತೆ. ಕಾಡಿಗೆ ಕೊಡಲಿ ಇಡುವಷ್ಟು ಧೈರ್ಯವನ್ನು ಯಾರೂ ಮಾಡುತ್ತಿಲ್ಲವಂತೆ. ಕಳೆದ ಒಂದು ವರ್ಷದಿಂದ ಯಾವುದೇ ಮರವೂ ಕೊಡಲಿಯೇಟು ತಿಂದಿಲ್ಲ ಎನ್ನುತ್ತಾರೆ ಸ್ಥಳೀಯರು.