Women Employees: ತಮಿಳುನಾಡಲ್ಲಿ 700 ಕೋಟಿಯ ಚೀನ ಮಾದರಿ ಹಾಸ್ಟೆಲ್‌!

ಚೆನ್ನೈ: ಆ್ಯಪಲ್‌ ಫೋನ್‌ ಉತ್ಪಾದಕ ಕಂಪೆನಿ ಫಾಕ್ಸ್‌ಕಾನ್‌ನ ಮಹಿಳಾ ಉದ್ಯೋಗಿಗಳಿಗಾಗಿ 20 ಎಕ್ರೆ ಪ್ರದೇಶ ದಲ್ಲಿ ಹಾಸ್ಟೆಲ್‌ ನಿರ್ಮಾಣ ಮಾಡಲಾಗಿದೆ. ಭಾರತದಲ್ಲಿ ಮೊದಲ ಬಾರಿಗೆ ಇಂಥ ರಚನೆ ಮಾಡಲಾಗಿದ್ದು, 705.05 ಕೋಟಿ ರೂ. ವೆಚ್ಚ ಮಾಡಲಾಗಿದೆ.

ಫಾಕ್ಸ್‌ಕಾನ್‌ನ ಉದ್ಯೋಗಿಗಳಿಗೆ ಚೀನದಲ್ಲಿ ನಿರ್ಮಿಸಲಾಗಿರುವ ಹಾಸ್ಟೆಲ್‌ ರೀತಿಯೇ ಇದನ್ನು ನಿರ್ಮಾಣ ಮಾಡಲಾಗಿದೆ. ವಿಶ್ವದ ಬಹುತೇಕ ಭಾಗಗಳಿಗೆ ಐಫೋನ್‌ ರಫ್ತು ಮಾಡುವ ಫಾಕ್ಸ್‌ಕಾನ್‌ನ ಚೆನ್ನೈ ಘಟಕದಲ್ಲಿ 41,000 ಉದ್ಯೋಗಿಗಳಿದ್ದು, ಅದರಲ್ಲಿ 35,000 ಮಂದಿ ಮಹಿಳೆಯರಾಗಿದ್ದಾರೆ. ಈ ಹಾಸ್ಟೆಲ್‌ನಲ್ಲಿ ಸುಮಾರು 18,720 ಮಂದಿ ಇರಬಹುದು ಎನ್ನಲಾಗಿದೆ.

ಟ್ರಿಲಿಯನ್‌ ಡಾಲರ್‌ ಎಕಾನಮಿಗೆ ಪೂರಕ: ಹಾಸ್ಟೆಲ್‌ ಉದ್ಘಾಟಿಸಿದ ಬಳಿಕ ಮಾತನಾಡಿದ ಸಿಎಂ ಎಂ.ಕೆ.ಸ್ಟಾಲಿನ್‌, ಫಾಕ್ಸ್‌ಕಾನ್‌ ತಮಿಳುನಾಡಿನ ಅವಿಭಾಜ್ಯ ಅಂಗ. ತೈವಾನ್‌ನ ಕಂಪೆನಿ ರಾಜ್ಯದಲ್ಲೇ ಉಳಿದು ಮತ್ತಷ್ಟು ಹೂಡಿಕೆ ಮಾಡಲಿದೆ ಎಂದು ವಿಶ್ವಾಸ ವ್ಯಕ್ತಪಡಿಸಿದರು. ಅಲ್ಲದೇ ಇಂತಹ ಹೂಡಿಕೆಗಳು 2030ರ ವೇಳೆಗೆ ತಮಿಳುನಾಡು ಟ್ರಿಲಿಯನ್‌ ಡಾಲರ್‌ ಎಕಾನಮಿ (83 ಲಕ್ಷ ಕೋಟಿ ರೂ.) ತಲುಪಲು ನೆರವಾಗಲಿದೆ ಎಂದು ಅವರು ಹೇಳಿದರು.