ಎಸ್‌ಪಿ ಶಾಸಕನ ಸಹಿತ 8 ಮಂದಿಯಿಂದ ಗ್ಯಾಂಗ್‌ ರೇಪ್‌: ಮಹಿಳೆ ಶವ ಪತ್ತೆ

ಸುಲ್ತಾನ್‌ಪುರ : ಸಮಾಜವಾದಿ ಪಕ್ಷದ ಶಾಸಕ ಅರಣ್‌ ವರ್ಮಾ ಸಹಿತ ಎಂಟು ಮಂದಿ ಕಾಮಾಂಧರು ತನ್ನ ಮೇಲೆ ಗ್ಯಾಂಗ್‌ ರೇಪ್‌ ನಡೆಸಿದ್ದಾರೆ ಎಂದು ಆರೋಪಿಸಿದ್ದ 21ರ ಹರೆಯದ ಮಹಿಳೆಯ ಶವ, ಉತ್ತರ ಪ್ರದೇಶದ ಸುಲ್ತಾನ್‌ಪುರದಲ್ಲಿ, ಶನಿವಾರ ರಾತ್ರಿ ಪತ್ತೆಯಾಗಿದೆ.

ಈ ಮಹಿಳೆಯನ್ನು ಕುತ್ತಿಗೆ ಬಿಗಿದು ಸಾಯಿಸಲಾಗಿದೆ ಎಂದು ಪೊಲೀಸರು ಹೇಳಿದ್ದಾರೆ. ಈ ಮೊದಲು ಶಾಸಕ ಅರುಣ್‌ ವರ್ಮಾಗೆ ಈ ಗ್ಯಾಂಗ್‌ ರೇಪ್‌ ಪ್ರಕರಣದಿಂದ  ಕ್ಲೀನ್‌ ಚಿಟ್‌ ನೀಡಿದ್ದ ಪೊಲೀಸರು ಇದೀಗ ದೂರುದಾರ ಮಹಿಳೆ ಕೊಲೆಯಾಗಿರುವ ಹಿನ್ನೆಲೆಯಲ್ಲಿ ಐಪಿಸಿ 302ರ ಪ್ರಕಾರ ಮರ್ಡರ್‌ ಕೇಸ್‌ ಬುಕ್‌ ಮಾಡಿದ್ದಾರೆ.

ಚುನಾವಣೆಗೆ ಇನ್ನು ಕೆಲವೇ ದಿನಗಳು ಇರುವಂತೆಯೇ ತನ್ನ ಮೇಲೆ ಮಾಡಲಾಗಿರುವ ಈ ಆರೋಪವು ರಾಜಕೀಯ ಷಡ್ಯಂತ್ರದ ಭಾಗವಾಗಿದೆ ಎಂದು ವರ್ಮಾ ಆರೋಪಿಸಿದ್ದಾರೆ. ಮಾತ್ರವಲ್ಲದೆ, ಈ ಕೊಲೆ ಪ್ರಕರಣದ ಬಗ್ಗೆ ಸಿಬಿಐ ತನಿಖೆಯನ್ನು ಆಗ್ರಹಿಸಿದ್ದಾರೆ. 

ಸುಲ್ತಾನ್‌ಪುರದಲ್ಲಿ ಇದೇ ಫೆ.27ರಂದು ಮತದಾನ ನಡೆಯಲಿದೆ. ಮುಖ್ಯಮಂತ್ರಿ ಅಖೀಲೇಶ್‌ ಯಾದವ್‌ ಅವರು ಇದೇ ಸುಲ್ತಾನ್‌ಪುರದಲ್ಲಿ ಕಳೆದ ಜನವರಿಯಲ್ಲಿ ತನ್ನ ಚುನಾವಣಾ ಪ್ರಚಾರಾಭಿಯಾನವನ್ನು ಆರಂಭಿಸಿದ್ದರು.