ಆಗ್ರಾ: ಉತ್ತರ ಪ್ರದೇಶದ ನೊಯ್ಡಾದಿಂದ ಔರೈಯಾಗೆ ಶೇರ್‌ ಟ್ಯಾಕ್ಸಿನಲ್ಲಿ ಪ್ರಯಾಣಿಸುತ್ತಿದ್ದ ವೇಳೆ 23 ವರ್ಷದ ಮಹಿಳೆಯನ್ನು ಸಾಮೂಹಿಕ ಅತ್ಯಾಚಾರ ನಡೆಸಿದ ಘಟನೆ ಆಗ್ರಾ ಹೊರವಲಯದ ಯುಮುನಾ ಎಕ್ಸ್‌ ಪ್ರಸ್‌ ಹೆದ್ದಾರಿಯಲ್ಲಿ ನಡೆದಿದೆ.
ಈ ಸಂಬಂಧ 40 ವರ್ಷದ ಕ್ಯಾಬ್‌ ಚಾಲಕ ಹಾಗೂ ಆತನ ಇಬ್ಬರು ಸಹಚರರನ್ನು ಔರೈಯಾ ಜಿಲ್ಲೆ ಪೊಲೀಸರು ಬಂಧಿಸಿದ್ದಾರೆ.
ಔರೈಯಾದಲ್ಲಿರುವ ತಾಯಿ ಮನೆಗೆ ತೆರಳಲು ಮಂಗಳವಾರ ರಾತ್ರಿ 8.30ರ ಸುಮಾರಿಗೆ ಶೇರ್‌ ಟ್ಯಾಕ್ಸಿ ಬುಕ್‌ ಮಾಡಿದ ಮಹಿಳೆ, ನೊಯ್ಡಾದಿಂದ ಪ್ರಯಾಣ ಆರಂಭಿಸಿದ್ದಾರೆ.
ದಾರಿಯಲ್ಲಿ ಚಾಲಕನ ಇತರ ಇಬ್ಬರು ಸಹಚರರು ಕ್ಯಾಬ್‌ಗ ಹತ್ತಿದ್ದಾರೆ. ಆದರೆ ಅವರು ಸಹ ಪ್ರಯಾಣಿಕರು ಇರಬಹುದು ಎಂದು ಮಹಿಳೆ ಭಾವಿಸಿದ್ದರು.
ಆಗ್ರಾದ ಹೊರವಲಯದಲ್ಲಿ ಯುಮುನಾ ಎಕ್ಸ್‌ಪ್ರೆಸ್‌ ಹೆದ್ದಾರಿಯಲ್ಲಿ ಚಾಲಕ ಕ್ಯಾಬ್‌ ನಿಲ್ಲಿಸಿದ್ದಾನೆ. ಅನಂತರ ಮೂವರು ಸೇರಿಕೊಂಡು ಮಹಿಳೆಯನ್ನು ರಸ್ತೆಯ ಪಕ್ಕದ ಪೊದೆಗಳಿರುವ ಜಾಗಕ್ಕೆ ಬಲವಂತವಾಗಿ ಎಳೆದೊಯ್ಡು ಮೂವರು ಸಾಮೂಹಿಕ ಅತ್ಯಾಚಾರ ನಡೆಸಿದ್ದಾರೆ. ಬಳಿಕ ಆಕೆಯನ್ನು ಎತ್ಮಾದಪುರ ಸಮೀಪ ಕರೆತಂದ ಆರೋಪಿಗಳು, ಬೇರೊಂದು ಆಟೋದಲ್ಲಿ ಆಕೆಯನ್ನು ಫಿರೋಜಾಬಾದ್‌ಗೆ ಕಳುಹಿಸಿದ್ದಾರೆ.
ಬುಧವಾರ ಬೆಳಗ್ಗೆ ಎತ್ಮಾದಪುರ ಪೊಲೀಸ್‌ ಠಾಣೆಗೆ ಬಂದು ಮಹಿಳೆ ದೂರು ದಾಖಲಿಸಿದ್ದಾರೆ. ಪೊಲೀಸರು ಕ್ಯಾಬ್‌ ಮಾಹಿತಿ ಮತ್ತು ಸಿಸಿಟಿವಿಗಳ ಸಹಾಯದಿಂದ ಮಿಂಚಿನ ಕಾರ್ಯಾಚರಣೆ ನಡೆಸಿ ಬುಧವಾರವೇ ಎಲ್ಲ ಮೂವರು ಆರೋಪಿಗಳನ್ನು ಬಂಧಿಸಿದ್ದಾರೆ.
