ಕೋಚ್‌ ವಿರುದ್ಧ ಮಹಿಳಾ ಸೈಕ್ಲಿಸ್ಟ್‌  ಗಂಭೀರ ಆರೋಪ

ಹೊಸದಿಲ್ಲಿ: ಭಾರತ ಸೈಕ್ಲಿಂಗ್‌ ತಂಡದ ಸದಸ್ಯೆ ಯೊಬ್ಬರು, ತಂಡದ ಕೋಚ್‌ ವಿರುದ್ಧ ಗಂಭೀರ ಆರೋಪ ಮಾಡಿದ್ದಾರೆ.

ಈ ಕುರಿತು ಸಾಯ್‌ (ಭಾರತೀಯ ಕ್ರೀಡಾ ಪ್ರಾಧಿಕಾರ), ಸಿಎಫ್ಐ (ಸೈಕ್ಲಿಂಗ್‌ ಫೆಡರೇಶನ್‌ ಆಫ್ ಇಂಡಿಯಾ) ಪ್ರತ್ಯೇಕವಾಗಿ ತನಿಖಾ ಸಮಿತಿ ರಚಿಸಿವೆ. ಸದ್ಯದಲ್ಲೇ ಇದರ ಅಂತಿಮ ತೀರ್ಮಾನ ಹೊರಬೀಳುವ ಸಾಧ್ಯತೆಯಿದೆ.

ಆಗಿದ್ದೇನು?: ಇತ್ತೀಚೆಗೆ ಸ್ಲೊವೇನಿಯದಲ್ಲಿ ನಡೆದ ಸೈಕ್ಲಿಂಗ್‌ ತರಬೇತಿ ಶಿಬಿರದಲ್ಲಿ, ರಾಷ್ಟ್ರೀಯ ಓಟಗಾರರ ತರಬೇತುದಾರ ಆರ್‌. ಕೆ. ಶರ್ಮ, ಸೈಕ್ಲಿಂಗ್‌ ತಂಡಕ್ಕೆ ತರಬೇತುದಾರರಾಗಿ ನೇಮಿಸಲ್ಪಟ್ಟಿದ್ದರು. ಇದು ಸಿಎಫ್ಐನ ಶಿಫಾರಸಿನಡಿಯಲ್ಲೇ ಆಗಿತ್ತು.

ಈ ವೇಳೆ ಸಾಯ್‌ಗೆ ಇಮೇಲ್‌ ಮೂಲಕ ಸಂದೇಶ ಕಳುಹಿಸಿದ ಸೈಕ್ಲಿಸ್ಟ್‌ , ಆರ್‌. ಕೆ. ಶರ್ಮ ತನ್ನೊಂದಿಗೆ ಅನುಚಿತವಾಗಿ ನಡೆದುಕೊಂಡಿದ್ದಾರೆ.

ತತ್‌ಕ್ಷಣ ತನ್ನನ್ನು ವಾಪಸ್‌ ಭಾರತಕ್ಕೆ ಮರಳಿ ಕರೆಸಿಕೊಳ್ಳದಿದ್ದರೆ ತನಗೆ ತೀವ್ರ ಸಮಸ್ಯೆಯಾಗಲಿದೆ ಎಂದು ತಿಳಿಸಿದ್ದರು. ತತ್‌ಕ್ಷಣ ಸಾಯ್‌ ಸೈಕ್ಲಿಸ್ಟ್‌ ಅನ್ನು ಮರಳಿ ಕರೆಸಿಕೊಂಡಿತ್ತು.