ಖಾಸಗಿ ಚಾಟ್‌ಗೆ “ಬೀಗ’ಹಾಕಿ ಅಡಗಿಸಿಡಿ! ವಾಟ್ಸ್‌ಆ್ಯಪ್‌ನಿಂದ ಹೊಸ “ಲಾಕ್‌ ಚಾಟ್‌’ಫೀಚರ್‌

ವಾಷಿಂಗ್ಟನ್‌: ಮೆಟಾ ಮಾಲೀಕತ್ವದ ವಾಟ್ಸ್‌ಆ್ಯಪ್‌ ಕಂಪನಿಯು, ತನ್ನ ಆ್ಯಂಡ್ರಾಯ್ಡ ಬೆಟಾ ಬಳಕೆದಾರರಿಗೆ “ಲಾಕ್‌ ಚಾಟ್‌’ ಎಂಬ ಹೊಸ ಫೀಚರ್‌ ಪರಿಚಯಿಸುತ್ತಿದೆ. ಇದರ ಸಹಾಯದಿಂದ ಬಳಕೆದಾರರು ತಮ್ಮ ಖಾಸಗಿ ಚಾಟ್‌ಗಳನ್ನು ಲಾಕ್‌ ಮಾಡಬಹುದು ಹಾಗೂ ಬೇರೆಯವರಿಗೆ ಕಾಣಿಸದಂತೆ ಹೈಡ್‌ ಮಾಡಬಹುದು.

“ಈ ನೂತನ ಫೀಚರ್‌ ಬಳಕೆದಾರರ ಖಾಸಗಿತನವನ್ನು ಮತ್ತಷ್ಟು ಸುಧಾರಿಸಲಿದೆ. ಅವರು ತಮ್ಮ ತೀರಾ ಖಾಸಗಿ ಚಾಟ್‌ಗಳನ್ನು ಅದೇ ಚಾಟ್‌ ಕಾಂಟ್ಯಾಕ್ಟ್ ಅಥವಾ ಗ್ರೂಪ್‌ ಇನ್ಫೋದಲ್ಲಿ ಲಾಕ್‌ ಮಾಡಬುಹುದು. ಒಮ್ಮೆ ಲಾಕ್‌ ಮಾಡಿದರೆ, ಬೇರೆಯವರು ಈ ಚಾಟ್‌ ಓಪನ್‌ ಮಾಡಲು ಸಾಧ್ಯವಿಲ್ಲ. ಬಳಕೆದಾರರೇ ಸ್ವತಃ ತಮ್ಮ ಫಿಂಗರ್‌ಪ್ರಿಂಟ್‌ ಅಥವಾ ಪಾಸ್‌ಕೋಡ್‌ ಸಹಾಯದಿಂದ ಅನ್‌ಲಾಕ್‌ ಮಾಡಬಹುದು,’ ಎಂದು ವಾಟ್ಸ್‌ಆ್ಯಪ್‌ ತಿಳಿಸಿದೆ.

“ಇದೇ ವೇಳೆ ಲಾಕ್‌ ಮಾಡಲಾದ ಪೋಟೋಗಳು, ವಿಡಿಯೋಗಳು ಫೋನ್‌ನ ಗ್ಯಾಲರಿಯಲ್ಲಿ ಸ್ವಯಂಚಾಲಿತವಾಗಿ ಸೇವ್‌ ಆಗುವುದಿಲ್ಲ. ಹೀಗಾಗಿ ಗ್ಯಾಲರಿಯಲ್ಲಿ ಅವುಗಳು ಕಾಣಿಸುವುದಿಲ್ಲ. ಬಳಕೆದಾರ ಅನ್‌ಲಾಕ್‌ ಮಾಡಿದರೆ ಮಾತ್ರ ಟೆಕ್ಸ್ಟ್ ಅಥವಾ ಫೋಟೋ, ವಿಡಿಯೋ ಗೋಚರವಾಗುತ್ತದೆ,’ ಎಂದು ವಿವರಿಸಿದೆ.

ಈ ಫೀಚರ್‌ ಅಭಿವೃದ್ಧಿ ಹಂತದಲ್ಲಿದ್ದು, ಮುಂದಿನ ದಿನಗಳಲ್ಲಿ ಆಪ್‌ಡೇಟ್‌ ಆದ ಸಂದರ್ಭದಲ್ಲಿ ಹೊಸ ಫೀಚರ್‌ ಬಳಕೆದಾರರಿಗೆ ಲಭ್ಯವಾಗಲಿದೆ ಎಂದು ವಾಟ್ಸ್‌ಆ್ಯಪ್‌ ಮಾಹಿತಿ ನೀಡಿದೆ.