ಹೈದರಾಬಾದ್‌ ತಂಡಕ್ಕೆ ವಾರ್ನರ್‌ ಶುಭ ಹಾರೈಕೆ

ಹೈದರಾಬಾದ್‌: “ಆರೇಂಜ್‌ ಆರ್ಮಿ’ ಖ್ಯಾತಿಯ ಸನ್‌ರೈಸರ್ ಹೈದರಾಬಾದ್‌ ತಂಡಕ್ಕೆ ಮಾಜಿ ನಾಯಕ ಡೇವಿಡ್‌ ವಾರ್ನರ್‌ ಶುಭ ಹಾರೈಸಿದ್ದಾರೆ. ತಂಡ ಶುಕ್ರವಾರದ 2ನೇ ಕ್ವಾಲಿಫೈಯರ್‌ ಪಂದ್ಯ ಆಡುವುದಕ್ಕೂ ಮೊದಲು ವಾರ್ನರ್‌ ಟ್ವಿಟರ್‌ ಮೂಲಕ ಸಂದೇಶ ರವಾನಿಸಿದ್ದಾರೆ.

“ಗುಡ್‌ ಲಕ್‌ ಟು ಸನ್‌ರೈಸರ್ ಟುನೈಟ್‌. ಡು ಹೈದರಾಬಾದ್‌ ಪ್ರೌಡ್‌ ಜಂಟಲ್‌ಮಾÂನ್‌’ ಎಂದು ಡೇವಿಡ್‌ ವಾರ್ನರ್‌ ಟ್ವೀಟ್‌ ಮಾಡಿದ್ದಾರೆ.

ಚೆನ್ನೈ ಸೂಪರ್‌ ಕಿಂಗ್ಸ್‌ ವಿರುದ್ಧದ ಮೊದಲ ಕ್ವಾಲಿಫೈಯರ್‌ ಪಂದ್ಯದ ಸಂದರ್ಭದಲ್ಲೂ ಡೇವಿಡ್‌ ವಾರ್ನರ್‌ ಹೈದರಾಬಾದ್‌ ತಂಡಕ್ಕೆ ಬೆಸ್ಟ್‌ ಆಫ್ ಲಕ್‌ ಹೇಳಿದ್ದರು. ಆದರೆ ಆ ಪಂದ್ಯದಲ್ಲಿ ತಂಡ 2 ವಿಕೆಟ್‌ಗಳ ಸೋಲಿನ ಆಘಾತಕ್ಕೆ ಸಿಲುಕಿತ್ತು.

ದಕ್ಷಿಣ ಆಫ್ರಿಕಾ ಪ್ರವಾಸದ ವೇಳೆ ಚೆಂಡು ವಿರೂಪ ಪ್ರಕರಣದಲ್ಲಿ ಸಿಕ್ಕಿಬಿದ್ದ ಕಾರಣಕ್ಕಾಗಿ ಡೇವಿಡ್‌ ವಾರ್ನರ್‌ ಅವರನ್ನು ಬಿಸಿಸಿಐ ಐಪಿಎಲ್‌ನಿಂದಲೂ ನಿಷೇಧಿಸಿತ್ತು. ವಾರ್ನರ್‌ ಹೈದರಾಬಾದ್‌ ತಂಡದ ನಾಯಕನೂ ಆಗಿದ್ದರು. ಅವರ ಗೈರಲ್ಲಿ ಈ ಅವಕಾಶ ನ್ಯೂಜಿಲ್ಯಾಂಡಿನ ಕೇನ್‌ ವಿಲಿಯಮ್ಸನ್‌ ಅವರಿಗೆ ಒಲಿದಿತ್ತು.