ಸಾಲಿಗ್ರಾಮದಲ್ಲಿ ಮತದಾನ ಜಾಗೃತಿ ಜಾಥಾ

ಭೇರ್ಯ: ಕೆ.ಆರ್‌.ನಗರ ತಾಲೂಕು ಸಾಲಿಗ್ರಾಮದಲ್ಲಿ ಕಡ್ಡಾಯ ಮತದಾನ ಜಾಗೃತಿ ಜಾಥಾ ನಡೆಯಿತು.  ಜಾಗೃತಿ ಸಮಿತಿ ಅಧ್ಯಕ್ಷ ಹಾಗೂ ತಾಪಂ ಇಒ ಲಕ್ಷ್ಮೀಮೋಹನ್‌ ನೇತೃತ್ವದಲ್ಲಿ ಮತಗಟ್ಟೆ ಅರಿವು ಗುಂಪಿನ ಸದಸ್ಯರು ಮತದಾನದ ಮಹತ್ವದ ಕುರಿತು ಸಾರ್ವಜನಿಕರಿಗೆ ತಿಳಿ ಹೇಳಿದರು.

ಸ್ಥಳೀಯ ಗ್ರಾಪಂ ಕಚೇರಿಯಲ್ಲಿ ಸಭೆ ನಡೆಸಿ, ಬಳಿಕ ಮಹಾತ್ಮ ಗಾಂಧಿ ವೃತ್ತದಿಂದ ಜಾಥಾ ಹೊರಟು ಕೃಷಿ ಉತ್ಪನ್ನ ಮಾರುಕಟ್ಟೆ ಉಪಪ್ರಾಂಗಣದಲ್ಲಿ ಸಂತೆಗೆ ಬಂದಿದ್ದ ಮತದಾರರಿಗೆ “ನಿಮ್ಮ ಮತ-ನಿಮ್ಮ ಭವಿಷ್ಯ’, “ಮತ ಚಲಾವಣೆ ನಿಮ್ಮ ಹಕ್ಕು’, “ತಪ್ಪದೆ ಮತ ಚಲಾಯಿಸಿ’ ಎಂಬ ಮಾಹಿತಿವುಳ್ಳ ಕರಪತ್ರ ನೀಡುವ ಮೂಲಕ ಕಡ್ಡಾಯ ಮತದಾನದ ಕುರಿತು ಅರಿವು ಮೂಡಿಸಲಾಯಿತು.

ಸೆಕ್ಟರ್‌ ಅಧಿಕಾರಿ ಅಯಾಜ್‌, ಪಿಡಿಒ ಮಂಜುನಾಥ್‌, ಲೆಕ್ಕಾಧಿಕಾರಿ ಪಾಂಡು, ಕಾರ್ಯದರ್ಶಿ ಕೆ.ಎ.ಮಂಜುನಾಥ್‌, ಪೊಲೀಸ್‌ ಪೇದೆ ವಿಜಯರಘು, ಕಂದಾಯ, ಆರೋಗ್ಯ ಹಾಗೂ ಮಹಿಳಾ ಮತ್ತು ಮಕ್ಕಳ ಕಲ್ಯಾಣ ಇಲಾಖೆ ಸಿಬ್ಬಂದಿ ಇತರರಿದ್ದರು.