BJP ಗೆ ಮತ: ಮುಸ್ಲಿಂ ಮಹಿಳೆಗೆ ಥಳಿತ

ಭೋಪಾಲ್‌: ಬಿಜೆಪಿಗೆ ಮತ ಹಾಕಿದ್ದಕ್ಕೆ ಮುಸ್ಲಿಂ ಮಹಿಳೆಯೊಬ್ಬರನ್ನು ಆಕೆಯ ಸೋದರ ಮಾವ ಥಳಿಸಿರುವ ಘಟನೆ ಮಧ್ಯಪ್ರದೇಶದ ಸೆಹೋರ್‌ನಲ್ಲಿ ನಡೆದಿದೆ. ಸಮೀನಾ ಬಿ(30) ಥಳಿತಕ್ಕೊಳಗಾದವರು. ಇತ್ತೀಚೆಗೆ ನಡೆದ ಮಧ್ಯಪ್ರದೇಶ ವಿಧಾನಸಭಾ ಚುನಾವಣೆಯಲ್ಲಿ ಸಮೀನಾ ಬಿಜೆಪಿಗೆ ಮತ ಹಾಕಿದ್ದರು. ಸೆಹೋರ್‌ ಕ್ಷೇತ್ರದಲ್ಲಿ ಬಿಜೆಪಿ ಪ್ರಚಂಡ ವಿಜಯ ದಾಖಲಿಸಿತು. ಇದರ ಸಂಭ್ರಮದಲ್ಲಿ ಸಮೀನಾ ಪಾಲ್ಗೊಂಡಿದ್ದಾಗ ಆಕೆಯ ಸೋದರ ಮಾವ ಜಾವೇದ್‌ ಖಾನ್‌ ಇದಕ್ಕೆ ಆಕ್ಷೇಪ ವ್ಯಕ್ತಪಡಿಸಿ, ನಿಂದಿಸಿದ್ದಾನೆ.

ಇದನ್ನು ಸಮೀನಾ ಪ್ರಶ್ನಿಸಿದ್ದಾರೆ. ಇದರಿಂದ ಸಿಟ್ಟಾದ ಜಾವೇದ್‌, ಕೋಲಿನಿಂದ ಸಮೀನಾ ಅವರಿಗೆ ಥಳಿಸಿದ್ದಾನೆ. ಜತೆಗೆ ಬಿಜೆಪಿಗೆ ಬೆಂಬಲ ನೀಡಿದರೆ ಪರಿಣಾಮ ಎದುರಿಸಬೇಕಾಗುತ್ತದೆ ಎಂದು ಬೆದರಿಕೆ ಹಾಕಿರುವುದಾಗಿ ದೂರಿನಲ್ಲಿ ತಿಳಿಸಲಾಗಿದೆ. ಪ್ರಕರಣ ಬೆಳಕಿಗೆ ಬಂದ ಬೆನ್ನಲ್ಲೇ, ಮಾಜಿ ಸಿಎಂ ಶಿವರಾಜ್‌ ಸಿಂಗ್‌ ಚೌಹಾಣ್‌ ಅವರು ಸಮೀನಾ ಮತ್ತು ಅವರ ಇಬ್ಬರು ಮಕ್ಕಳನ್ನು ತಮ್ಮ ಅಧಿಕೃತ ನಿವಾಸಕ್ಕೆ ಆಹ್ವಾನಿಸಿ, ಧೈರ್ಯ ತುಂಬಿದ್ದಾರೆ.