ಬೆಳಪುವಿನಲ್ಲಿ ಸುಳಿಗಾಳಿ; ಜನರಲ್ಲಿ ಆತಂಕ

ಕಾಪು: ಬೆಳಪು ಮೈದಾನದಲ್ಲಿ ದಿಢೀರ್‌ ಸುಳಿಗಾಳಿ ಬೀಸಿ ಜನರಲ್ಲಿ ಆತಂಕ ಮೂಡಿಸಿದ ಘಟನೆ ಶುಕ್ರವಾರ ಬೆಳಗ್ಗೆ ನಡೆದಿದೆ.

ಶನಿವಾರ ನಡೆಯಲಿರುವ ನಾವು ಭಾರತೀಯರು ರ್ಯಾಲಿಗಾಗಿ ಬೆಳಪು ಮೈದಾನದಲ್ಲಿ ಸಿದ್ಧತೆ ನಡೆಯುತ್ತಿದ್ದಾಗ ಅನಿರೀಕ್ಷಿತವಾಗಿ ಎದ್ದ ಸುಳಿ ಗಾಳಿಯಿಂದಾಗಿ ಕಾರ್ಯಕ್ರಮಕ್ಕೆ ವೇದಿಕೆ ಸಿದ್ಧಗೊಳಿಸುತ್ತಿದ್ದ ಕಾರ್ಮಿಕರಲ್ಲಿ ಆತಂಕ ಮೂಡಿಸಿತು.

ಕಾರ್ಯಕ್ರಮಕ್ಕಾಗಿ ಪೇರಿಸಿಟ್ಟಿದ್ದ ಕುರ್ಚಿಗಳು ಸುಳಿ ಗಾಳಿಗೆ ಸಿಲುಕಿ ಚೆಲ್ಲಾಪಿಲ್ಲಿಯಾಗಿ ಹರಡಿ ಬಿದ್ದಿದ್ದು, ಕೆಲಸ ಮಾಡುತ್ತಿದ್ದ ಕಾರ್ಮಿಕರು ಕೂಡಾ ದಂಗಾಗಿ ಓಡಿ ಹೋಗಿದ್ದಾರೆ. ಕಾರ್ಯಕ್ರಮದ ಬ್ಯಾನರ್‌ಗಳು ಕೂಡಾ ಎಲ್ಲೆಲ್ಲೊ ಹರಡಿ ಹೋಗಿವೆ.

ವೈರಲ್‌ ಆದ ವಿಡಿಯೋ:
ಬೆಳಪು ಮೈದಾನದಲ್ಲಿ ಬೀಸಿದ ಸುಳಿ ಗಾಳಿಯ ಬಗ್ಗೆ ಕಾರ್ಮಿಕರು ರೆಕಾರ್ಡ್‌ ಮಾಡಿದ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್‌ ಆಗಿದೆ.