ಗಂಗೂಬಾಯಿ ನಿವಾಸಕ್ಕೆ ಎಸ್‌ಪಿಬಿ ಭೇಟಿ

ಹುಬ್ಬಳ್ಳಿ: “ಡಾ|ಗಂಗೂಬಾಯಿ ಹಾನಗಲ್ಲ ಅವರ ಸಂಗೀತ ದೇಗುಲಕ್ಕೆ ಭೇಟಿ ನೀಡಿ ಪುನೀತನಾಗಿದ್ದೇನೆ’ ಎಂದು ಖ್ಯಾತ ಗಾಯಕ ಡಾ|ಎಸ್‌.ಪಿ.ಬಾಲಸುಬ್ರಹ್ಮಣ್ಯಂ ತಿಳಿಸಿದರು. 

ಇಲ್ಲಿನ ದೇಶಪಾಂಡೆ ನಗರದ ಡಾ|ಹಾನಗಲ್ಲ ಅವರ ನಿವಾಸ “ಗಂಗಾಲಹರಿ’ಗೆ ಶನಿವಾರ ಭೇಟಿ ನೀಡಿದ್ದ ಅವರು, ಸಂಗೀತ ಆರಾಧಕರಿಗೆ ಇದೊಂದು ದೇಗುಲ, ಅದ್ಭುತ ಮನೆ. ಅದೇಕೆ ಇಷ್ಟು ದಿನ ಇಲ್ಲಿಗೆ ಬರಲಿಲ್ಲವೋ ಗೊತ್ತಿಲ್ಲ ಎಂದರು.

ಗಂಗೂಬಾಯಿ ಆತ್ಮ ಇಲ್ಲಿಯೇ ನೆಲೆಸಿದೆ. ಅವರ ನಿವಾಸಕ್ಕೆ ಆಗಮಿಸುವ ಮೂಲಕ ಅವರ ಆಶೀರ್ವಾದ ಪಡೆದಿದ್ದೇನೆ. ಗಾಯನ ಕ್ಷೇತ್ರದ ಅವರ ಸಾಧನೆ, ಸಾಧನೆಗೆ ಸಂದ ಪುರಸ್ಕಾರಗಳನ್ನು ವೀಕ್ಷಿಸಿದೆ. ವಿವಿಧ ಸಂಗೀತ ಪರಿಕರಗಳನ್ನೊಳಗೊಂಡ ಇದು ಮಹತ್ವದ ಮ್ಯೂಜಿಯಂ. ಆದರೆ ಈ ಮ್ಯೂಜಿಯಂ ದೊಡ್ಡ ಪ್ರಮಾಣದಲ್ಲಿ ಇರಬೇಕಾಗಿತ್ತು.  ಇದನ್ನು ದೊಡ್ಡದಾಗಿಸಲು ಯತ್ನಿಸಬೇಕು. ಈ ನಿಟ್ಟಿನಲ್ಲಿ ನನ್ನಿಂದಾಗುವ ಯತ್ನಗಳನ್ನು ಕೈಗೊಳ್ಳಲು ಸಿದ್ಧ ಎಂದರು.

ಇದಕ್ಕೂ ಮೊದಲು ಗಂಗೂಬಾಯಿ ಹಾನಗಲ್ಲ ಅವರ ವಿವಿಧ ಭಾವಚಿತ್ರ, ಅವರು ಬಳಸುತ್ತಿದ್ದ ಸಂಗೀತ ಪರಿಕರಗಳು, ಬಿರುದು-ಪ್ರಶಸ್ತಿಗಳನ್ನು ಎಸ್‌ಪಿಬಿ ವೀಕ್ಷಿಸಿದರು. ಗಂಗೂಬಾಯಿ ಹಾನಗಲ್ಲ ಅವರ ಮೊಮ್ಮಗ ಮನೋಜ ಹಾನಗಲ್ಲ ಮಾಹಿತಿ ನೀಡಿದರು.