ದಿಲ್ಲಿ ಅಂಡರ್‌-15 ತಂಡಕ್ಕೆ ವಿರಾಟ್‌ ಕೊಹ್ಲಿ! ಇಲ್ಲಿದೆ ಅಸಲಿ ಕಹಾನಿ

ಹೊಸದಿಲ್ಲಿ: ಟೀಮ್‌ ಇಂಡಿಯಾದ ನಾಯಕ ವಿರಾಟ್‌ ಕೊಹ್ಲಿ ದಿಲ್ಲಿಯ ಅಂಡರ್‌-15 ತಂಡಕ್ಕೆ ಆಯ್ಕೆಯಾಗಿದ್ದಾರೆ!
ಇದೇನಿದು, 32 ವರ್ಷದ ವಿರಾಟ್‌ ಕೊಹ್ಲಿ 15 ವರ್ಷ ಕಿರಿಯರ ತಂಡಕ್ಕೆ ಆಯ್ಕೆಯಾಗುವುದೆಂದರೆ… ಎಂದು ಅಚ್ಚರಿಪಟ್ಟಿರಾ?

ಹಾಗೇನಿಲ್ಲ, ಇದು ಕೊಹ್ಲಿಯ ಹೈಸ್ಕೂಲ್‌ ದಿನಗಳ ಕತೆ. 2002-03ರಲ್ಲಿ ಕ್ರಿಕೆಟ್‌ ಹುಚ್ಚಿನ ವಿರಾಟ್‌ ಕೊಹ್ಲಿ ರಾಜಧಾನಿಯ ಪಶ್ಚಿಮ್‌ ವಿಹಾರ್‌ನ ಸೇವಿಯರ್‌ ಕಾನ್ವೆಂಟ್‌ ಸ್ಕೂಲ್‌ನಲ್ಲಿ 9ನೇ ಗ್ರೇಡ್‌ನ‌ಲ್ಲಿ ವಿದ್ಯಾಭ್ಯಾಸ ಮಾಡುತ್ತಿದ್ದರು. ಇವರ ಪ್ರತಿಭೆಯನ್ನು ಗುರುತಿಸಿದ ದಿಲ್ಲಿಯ ಕ್ರಿಕೆಟ್‌ ಆಯ್ಕೆ ಸಮಿತಿ 15 ವರ್ಷ ವಯೋಮಿತಿಯ “ಪಾಲೀ ಉಮ್ರಿಗರ್‌ ಟ್ರೋಫಿ’ ಕ್ರಿಕೆಟ್‌ ಪಂದ್ಯಾವಳಿಗೆ ಕೊಹ್ಲಿ ಅವರನ್ನು ಮೊದಲ ಬಾರಿಗೆ ಆಯ್ಕೆ ಮಾಡಿತ್ತು. ಶಾಲಾ ಆಡಳಿತ ಮಂಡಳಿ ಈ ಸಿಹಿ ಸುದ್ದಿಯನ್ನು ಪತ್ರದ ಮೂಲಕ ಕೊಹ್ಲಿ ಅವರ ಹೆತ್ತವರಿಗೆ ತಿಳಿಸಿತ್ತು. ಈ ಪತ್ರವೀಗ ವೈರಲ್‌ ಆಗಿದೆ!

ವಿರಾಟ್‌ ಕೊಹ್ಲಿ ಸೇರಿದಂತೆ ಈ ಶಾಲೆಯ ಮೂವರು ವಿದ್ಯಾರ್ಥಿಗಳು ಈ ಸರಣಿಗೆ ಆಯ್ಕೆಯಾಗಿದ್ದರು. ಅಂದು ಈ ಅವಕಾಶವನ್ನು ಸಮರ್ಥ ರೀತಿಯಲ್ಲಿ ಬಳಸಿಕೊಂಡ ಕೊಹ್ಲಿ 34.40 ಸರಾಸರಿಯಲ್ಲಿ 172 ರನ್‌ ಬಾರಿಸಿದ್ದರು. ಇದು ಅವರ ಯಶಸ್ಸಿನ ಮೊದಲ ಮೆಟ್ಟಿಲಾದದ್ದು ಈಗ ಇತಿಹಾಸ.

ಇದನ್ನೂ ಓದಿ :ದಿಲ್ಲಿ ವಾಯು ಮಾಲಿನ್ಯದಿಂದ ಪ್ರತಿ ವರ್ಷ 7 ಲಕ್ಷ ಕೋಟಿ ರೂ. ನಷ್ಟ!