ಸ್ಕೂಟಿಯಲ್ಲಿ ವಿರಾಟ್‌ ಕೊಹ್ಲಿ- ಅನುಷ್ಕಾ ಶರ್ಮಾ ಜಾಲಿರೈಡ್‌!-ವಿಡಿಯೋ ವೈರಲ್‌

ಜನಸಾಮಾನ್ಯರಂತೆ ಸಾರ್ವಜನಿಕ ಸ್ಥಳಗಳಿಗೆ ಬರಬೇಕಾದರೆ ಸೆಲೆಬ್ರಿಟಿಗಳು ದೊಡ್ಡ ಸಾಹಸವನ್ನೇ ಮಾಡಬೇಕಾಗುತ್ತದೆ. ಹಾಗಾಗಿಯೇ ಅವರು ಎಲ್ಲೇ ಹೋಗಬೇಕೆಂದರೂ ಸಾಕಷ್ಟು ಸೆಕ್ಯೂರಿಟಿಗಳನ್ನು ಇಟ್ಟುಕೊಂಡು, ತಮ್ಮ ಕಾರಿನಲ್ಲಿ ಬಂದು ಕೆಲಸ ಮುಗಿಸಿ, ತರಾತುರಿಯಲ್ಲಿ ವಾಪಸ್‌ ಹೋಗುತ್ತಾರೆ.

ಆದರೆ, ವಿರಾಟ್‌ ಕೊಹ್ಲಿ ಮತ್ತು ಅನುಷ್ಕಾ ಶರ್ಮಾ ಶನಿವಾರ ಮುಂಬೈನ ಬೀದಿಗಳಲ್ಲಿ ಆರಾಮಾಗಿ ಸುತ್ತಾಡಿದ್ದಾರೆ. ಅದೂ ಸ್ಕೂಟರ್‌ನಲ್ಲಿ!

ಹೌದು, ಈ ಜೋಡಿ ಕಾರನ್ನು ಮನೆಯಲ್ಲೇ ಬಿಟ್ಟು ಸ್ಕೂಟರ್‌ ಏರಿ ಜಾಲಿರೈಡ್‌ ಮಾಡಿರುವ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್‌ ಆಗಿದೆ. ವಿರಾಟ್‌ ಹಸಿರು ಬಣ್ಣದ ಶರ್ಟ್‌, ಕಪ್ಪು ಪ್ಯಾಂಟ್‌ ಧರಿಸಿದ್ದರೆ, ಅನುಷ್ಕಾ ಕಪ್ಪು ಬಣ್ಣದ ಟಿ-ಶರ್ಟ್‌ ಮತ್ತು ಪ್ಯಾಂಟ್‌ ಜೊತೆಗೆ ಬಿಳಿ ಶೂ ಧರಿಸಿ ಸ್ಕೂಟಿಯಲ್ಲಿ ವಿಹರಿಸಿದ್ದಾರೆ.

ಇಬ್ಬರೂ ತಲೆಗೆ ಬ್ಲ್ಯಾಕ್‌ ಹೆಲ್ಮೆಟ್‌ ಧರಿಸಿದ್ದರಿಂದ ಅಷ್ಟು ಸುಲಭದಲ್ಲಿ ಅವರನ್ನು ಪತ್ತೆಹಚ್ಚಲು ಯಾರಿಗೂ ಸಾಧ್ಯವಾಗಿಲ್ಲ.