ಮುಂಬೈ: ಐಪಿಎಲ್ ಶುರುವಾದ ಮೇಲೆ ಭಾರತೀಯ ಕ್ರಿಕೆಟ್ ಅಭಿಮಾನಿಗಳಿಗೆ ಹೊಸ ಸಮಸ್ಯೆ ಶುರುವಾಗಿದೆ. ತಮ್ಮ ನೆಚ್ಚಿನ ಆಟಗಾರರು ಬೇರೆ ಬೇರೆ ತಂಡದಲ್ಲಿ ಇರುವುದರಿಂದ ಯಾವ ತಂಡವನ್ನು ಸಪೋರ್ಟ್ ಮಾಡಬೇಕು ಎಂಬ ಗೊಂದಲಕ್ಕೆ ಒಳಗಾಗುತ್ತಾರೆ. ಅಂತಹದೇ ಒಂದು ತಮಾಷೆ ಘಟನೆ ಬುಧವಾರ ಚೆನ್ನೈ- ಮುಂಬೈ ನಡುವಣ ಪಂದ್ಯದಲ್ಲಿ ನಡೆದಿದೆ.
ಚೆನ್ನೈ ಸೂಪರ್ ಕಿಂಗ್ಸ್ ಮತ್ತು ಮುಂಬೈ ಇಂಡಿಯನ್ಸ್ ನಡುವಿನ ಪಂದ್ಯ ಬುಧವಾರ ಮುಂಬೈ ನ ವಾಂಖೆಡೆ ಕ್ರೀಡಾಂಗಣದಲ್ಲಿ ನಡೆದಿತ್ತು. ಕ್ರೀಡಾಂಗಣ ಕಿಕ್ಕಿರಿದು ನೆರೆದಿತ್ತು. ಸಹಜವಾಗೆ ತವರು ತಂಡ ಮುಂಬೈ ಇಂಡಿಯನ್ಸ್ ಅಭಿಮಾನಿಗಳು ಹೆಚ್ಚೇ ಇದ್ದರು. ಅವರ ನಡುವೆ ಒಬ್ಬ ಇದ್ದ ಧೋನಿ ಭಕ್ತ. ಇವನೀಗ ತನ್ನ ಅಭಿಮಾನದಿಂದಲೇ ದೇಶದಲ್ಲಿ ಮನೆಮಾತಾಗಿದ್ದಾನೆ.
ಬುಧವಾರದ ಪಂದ್ಯ ನೋಡಲು ಬಂದಿದ್ದ ಆ ಅಭಿಮಾನಿ ಮುಂಬೈ ನಿವಾಸಿ ಇರಬೇಕು. ಹಾಗಾಗಿ ಮುಂಬೈ ಇಂಡಿಯನ್ಸ್ ತಂಡವನ್ನು ಬೆಂಬಲಿಸುತ್ತಿದ್ದ. ಮ್ಯಾಚ್ ನೋಡಲು ಬರುವಾಗ ಮುಂಬೈ ಇಂಡಿಯನ್ಸ್ ಜೆರ್ಸಿ ಹಾಕಿಕೊಂಡೇ ಬಂದಿದ್ದ. ಆದರೆ ಕುತೂಹಲದ ವಿಷಯವೇನೆಂದರೆ ಆತ ಮಹೇಂದ್ರ ಸಿಂಗ್ ಧೋನಿ ಅಭಿಮಾನಿ ಕೂಡಾ. ಆದರೆ ಧೋನಿ ಆಡುತ್ತಿರುವುದು ಚೆನ್ನೈ ಸೂಪರ್ ಕಿಂಗ್ಸ್ ತಂಡದಲ್ಲಿ. ಅದೂ ಮುಂಬೈ ವಿರುದ್ಧ. ಈ ಇಕ್ಕಟ್ಟಿನ ಪರಿಸ್ಥಿತಿಯಲ್ಲಿ ಯಾವ ತಂಡವನ್ನು ಸಪೋರ್ಟ್ ಮಾಡಬೇಕೆಂಬ ಧರ್ಮಸಂಕಟಕ್ಕೆ ಒಳಗಾದ ಆತ ಒಂದು ಉತ್ತಮ ಉಪಾಯ ಮಾಡಿದ್ದ.
ಮೊದಲೇ ಹೇಳಿದಂತೆ ಆತ ಮುಂಬೈ ಇಂಡಿಯನ್ಸ್ ತಂಡದ ಜೆರ್ಸಿಯನ್ನು ಹಾಕಿಕೊಂಡು ಬಂದಿದ್ದ. ಮುಂಬೈ ತಂಡಕ್ಕೆ ಬೆಂಬಲ ಮಾಡುತ್ತಿದ್ದ. ಆದರೆ ಯಾವಾಗ ಮಹೇಂದ್ರ ಸಿಂಗ್ ಧೋನಿ ಬ್ಯಾಟಿಂಗ್ ಗೆ ಇಳಿದರೋ ಆಗ ತಾನು ಮೊದಲೇ ತಂದಿದ್ದ ಧೋನಿ ಹೆಸರಿನ ಚೆನ್ನೈ ಸೂಪರ್ ಕಿಂಗ್ಸ್ ಜೆರ್ಸಿಯನ್ನು ಮುಂಬೈ ಜೆರ್ಸಿಯ ಮೇಲೆಯೇ ಹಾಕಿ ಧೋನಿಗೆ ಬೆಂಬಲ ಸೂಚಿಸಿದರು. ಆದರೆ ಧೋನಿ ಔಟಾದ ನಂತರ ಧೋನಿ ಹೆಸರಿನ ಜೆರ್ಸಿಯನ್ನು ತೆಗೆದು ಮತ್ತೆ ಮುಂಬೈ ತಂಡಕ್ಕೆ ಬೆಂಬಲ ಕೊಟ್ಟರು. ಸದ್ಯ ಈ ಅಭಿಮಾನಿ ಮಹಾಶಯನ ವಿಡಿಯೋ ಸಿಕ್ಕಾಪಟ್ಟೆ ವೈರಲ್ ಆಗುತ್ತಿದೆ.
