ವಾಷಿಂಗ್ಟನ್‌ : ಕೋವಿಡ್ ಸೋಂಕಿಗೆ ಕಡಿವಾಣ ಹಾಕಲು ಶತ ಪ್ರಯತ್ನ ನಡೆಯುತ್ತಿದೆ. ಈ ನಡುವೆ ಹೂಸ್ಟನ್‌ ವಿಶ್ವವಿದ್ಯಾಲಯದ ಸಂಶೋಧಕರು ಕೋವಿಡ್-19 ವೈರಾಣುವನ್ನು ಮಟ್ಟ ಹಾಕಲು ಏರ್‌ಫಿಲ್ಟರ್‌ ವಿನ್ಯಾಸಗೊಳಿಸಿದೆ. “ಕ್ಯಾಚ್‌ ಅಂಡ್‌ ಕಿಲ್‌” ಫಿಲ್ಟರ್‌ಅನ್ನು ವಿಶ್ವವಿದ್ಯಾಲಯದ ಟೆಕ್ಸಾಸ್‌ ಸೆಂಟರ್‌ಫಾರ್‌ ಸೂಪರ್‌ ಕಂಡಕ್ಟಿವಿಟಿಯ ನಿರ್ದೇಶಕ ಝಿಫೆಂಗ್‌ ರೆನ್‌ ಈ ಫಿಲ್ಟರ್‌ ವಿನ್ಯಾಸಗೊಳಿಸಿದ್ದು, ತತ್‌ಕ್ಷಣವೇ ವೈರಾಣು ಕೊಲ್ಲುತ್ತದೆ ಎಂದು ಹೇಳಿಕೊಂಡಿದ್ದಾರೆ.
ಹೂಸ್ಟನ್‌ ಮೂಲದ ವೈದ್ಯಕೀಯ ರಿಯಲ್‌ ಎಸ್ಟೇಟ್‌ ಅಭಿವೃದ್ಧಿ ಸಂಸ್ಥೆ ಮತ್ತು ಇತರ ಸಂಶೋಧಕರಾದ ಮೆಡಿಸ್ಟಾರ್‌ನ ಸಿಇಒ ಮೊಂಜರ್‌ಹೌರಾನಿ ಈ ಸಂಶೋಧನೆಗೆ ಸಹಕರ ನೀಡಿದ್ದು, ಗ್ಯಾಲ್ವೆಸ್ಟನ್‌ ನ್ಯಾಷನಲ್‌ ಲ್ಯಾಬೊರೇಟರಿಯಲ್ಲಿ ನಡೆದ ವೈರಸ್‌ ಪರೀಕ್ಷೆಯಲ್ಲಿ ಕೋವಿಡ್-19ಕ್ಕೆ ಕಾರಣವಾಗುವ ವೈರಸ್‌ 99.8 ಶೇಕಡಾದಷ್ಟು ನಾಶವಾಗಿದೆ.
392 ಡಿಗ್ರಿ ಫ್ಯಾರನ್‌ ಹೀಟ್‌ಗೆ ಬಿಸಿಮಾಡಿದ ನಿಕಲ್‌ ಫೋಮ್‌ ನಿಂದ ತಯಾರಿಸಿದ ಫಿಲ್ಟರ್‌ಮೂಲಕ ವೈರಸ್‌ ಕೊಲ್ಲಲ್ಪಟ್ಟಿದೆ ಎಂದು ಸಂಶೋಧಕರು ವರದಿ ಮಾಡಿದ್ದಾರೆ. ಈ ಕುರಿತು ಮಾತನಾಡಿದ ಝಿಫೆಂಗ್‌ ರೆನ್‌, ಕೋವಿಡ್-19 ಹರಡುವುದನ್ನು ತಡೆಯಲು ಈ ಫಿಲ್ಟರ್‌ವಿಮಾನ ನಿಲ್ದಾಣಗಳು, ವಿಮಾನಗಳು, ಕಚೇರಿ ಕಟ್ಟಡಗಳು, ಶಾಲೆಗಳು ಮತ್ತು ಹಡಗುಗಳಲ್ಲಿ ಉಪಯುಕ್ತವಾಗಲಿವೆ ಎಂದು ಹೇಳಿದರು.
“ಮೆಡಿಸ್ಟಾರ್‌ಅಧಿಕಾರಿಗಳು ಡೆಸ್ಕ್ – ಟಾಪ್‌ ಮಾದರಿಯ ಏರ್‌ಫಿಲ್ಟರ್‌ವಿನ್ಯಾಸಗೊಳಿಸುವ ಕುರಿತು ಪ್ರಸ್ತಾಪಿಸಿದ್ದು, ಇದು ಕಚೇರಿಗಳಲ್ಲಿ ಗಾಳಿ ಶುದ್ಧೀಕರಿಸುವ ಸಾಮರ್ಥ್ಯ ಹೊಂದಿದೆ ವೈರಸ್‌ 70 ಡಿಗ್ರಿ ಸೆಲ್ಸಿಯಸ್‌ಗಿಂತ ಹೆಚ್ಚಿನ ತಾಪಮಾನದಲ್ಲಿ ಬದುಕಲು ಸಾಧ್ಯವಿಲ್ಲ. ಆದ್ದರಿಂದ ಬಿಸಿಯಾದ ಫಿಲ್ಟರ್‌ ಬಳಸಿ ವೈರಸ್‌ಗಳನ್ನು ಕೊಲ್ಲಲಾಗಿದೆ ಎಂದು ಸಂಶೋಧಕರು ಹೇಳಿದ್ದಾರೆ.
