ಛತ್ತೀಸ್‌ಗಢ: ಟೀಮ್‌ ಇಂಡಿಯಾದ ಮಾಜಿ ಕಪ್ತಾನ, ಚೆನ್ನೈ ಸೂಪರ್‌ ಕಿಂಗ್ಸ್‌ ನ ನಾಯಕ ಎಂ.ಎಸ್.ಧೋನಿ ಅವರನ್ನು ಇಷ್ಟಪಡದವರ ಸಂಖ್ಯೆ ಕಮ್ಮಿ. ಅವರ ಮೇಲಿನ ಅಭಿಮಾನ ಎಂಥದ್ದು ಎನ್ನುವುದು ಇತ್ತೀಚೆಗೆ ಮುಕ್ತಾಯ ಕಂಡ ಐಪಿಎಲ್‌ ನಲ್ಲಿ ಮತ್ತೊಮ್ಮೆ ಸಾಬೀತಾಗಿದೆ.
ಧೋನಿಯನ್ನು ಕಣ್ತುಂಬಿಕೊಳ್ಳಲು ಮಳೆಯನ್ನು ಲೆಕ್ಕಿಸದೇ ಕಾದು ಕೂತವರು, ರೈಲ್ವೇ ಸ್ಟೇಷನ್‌ ನಲ್ಲಿ ಮಲಗಿ ಕಾದ ಅನೇಕ ಅಭಿಮಾನಿಗಳಿದ್ದಾರೆ. ಈ ಅಭಿಮಾನಕ್ಕಾಗಿ ಧೋನಿಯೇ ಹೇಳಿದಂತೆ ಎಷ್ಟು ಥ್ಯಾಂಕ್ಸ್‌ ಹೇಳಿದರೂ ಕಮ್ಮಿಯೇ. ಅಭಿಮಾನಿಗಳಿಗಾಗಿ ಕಷ್ಟವಾದರೂ ಸರಿಯೇ ಇನ್ನೊಂದು ಸೀಸನ್‌ ಐಪಿಎಲ್‌ ಆಡಲು ಬಯಸುತ್ತೇನೆ ಎಂದು ಧೋನಿ ಫೈನಲ್‌ ಪಂದ್ಯದ ದಿನ ಹೇಳಿದ್ದಾರೆ.
ಇದನ್ನೂ ಓದಿ: ಹೊಸ ಇನ್ನಿಂಗ್ಸ್‌ ಆರಂಭಿಸಿದ ರುತುರಾಜ್: ಕ್ರಿಕೆಟ್ ಆಟಗಾರ್ತಿಯನ್ನೇ ವರಿಸಿದ CSK ಪ್ಲೇಯರ್
‘ತಲಾ’ ಅಭಿಮಾನಿಯೊಬ್ಬ ತನ್ನ ಮದುವೆಯ ಆಮಂತ್ರಣ ಪತ್ರಿಕೆಯಲ್ಲೂ ಧೋನಿಯನ್ನು ಮರೆತಿಲ್ಲ.!
ಹೌದು ಛತ್ತೀಸ್‌ಗಢದ ವ್ಯಕ್ತಿಯೊಬ್ಬ ತನ್ನ ಲಗ್ನ ಪತ್ರಿಕೆಯ ಎರಡೂ ಕಡೆ ಧೋನಿ ಅವರ ಜೆರ್ಸಿ ನಂ.7 ಹಾಗೂ ಅವರ ಫೋಟೋವನ್ನು ಪ್ರಿಂಟ್‌ ಮಾಡಿಸಿದ್ದಾನೆ. ಜೂ.7 ರಂದು ಈ ಮದುವೆ ನಡೆಯಲಿದ್ದು, ಮದುವೆ ಕಾರ್ಡ್‌ ನ್ನು ಧೋನಿ ಅವರಿಗೂ ಅಭಿಮಾನಿ ಕಳುಹಿಸಿದ್ದಾನೆ. ಟ್ವಿಟರ್‌ ನಲ್ಲಿ ಈ ಫೋಟೋ ಹಂಚಿಕೊಂಡಿದ್ದು, ಅಭಿಮಾನಿಗಳ ವಲಯದಲ್ಲಿ ವೈರಲ್ ಆಗಿದೆ.
ಇತ್ತೀಚೆಗೆ ಮುಂಬೈನ ಕೋಕಿಲಾಬೆನ್ ಆಸ್ಪತ್ರೆಯಲ್ಲಿ ಧೋನಿಗೆ ಮೊಣಕಾಲಿನ ಶಸ್ತ್ರಚಿಕಿತ್ಸೆಯನ್ನು ಯಶಸ್ವಿಯಾಗಿ ಮಾಡಲಾಗಿದೆ. ಮುಂದಿನ 6-7 ತಿಂಗಳು ಫಿಟ್‌ ಆಗಿದ್ದರೆ ಮುಂದಿನ ಸೀಸನ್‌ ನಲ್ಲಿ ಅಭಿಮಾನಿಗಳಿಗಾಗಿ ಆಡುವುದೆಂದು ಧೋನಿ ಹೇಳಿದ್ದಾರೆ.
