ವಿಜಯಪುರ: ಛತ್ರಪತಿ ಶಿವಾಜಿ ಅವರು ಸೀಮಾತೀತ ಹಾಗೂ ವಿಶ್ವಕ್ಕೆ ಮಾದರಿಯಾದ ಶ್ರೇಷ್ಠ ಮಹಾವೀರ. ಅಫ್ಜಲ್‌ ಖಾನ್‌ ಜೊತೆ ನಡೆದ ಯುದ್ಧದಲ್ಲಿ ಗುಂಡು ನಿರೋಧಕ ಜಾಕೆಟ್‌ ಧರಿಸಿ ಶಕ್ತಿ ಮತ್ತು ಯುಕ್ತಿಗೆ ಹೆಸರಾಗಿದ್ದರು. 17ನೇ ಶತಮಾನದಲ್ಲೇ ನೌಕಾಪಡೆ ವ್ಯವಸ್ಥೆ ರೂಪಿಸಿ ಭಾರತದ ನೌಕಾಪಡೆಯ ಪಿತಾಮಹರಾಗಿದ್ದಾರೆ. ಗೆರಿಲ್ಲಾ ಯುದ್ಧ ನೀತಿ ಪರಿಚಯಿಸಿದ್ದು, ಇಂದಿಗೂ ಪ್ರಸ್ತುತವಾಗಿವೆ. ಏಕ್‌ ಮಾರಾಠಾ, ಲಾಕ್‌ ಮಾರಾಠಾ ಎಂಬ ಹಿರಿಮೆ ಪಡೆದಿದ್ದಾರೆ ಎಂದು ಜಿಲ್ಲಾಧಿಕಾರಿ ವೈ.ಎಸ್. ಪಾಟೀಲ ಅಭಿಪ್ರಾಯಪಟ್ಟರು.
ಬುಧವಾರ ನಗರದ ಕಂದಗಲ್ಲ ಹನುಮಂತರಾಯ ಜಿಲ್ಲಾ ರಂಗಮಂದಿರದಲ್ಲಿ ಜಿಲ್ಲಾಡಳಿತ, ಜಿಪಂ ಹಾಗೂ ಕನ್ನಡ ಮತ್ತು ಸಂಸ್ಕೃತಿ ಇಲಾಖೆ ಸಹಯೋಗದಲ್ಲಿ ಹಮ್ಮಿಕೊಂಡಿದ್ದ ಛತ್ರಪತಿ ಶಿವಾಜಿ ಮಹಾರಾಜರ ಜಯಂತಿ ಕಾರ್ಯಕ್ರಮಕ್ಕೆ ಚಾಲನೆ ನೀಡಿ ಮಾತನಾಡಿದ ಅವರು, ಶಿವಾಜಿ ಮಹಾರಾಜ ವಿಭಿನ್ನ ಮತ್ತು ವಿಶೇಷ ಸಾಮರ್ಥ್ಯ ಹೊಂದಿದ್ದ ಅಪ್ರತಿಮ ಧೈರ್ಯ, ಶೌರ್ಯ, ಸಾಹಸ ಪರಾಕ್ರಮಿ ವೀರನಾಗಿದ್ದ. ರಾಣಾ ಪ್ರತಾಪರ ರೌದ್ರತೆ ಜೊತೆಗೆ ಚಾಣಕ್ಯನ ನೀತಿಯನ್ನೂ ಹೊಂದಿದ್ದರು ಎಂದರು.
ಮಹಾರಾಜರ ಸಂಪೂರ್ಣ ಜೀವನ ಚರಿತ್ರೆ, ಶೌರ್ಯ, ಪಾಂಡಿತ್ಯ, ವಿಚಾರಗಳನ್ನು ಅರಿತುಕೊಂಡು ಪರಿಪೂರ್ಣ ವ್ಯಕ್ತಿತ್ವವನ್ನು ಇಂದಿನ ಯುವಜನತೆ ರೂಪಿಸಿಕೊಳ್ಳಬೇಕು. ಯುದ್ಧ ಸಂದರ್ಭದಲ್ಲಿ ಮಹಿಳೆ, ಮಕ್ಕಳಿಗೆ ತೊಂದರೆ ಆಗದಂತೆ ನೋಡಿಕೊಳ್ಳುತ್ತಿದ್ದ ಅವರ ನಡೆಯೇ ಇಂದಿನ ಬೇಟಿ ಬಚಾವೋ ಬೇಟಿ ಪಡಾವೋ ಯೋಜನೆಗೆ ಪ್ರೇರಣೆ ಎನಿಸಿದೆ. ಬಾಲಕ ಶಿವಾಜಿಗೆ ಜೀಜಾಮಾತೆ ರಾಮಾಯಣ, ಮಹಾಭಾರತ ಕಥೆಗಳನ್ನು ಹಾಗೂ ಭಗವದ್ಗೀತೆ ಬೋಧಿಸಿದ್ದು, ಈ ಬೋಧನೆ ಬಾಲ ಶಿವಾಜಿ ಮನಸ್ಸಿನಲ್ಲಿ ಗಂಭೀರ ಪರಿಣಾಮ ಮೂಡಿಸಿದ್ದೇ ಶಿವಾಜಿ ಎಂಬ ವ್ಯಕ್ತಿ ಛತ್ರಪತಿ ಮಹಾರಾಜನಾಗಲು ಸಾಧ್ಯವಾಯಿತು. ಪ್ರಸ್ತುತ ದಿನದಲ್ಲಿ ದೇಶದ ಸಂಸ್ಕೃತಿ, ಪರಂಪರೆ, ಸಂಪ್ರದಾಯಗಳನ್ನು ಮಹಾಕಾವ್ಯಗಳ ಸಾರವನ್ನು ಪ್ರತಿಯೊಬ್ಬ ತಾಯಿ ತಮ್ಮ ಮಕ್ಕಳಿಗೆ ಮನವರಿಕೆ ಮಾಡಿಕೊಡುವ ಕೆಲಸ ಮಾಡಬೇಕು ಎಂದು ಸಲಹೆ ನೀಡಿದರು.
ಎಸ್ಪಿ ಅನುಪಮ್‌ ಅಗರವಾಲ್‌ ಮಾತನಾಡಿ, ಹಿಂದೂ ರಾಷ್ಟ್ರಕ್ಕೆ ಶಿವಾಜಿ ಅವರ ಕೊಡುಗೆ ಅನುಪಮ. ಶಿವಾಜಿಯಂಥ ಅಪ್ರತಿಯ ವೀರ, ಶೂರ ರಾಜರು ತಮ್ಮ ಆಡಳಿತದಲ್ಲಿ ಜಾತಿ, ಮತ, ಧರ್ಮ ಎಂಬ ಬೇಧ ಭಾವ ಮಾಡದೆ ಅರ್ಹತೆಗೆ ತಕ್ಕಂತೆ ಎಲ್ಲರಿಗೂ ಹುದ್ದೆ ನೀಡಿದ್ದರು. ರೈತರಿಗಾಗಿ ಹಲವಾರು ರೀತಿಯ ಕಂದಾಯ ಸುಧಾರಣೆಗಳನ್ನು ಜಾರಿಗೆ ತಂದು ಉತ್ತಮ ಆಡಳಿತ ನಡೆಸಿದರು.
ಹೀಗೆ ಅವರು ಮಾನವೀಯ ಮೌಲ್ಯಗಳನ್ನು ಎತ್ತಿ ತೋರಿಸಿದ್ದಾರೆ. ಯುವಕರು ಅವರ ತತ್ವಾದರ್ಶ ಅರಿತುಕೊಂಡು ಉತ್ತಮ ನಾಯಕತ್ವದ ಗುಣಗಳನ್ನು ಬೆಳೆಸಿಕೊಳ್ಳಬೇಕು ಎಂದರು.
ಉಪನ್ಯಾಸಕ ಮಂಜುನಾಥ ಜುನಗೊಂಡ ಮಾಯನಾಡಿ, ಭಾರತೀಯರ ಪಾಲಿಗೆ ಶಿವಾಜಿ ಹೃದಯ ಸಾಮ್ರಾಟನಾಗಿದ್ದರೂ ಇಸ್ಲಾಂ ಮತವನ್ನು ದ್ವೇಷಿಸಲಿಲ್ಲ. ಹೋರಾಟದ ಹಾದಿಯಲ್ಲಿ ಸಿಕ್ಕ ಕುರಾನ್‌ ಧರ್ಮ ಗ್ರಂಥಕ್ಕೆ ಗೌರವ ಸಲ್ಲಿಸಿದ್ದಲ್ಲದೇ ಹಾಗೂ ಇಸ್ಲಾಂ ಮಹಿಳೆಯರಿಗೆ ಗೌರವ ತೋರಿದ್ದಾರೆ. ಮತೀಯ ಸಹಿಷ್ಣುಗಳಾಗಿದ್ದ ಶಿವಾಜಿ ಮಹಾರಾಜರು ಇಂದಿನ ಆಡಳಿತಗಾರರಿಗೆ ಪ್ರೇರಣೆಯಾಗಲಿ ಎಂದರು.
ಬಡವರ, ರೈತರ, ಸ್ತ್ರೀ ಮತ್ತು ಮಕ್ಕಳ ಏಳ್ಗೆಗಾಗಿ ಶ್ರಮಿಸುತ್ತಿದ್ದರು. ಸಾಮ್ರಾಜ್ಯದ ವಿಸ್ತಾರದ ನೀತಿ ಹೊಂದಿರದೆ ಅತ್ಯುತ್ತಮ ಆಡಳಿತ ನಡೆಸಿದ್ದ ಶಿವಾಜಿ ಮಹಾರಾಜರ ಆದರ್ಶ ಪ್ರತಿಯೊಬ್ಬರಿಗೆ ಮಾದರಿಯಾಗಿ ಅಳವಡಿಸಿಕೊಂಡರೆ ಭಾರತ ವಿಶ್ವಗುರು ಆಗುವ ಕನಸು ನನಸಾಗುತ್ತದೆ ಎಂದರು.
ರಂಗಕರ್ಮಿ ಡಿ.ಎಚ್‌. ಕೋಲಾರ, ಮುತ್ತುರಾಜ, ಹನುಮಂತ ಕುಲಕರ್ಣಿ, ಮಂಜುಳಾ ಹಿಪ್ಪರಗಿ ಸಂಗಡಿಗರು ಮಾತೃ ವಾತ್ಸಲ್ಯದ ಪ್ರತೀಕ ನಾಟಕ ಪ್ರಸ್ತುತ ಪಡಿಸಿದರು. ರಾಮನಗೌಡ ಪಾಟೀಲ ಯತ್ನಾಳ, ವಿಜಯಕುಮಾರ ಚವ್ಹಾಣ, ಅರುಣ ಕದಂ, ರಾಜು ಜಾಧವ, ಪರಶುರಾಮ ರಜಪೂತ, ಶಂಕರ ಕನ್ಸೆ, ಶಿವಾಜಿ ಗಾಯಕವಾಡ, ಆನಂದ ಮಾಳೆ, ಜ್ಯೋತಿಬಾ ಸಿಂಧೆ ಇದ್ದರು.
ನಿರ್ಮಲಾ ಥೀಟೆ ಹಾಗೂ ಸಂಗಡಿಗರು ನಾಡಗೀತೆ ಹಾಡಿದರು. ಕನ್ನಡ ಮತ್ತು ಸಂಸ್ಕೃತಿ ಇಲಾಖೆ ಸಹಾಯಕ ನಿರ್ದೇಶಕ ಮಹೇಶ ಪೋತದಾರ ಸ್ವಾಗತಿಸಿದರು. ಎಚ್‌.ಎ. ಮಮದಾಪುರ ನಿರೂಪಿಸಿದರು.
