ಬೆಂಗಳೂರು: ನಟ ವಿಜಯ್‌ ರಾಘವೇಂದ್ರ ಅವರು ಪತ್ನಿ ಸ್ಪಂದನಾ ಅವರನ್ನು ಕಳೆದುಕೊಂಡ ನೋವಿನಲ್ಲಿದ್ದಾರೆ. ಎಂದೂ ಮುಗಿಯದ ದುಃಖದಲ್ಲಿರುವ ವಿಜಯ್‌ ರಾಘವೇಂದ್ರ ಅವರೊಂದಿಗೆ ಒಂದು ವೇಳೆ ಪತ್ನಿ ಸ್ಪಂದನಾ ಇಂದು ಜೊತೆಯಲ್ಲಿದಿದ್ದರೆ 16ನೇ ವಿವಾಹ ವಾರ್ಷಿಕೋತ್ಸವದ ಸಂಭ್ರಮದಲ್ಲಿರುತ್ತಿದ್ದರು.
ಇಂದು (ಆಗಸ್ಟ್‌ 26 ರಂದು,ಶನಿವಾರ) ವಿಜಯ್‌ ರಾಘವೇಂದ್ರ ಹಾಗೂ ಸ್ಪಂದನಾ ಅವರ 16ನೇ ವಿವಾಹ ವಾರ್ಷಿಕೋತ್ಸವ. ಇಷ್ಟು ವರ್ಷ ವೈವಾಹಿಕ ದಿನಕ್ಕೆ ಜೊತೆಯಾಗಿರುತ್ತಿದ್ದ ಮಡದಿ ಅವರೊಂದಿಗೆ ಇನ್ನು ಮುಂದೆ ನೆನಪಾಗಿ ಮಾತ್ರ ಉಳಿದಿದ್ದಾರೆ. ಥೈಲ್ಯಾಂಡ್‌ ನಲ್ಲಿ ಆಗಸ್ಟ್‌ 6 ರಂದು ಹೃದಯಾಘಾತದಿಂದ ʼರಾಘುʼ ಪತ್ನಿ ಸ್ಪಂದನಾ ನಿಧನರಾದರು.
ತನ್ನ ಬದುಕಿನಲ್ಲಿ ಅತೀ ಹೆಚ್ಚು ಪ್ರೀತಿಸುತ್ತಿದ್ದ ಜೀವವನ್ನು ಕಳೆದುಕೊಂಡ ಮೇಲೆ ವಿಜಯ್‌ ರಾಘವೇಂದ್ರ ಅವರು ದುಃಖದ ಒಂಟಿತನದಲ್ಲಿ ಕುಗ್ಗಿದ್ದಾರೆ. ಪತ್ನಿ ಸ್ಪಂದನಾ ನೆನಪು ಅವರನ್ನು ಕಾಡುತ್ತಿದೆ. ಇತ್ತೀಚೆಗೆ ಪತ್ನಿ ಸ್ಪಂದನಾ ಅವರನ್ನು ನೆನೆದು “ನಿನ್ನನ್ನೇ ಉಸಿರಾಡುತ್ತಿದ್ದೇನೆ ಚಿನ್ನಾ..” ಎನ್ನುವ ಕೆಲ ಸಾಲುಗಳನ್ನು ಹಂಚಿಕೊಂಡಿದ್ದರು.
ಇದೀಗ ಇಂದು (ಆ.26 ರಂದು) ವಿವಾಹ ವಾರ್ಷಿಕ ದಿನದಂದು ಚಿನ್ನಾರಿ ಮುತ್ತ ಭಾವುಕ ಸಾಲುಗಳನ್ನು ಹಂಚಿಕೊಂಡಿದ್ದಾರೆ.
ʻʻಚಿನ್ನಾ ಇಣುಕು ನೋಟ ಬೀರಿ ಹೋದೆ ಬದುಕಿನ ಅಂಗಳದಲಿ… ಎಲ್ಲೆ ಮೀರಿ ಒಲವ ನೀಡಿದೆ ಎದೆಯ ಅಂತರಾಳದಲಿ… ಬದುಕನ್ನು ಕಟ್ಟಿ ಸರ್ವಸ್ವವಾದೆ. ಉಸಿರಲ್ಲಿ ಬೆರೆತು ಜೀವಂತವಾದೆ. ಮುದ್ದಾದ ನಗುವಿನಲ್ಲಿದ್ದಿದ್ದ ಶಕ್ತಿ ಪರ್ವತದಷ್ಟು. ಮರೆಯದೆ.. ತೊರೆಯದೆ ಎದೆಗೊತ್ತಿ ಪ್ರೀತಿಸುವೆ. ಶೌರ್ಯನಲ್ಲಿ ನಾನಿನ್ನ ಬಿಗಿದಪ್ಪುವಷ್ಟುʼʼ ಎಂದು ಪತ್ನಿ ಹಾಗೂ ಮಗ ಶೌರ್ಯನೊಂದಿಗಿನ ಫೋಟೋವೊಂದನ್ನು ಹಾಕಿ ಓದುವ ಸಾಲುಗಳನ್ನು ಹಂಚಿಕೊಂಡಿದ್ದಾರೆ.
ಕಾಫಿ ಡೇ ಒಂದರಲ್ಲಿ ಸ್ಪಂದನಾ ಹಾಗೂ ವಿಜಯ್‌ ರಾಘವೇಂದ್ರ ಮೊದಲ ಬಾರಿ ಭೇಟಿಯಾಗಿದ್ದರು. ಆ ಭೇಟಿಯ ಬಳಿಕ ನಂತರದ ಭೇಟಿಯಲ್ಲಿ ಇಬ್ಬರಲ್ಲಿ ಪ್ರೇಮ ಹುಟ್ಟಿತ್ತು. 2007 ರಲ್ಲಿ ಆ.26 ರಂದು ಇಬ್ಬರು ಹಿರಿಯರ ಸಮ್ಮುಖದಲ್ಲಿ ವಿವಾಹವಾಗಿದ್ದರು.
