ಮೂರು ತಾಸು ನಿದ್ದೆ ಹೋಯ್ತು ,ಕಣ್ತುಂಬ ನಿದ್ದೆ ಬಂತು

ಲಾಕ್‌ಡೌನ್‌ ಕೆಲವರಿಗೆ ಬೇಸರ ತರಿಸಿದರೆ, ಇನ್ನು ಕೆಲವರಿಗಂತೂ ಖುಷಿ ತರಿಸಿರುವುದು ಸುಳ್ಳಲ್ಲ. ಪ್ರತಿಯೊಬ್ಬರೂ ತಿಂಗಳಿಗೂ ಹೆಚ್ಚು ದಿನಗಳ ಕಾಲ ಲಾಕ್‌ಡೌನ್‌ ಹಿನ್ನೆಲೆಯಲ್ಲಿ ಮನೆಯಲ್ಲೇ ಇದ್ದಾರೆ. ಮಾತಾಡು, ಆಟ ಆಡು, ಮನೆಯವರನ್ನು ರಂಜಿಸು, ಟಿವಿಯಲ್ಲಿ ನ್ಯೂಸ್‌ ನೋಡು, ಸಿನಿಮಾ ನೋಡು ಹೀಗೆ ಕಾಲ ಕಳೆಯುವಂತಾಗಿದೆ. ಇದಕ್ಕೆ ಸಿನಿಮಾ ನಟ,ನಟಿಯರೂ ಹೊರತಲ್ಲ.

ಅದೇನೆ ಇರಲಿ, ಇಷ್ಟು ದಿನ ತುಂಬಾ ಬಿಝಿಯಾಗಿ, ಹೊರಗಡೆಯೇ ದುಡಿಯುತ್ತಿದ್ದ ಮಂದಿ ಮನೆಯವರ ಜೊತೆ ಇದ್ದಾರೆ. ಗಾಯಕ ವಿಜಯಪ್ರಕಾಶ್‌ ಅವರಂತೂ, ಸಿಕ್ಕಾಪಟ್ಟೆ ಬಿಝಿ ಇದ್ದವರು. ಹಾಡುವುದು, ರಿಯಾಲಿಟಿ ಶೋಗಳಲ್ಲಿ ಭಾಗವಹಿಸುವುದು ಸೇರಿದಂತೆ ಇತ್ಯಾದಿ ಕಾರ್ಯಕ್ರಮ ಕೊಡುವ ಮೂಲಕ ಬಿಝಿಯಾಗಿದ್ದರು. ಬೆಂಗಳೂರಿಗಿಂತ ಮುಂಬೈನಲ್ಲೇ ಹೆಚ್ಚು ಓಡಾಟ ನಡೆಸುತ್ತಿದ್ದ ಅವರಿಗೆ ಬಿಡುವಿರಲಿಲ್ಲ. ಮನೆಯವರಂತೂ ವಿಜಯಪ್ರಕಾಶ್‌ ಅವರು ಮನೆಯಲ್ಲಿ ಹೆಚ್ಚು ಸಮಯ ಸಿಗಲ್ಲ ಎಂಬ ಕಾರಣಕ್ಕೆ ಬೇಸರಗೊಂಡಿದ್ದೂ ಉಂಟು. ಆದರೆ, ಲಾಕ್‌ಡೌನ್‌ ಹಿನ್ನೆಲೆಯಲ್ಲಿ ವಿಜಯಪ್ರಕಾಶ್‌ ಈಗ ಮನೆ ಬಿಟ್ಟು ಎಲ್ಲೂ ಹೊರಗೆ ಹೋಗಿಲ್ಲ. ಮನೆಯಲ್ಲೆ ಅಮ್ಮ, ಪತ್ನಿ ಹಾಗು ಮಗಳ ಜೊತೆ ಕಾಲ ಕಳೆಯುತ್ತಿದ್ದಾರೆ.

ಅದರಲ್ಲೂ ಅವರು ದಿನಕ್ಕೆ ಸುಮಾರು 4 ತಾಸು ಮಾತ್ರ ನಿದ್ದೆ ಮಾಡುತ್ತಿದ್ದರಂತೆ. ಆದರೆ, ಈಗಂತೂ ಅವರು, ಕಣ್ತುಂಬಾ ನಿದ್ದೆ ಮಾಡುತ್ತಿದ್ದಾರಂತೆ. ಅಷ್ಟೇ ಅಲ್ಲ, ಅವರು ಕಾರ್ಯಕ್ರಮಗಳಿಗಾಗಿ ಹೊರಗಡೆ ಸುತ್ತಾಡುತ್ತಿದ್ದೇ ಹೆಚ್ಚು. ಹೋದಲೆಲ್ಲಾ ಹಲವು ರೆಸ್ಟೋರೆಂಟ್‌ಗಳಲ್ಲೇ ಊಟ ಮಾಡುತ್ತಿದ್ದರು. ಈಗ ಮನೆಯಲ್ಲಿ ಪತ್ನಿ ಮಾಡುವ ಅಡುಗೆ ರುಚಿ ಸವಿಯುವ ಮೂಲಕ ಹ್ಯಾಪಿಯಾಗಿದ್ದಾರಂತೆ. ಇನ್ನು, ವಿಜಯಪ್ರಕಾಶ್‌ ಮನೆಯಲ್ಲಿ ಸುಮ್ಮನೆ ಕೂರದೆ, ಪತ್ನಿಗೆ ಸಹಾಯ ಮಾಡಲು ಮನೆಯಲ್ಲಿ ಮಗಳ ಜೊತೆ ಕಸ ಗುಡಿಸುತ್ತಾರಂತೆ. ಇನ್ನು, ಮನೆಯವರೆಲ್ಲ ಸೇರಿ ಚೌಕಬಾರ ಆಡುತ್ತಿದ್ದಾರಂತೆ. ಇವೆಲ್ಲವನ್ನೂ ಅವರು ತಮ್ಮ ಇನ್‌ಸ್ಟಾಗ್ರಾಮ್‌ನಲ್ಲಿ ಹಂಚಿಕೊಳ್ಳುವ ಮೂಲಕ ಇಷ್ಟು ವರ್ಷಗಳಲ್ಲಿ ನಾನು ಫ್ಯಾಮಿಲಿ ಜೊತೆ ಇದ್ದು ಎಂಜಾಯ್‌ ಮಾಡುತ್ತಿರುವುದಾಗಿ ಹೇಳಿಕೊಂಡಿದ್ದಾರೆ.