ವಿದೇಶದಲ್ಲಿ ವಿಜಯೋತ್ಸವ: ವಿಜಯಪ್ರಕಾಶ್‌ ಹಾಡು ಸಂಭ್ರಮ

ಗಾಯಕ ವಿಜಯಪ್ರಕಾಶ್‌ ಆಗಾಗ ವಿದೇಶಗಳಿಗೆ ಹೋಗಿ ಅಲ್ಲಿ ಹಾಡುವ ಮೂಲಕ ಅಲ್ಲಿನ ಕನ್ನಡಿಗರನ್ನು ಖುಷಿಪಡಿಸುವುದು ಹೊಸದೇನಲ್ಲ. ಬಹಳ ವರ್ಷಗಳಿಂದಲೂ ಈ ಕೆಲಸ ಮಾಡುತ್ತಿರುವ ವಿಜಯಪ್ರಕಾಶ್‌, ಏಪ್ರಿಲ್‌, ಮೇ ತಿಂಗಳಲ್ಲೂ ಅಮೆರಿಕದ ಕನ್ನಡಿಗರ ಮನ ಸಂತಸಪಡಿಸುವಲ್ಲಿ ಯಶಸ್ವಿಯಾಗಿದ್ದಾರೆ.

ಇತ್ತೀಚೆಗೆ ತಮ್ಮ ತಂಡದೊಂದಿಗೆ ಅಮೆರಿಕಕ್ಕೆ ತೆರಳಿದ್ದ ವಿಜಯಪ್ರಕಾಶ್‌, ಕಸ್ತೂರಿ ಮೀಡಿಯಾ ಹಾಗೂ ಪಂಪ ಸ್ಟುಡಿಯೋ ಆಶ್ರಯದಲ್ಲಿ ಆಯೋಜಿಸಿದ್ದ “ವಿಜಯೋತ್ಸವ-2018′ ಕಾರ್ಯಕ್ರಮ ಯಶಸ್ವಿಯಾಗಿ ನೆರವೇರಿದೆ. ಅಮೆರಿಕದ ಹತ್ತು ವಿವಿಧ ತಾಣಗಳಲ್ಲಿ ಸಾವಿರಾರು ಸಂಗೀತ ಪ್ರಿಯರ ಮನಗೆಲ್ಲುವಂತಹ ಸಂಗೀತ ಕಾರ್ಯಕ್ರಮ ನಡೆಸಿಕೊಟ್ಟಿದ್ದಾರೆ.

ಕಳೆದ ಎರಡು ವರ್ಷಗಳ ಹಿಂದೆ ಸ್ಯಾನ್‌ಫ್ರಾನ್ಸಿಸ್ಕೋದಲ್ಲಿ ಯಶಸ್ವಿಯಾಗಿ ಸಂಗೀತ ಕಾರ್ಯಕ್ರಮ ನಡೆದಿತ್ತು. ಆ ಹಿನ್ನೆಲೆಯಲ್ಲಿ ಕ್ಯಾಲಿಫೋರ್ನಿಯಾ ಕನ್ನಡಿಗರಾದ ಬಿಂದು ಮಾಧವ, ರಘು ಹಾಲೂರು ಹಾಗೂ ಗೋವರ್ಧನ್‌ ಗೌಡ ಅವರು ಈ ಬಾರಿ ಅಮೆರಿಕದ ಹಲವು ಕಡೆ ನಡೆಸುವ ಮೂಲಕ ಅಲ್ಲಿನ ಕನ್ನಡಿಗರನ್ನು ಖುಷಿಪಡಿಸಿದ್ದಾರೆ.

ಸಂಗೀತ ಕಾರ್ಯಕ್ರಮ ನಡೆಸುವ ಮುನ್ನ ಸಾಕಷ್ಟು ಸಮಸ್ಯೆಗಳು ಎದುರಾದರೂ, ಬಿಂದು ಮಾಧವ, ರಘು ಹಾಲೂರು ಇತರರು ಯಶಸ್ವಿಯಾಗಿ ನಡೆಸಿಕೊಟ್ಟಿದ್ದಾರೆ. ಗಾಯಕ ವಿಜಯಪ್ರಕಾಶ್‌ ಅವರೊಂದಿಗೆ ಗಾಯಕಿ ಅನುರಾಧ ಭಟ್, ಅರುಣ್‌ ಕುಮಾರ್‌, ವೆಂಕಿ, ಹರ್ಷ, ಪ್ರವೀಣ್‌ ಅವರ ಹಾಡು ಅಲ್ಲಿನವರನ್ನು ಖುಷಿಪಡಿಸಿದೆ.