ಶುಕ್ರನ ಮೇಲೆ ನಮ್ಮದೇ ಅಧಿಕಾರ: ರಷ್ಯಾ

ಮಾಸ್ಕೋ: ಶುಕ್ರನಲ್ಲಿ ಇತ್ತೀಚೆಗೆ ಜೀವಿಗಳ ಅಸ್ತಿತ್ವಕ್ಕೆ ಪೂರಕವಾಗಬಲ್ಲ ವಾತಾವರಣವಿದೆ ಎಂದು ಅಮೆರಿಕದ ಖಗೋಳ ಸಂಶೋಧಕರು ಪ್ರಕಟಿಸಿದ ಬೆನ್ನಲ್ಲೇ, ರಷ್ಯಾದ ಬಾಹ್ಯಾಕಾಶ ಸಂಶೋಧನಾ ಇಲಾಖೆಯ ಮುಖ್ಯಸ್ಥರು ಶುಕ್ರಗ್ರಹದ ಮೇಲೆ ರಷ್ಯಾದ ಅಧಿಕಾರವಿದೆ ಎಂದು ಹೇಳಿದ್ದಾರೆ.

ಮಾಸ್ಕೋದಲ್ಲಿ ಆಯೋಜಿಸಲಾಗಿರುವ ಕೈಗಾರಿಕಾ ವಸ್ತು ಪ್ರದರ್ಶನದಲ್ಲಿ ಮಾತನಾಡಿದ ರಷ್ಯಾ ಬಾಹ್ಯಾಕಾಶ ಇಲಾಖೆಯ ಮುಖ್ಯಸ್ಥ ಡಿಮಿಟ್ರಿ ರೊಝೊಜೆನ್‌, “”60, 70 ಹಾಗೂ 80ರ ದಶಕದಲ್ಲೇ ರಷ್ಯಾದ ವಿಜ್ಞಾನಿಗಳು ಶುಕ್ರವನ್ನು ಯಶಸ್ವಿಯಾಗಿ ಅಧ್ಯಯನ ಮಾಡಿದ್ದರು. ಹಾಗಾಗಿ, ಆ ಗ್ರಹದ ಮೇಲೆ ರಷ್ಯಾದ ಸ್ವಾಯತ್ತ ಅಧಿಕಾರವಿದೆ” ಎಂದಿದ್ದಾರೆ.

“”ಸದ್ಯದಲ್ಲೇ ರಷ್ಯಾದಿಂದ ಶುಕ್ರಗ್ರಹ ಅಧ್ಯಯನಕ್ಕಾಗಿಯೇ ವಿಶೇಷ ಅಧ್ಯಯನವೊಂದನ್ನು ಯಾವುದೇ ಅಂತಾರಾಷ್ಟ್ರೀಯ ನೆರವಿಲ್ಲದೆ ಆರಂಭಿಸಲಿದೆ. ಸದ್ಯಕ್ಕೆ ಅಮೆರಿಕದ ಸಹಕಾರದೊಂದಿಗೆ ವೆನೆರಾ-ಡಿ ಎಂಬ ಬಾಹ್ಯಾಕಾಶ ಸಂಶೋಧನೆಯನ್ನು ಕೈಗೊಳ್ಳಲಾಗಿದ್ದು, ಅದು ಮುಗಿದ ನಂತರ ಶುಕ್ರಗ್ರಹದ ಅಧ್ಯಯನವನ್ನು ರಷ್ಯಾ ಆರಂಭಿಸಲಿದೆ” ಎಂದು ಅವರು ತಿಳಿಸಿದ್ದಾರೆ.