ಡ್ರೋನ್‌ನಿಂದ ವೆನೆಜುವೆಲಾ ಅಧ್ಯಕ್ಷ ಮಡುರೊ ಹತ್ಯೆ ಯತ್ನ

ಸೇನಾ ಸಮಾರಂಭದಲ್ಲಿ ಭಾಗಿಯಾಗಿದ್ದಾಗ ಬಾಂಬ್‌ ದಾಳಿ
ಅಧ್ಯಕ್ಷ  ಮಡುರೊ ಪ್ರಾಣಾಪಾಯದಿಂದ ಅದೃಷ್ಟವಶಾತ್‌ ಪಾರು

ಕರಾಕಸ್‌: ಡ್ರೋನ್‌ ಮೂಲಕ ಬಾಂಬ್‌ ಸ್ಫೋಟಿಸಿ ವೆನೆಜುವೆಲಾ ಅಧ್ಯಕ್ಷ ನಿಕೋಲಸ್‌ ಮಡುರೊ ಅವರನ್ನು ಹತ್ಯೆಗೈಯ್ಯುವ ಸಂಚೊಂದು ವಿಫ‌ಲ ಗೊಂಡಿದ್ದು, ದೇಶದೆಲ್ಲೆಡೆ ಕಂಪನ ಸೃಷ್ಟಿಸಿದೆ. ಕರಾಕಸ್‌ನ ಕೇಂದ್ರ ಭಾಗದಲ್ಲಿ ಆಯೋಜಿಸಲಾಗಿದ್ದ ಸೇನೆಯ ಸಮಾರಂಭವೊಂದರಲ್ಲಿ ಭಾಗವಹಿಸಿದ್ದ ನಿಕೋಲಸ್‌, ವೇದಿಕೆಯಲ್ಲಿ ಭಾಷಣ ಮಾಡುತ್ತಿದ್ದಾಗ, ಸ್ಫೋಟಕ ಹೊತ್ತಿದ್ದ ಡ್ರೋನ್‌ ಒಂದು ಏಕಾಏಕಿ ಎಲ್ಲಿಂದಲೋ ಹಾರಿ ಬಂದು ವೇದಿಕೆ ಮುಂದೆ ಬಂದು ನಿಂತು ಸ್ಫೋಟಗೊಂಡಿದೆ. ಘಟನೆಯಲ್ಲಿ ಯಾರಿಗೂ ಪ್ರಾಣಾಪಾಯವಾಗಿಲ್ಲ. ಆದರೆ ಸುಮಾರು 12 ಮಂದಿ ಯೋಧರು ಗಾಯ ಗೊಂಡಿದ್ದಾರೆ. ಡ್ರೋನ್‌ ಸ್ಫೋಟಗೊಂಡ ಕೂಡಲೇ ಭದ್ರತಾ ಸಿಬ್ಬಂದಿಯು ಅಧ್ಯಕ್ಷರನ್ನು ಸ್ಯೂಟ್‌ಕೇಸ್‌ ಮಾದರಿಯ ರಕ್ಷಾಕವಚದ ಮೂಲಕ ರಕ್ಷಿಸಿದ ವೀಡಿಯೋ ಕೂಡ ಮಾಧ್ಯಮಗಳಲ್ಲಿ ಪ್ರಸಾರವಾಗಿವೆ.

ಘಟನೆಯ ಅನಂತರ, ರಾಷ್ಟ್ರೀಯ ಬಾನುಲಿ ಕೇಂದ್ರದ ಮೂಲಕ ಮಾತನಾಡಿದ ನಿಕೋ ಲಸ್‌, “”ನನ್ನನ್ನು ಡ್ರೋನ್‌ ಮೂಲಕ ಕೊಲ್ಲಲು  ಸಂಚು ರೂಪಿಸಿದ್ದರು. ಇದಕ್ಕೆ ಕೊಲಂಬಿಯಾ ಅಧ್ಯಕ್ಷ ಜುವಾನ್‌ ಮ್ಯಾನುಯೆಲ್‌ ಸ್ಯಾಟೋ ಸ್‌ ಅವರೇ ಕಾರಣ” ಎಂದು ಆರೋಪಿಸಿದ್ದಾರೆ. ಆದರೆ, ಸರಕಾರಿ ಮೂಲಗಳು  ಬಂಡುಕೋರರ ಕೈವಾಡವಿರಬಹುದೆಂದು ಹೇಳಿವೆ. ತನಿಖೆಗೆ ಆದೇಶಿಸಲಾಗಿದೆ.