ಮಧುಮೇಹ ನಿಯಂತ್ರಣಕ್ಕೆ ಸಸ್ಯಜನ್ಯ ಥೆರಪಿ

ಏನಿದು ಸಸ್ಯಜನ್ಯ ಥೆರಪಿ?: ಮಧುಮೇಹದಿಂದ ಬಳಲುವವರಿಗೆ ಕೆಲವೊಂದು ಸರಳ ವ್ಯಾಯಾಮ, ಪ್ರಾಣಿಜನ್ಯ ಆಹಾರ ಸೇವನೆಯಿಂದ ಜೀವಕೋಶಗಳ ಮೇಲೆ ಆಗಬಹುದಾದ ಪರಿಣಾಮಗಳ ಕುರಿತು ಸ್ಪಿಂಗ್‌ ಆಫ್ ಹೆಲ್ತ್ ಸಂಸ್ಥೆಯಲ್ಲಿ ತಿಳಿಸಿಕೊಡಲಾಗುತ್ತದೆ. ಜತೆಗೆ ಸಸ್ಯಜನ್ಯ ಆಹಾರ ಸೇವನೆಯಿಂದ ಆಗುವ ಪ್ರಯೋಜನ, ದೇಹಕ್ಕೆ ಲಘು ಪೋಷಕಾಂಶಗಳ ಕೊರತೆಯಿಂದ ಜೀವಕೋಶಗಳ ಮೇಲಾಗುವ ಪರಿಣಾಮಗಳ ಕುರಿತಾಗಿ ಮನವರಿಕೆ ಮಾಡಲಾಗುತ್ತದೆ. ಪ್ರಾಣಿಜನ್ಯ ಆಹಾರದಲ್ಲಿ ಮಾಂಸಾಹಾರ ಅಷ್ಟೇ ಅಲ್ಲ ಮೊಟ್ಟೆ, ಹಾಲಿನ ಉತ್ಪನ್ನಗಳೆಲ್ಲವೂ ಸೇರುತ್ತವೆ. ಇವುಗಳನ್ನು ಸಂಪೂರ್ಣವಾಗಿ ಬಿಡಿಸಲಾಗುತ್ತದೆ. ವಿವಿಧ ಹಸಿರು ಪಲ್ಯಗಳನ್ನು ಬಳಸಿ ತಯಾರಿಸುವ ಜ್ಯೂಸ್‌ನ್ನು ಉಪಹಾರ-ಊಟಕ್ಕಿಂತ ಮೊದಲು ಬೆಳಗ್ಗೆ ಹಾಗೂ ಸಂಜೆ ಸೇವಿಸಬೇಕಾಗಿದೆ. ಒಂದು ಲೀಟರ್‌ವರೆಗೂ ಇದನ್ನು ಸೇವಿಸಬಹುದಾಗಿದೆ. ಮುಖ್ಯವಾಗಿ ಪಾಲಕ್‌, ರಾಜಗಿರಿ, ಪುದಿನಾ, ಇನ್ನಿತರ ಪಲ್ಯ, ಸೈಂದರಲವಣ ಬಳಸಲಾಗುತ್ತದೆ. ಮೆಂತ್ಯೆ ಪಲ್ಯಯನ್ನು ಇದಕ್ಕೆ ಬಳಸುವುದಿಲ್ಲ. ಬೇಕಾದರೆ ಇದಕ್ಕೆ ಅರ್ಧದಷ್ಟು ಸೇಬು ಹಣ್ಣು ಬಳಸಬಹುದಾಗಿದೆ. ಈ ಜ್ಯೂಸ್‌ ಸೇವನೆಯಿಂದ ದೇಹದಲ್ಲಿನ ಆಮ್ಲ ವಾತಾವರಣ ನಿವಾರಣೆ ಆಗಲಿದೆಯಂತೆ. ಆಹಾರದಲ್ಲಿ ಅರ್ಧದಷ್ಟು ಕಚ್ಚಾ ಪದಾರ್ಥ ಅದು ತರಕಾರಿ, ಪಲ್ಯಗಳ ರೂಪದಲ್ಲಿ ಇರಬಹುದು, ಇನ್ನರ್ಧ ಬೇಳೆಯುಕ್ತ ಆಹಾರ ಒಳಗೊಂಡಿರಬೇಕು. ನವಣೆ ಸೇರಿದಂತೆ ಸಿರಿಧಾನ್ಯ ಬಳಸಿ ಮಾಡಿದ ಪದಾರ್ಥ ಇಲ್ಲವೆ ರೊಟ್ಟಿ, ಸಲಾಡ್‌, ಬೇಳೆಯ ಗಟ್ಟಿ ಸಾರು ಸೇವನೆ ಮಾಡಬಹುದಾಗಿದೆ.

6 ಸಾವಿರ ಜನರಿಗೆ ಪರಿಣಾಮ: ಪುಣೆಯ ಫ್ರೀಡಂ ಫಾರ್‌ ಡಯಾಬಿಟಿಕ್‌ ಕೇಂದ್ರದಡಿ ತರಬೇತಿ ಪಡೆದ ಸುಮಾರು 6,000ಕ್ಕೂ ಅಧಿಕ ಜನರು ಯಾವುದೇ ಮಾತ್ರೆ, ಇನ್ಸುಲಿನ್‌ ಇಲ್ಲದೆ ಮಧುಮೇಹ ನಿಯಂತ್ರಣದೊಂದಿಗೆ ಜೀವಿಸುತ್ತಿದ್ದಾರಂತೆ. ಅದೇ ರೀತಿ ಕಳೆದ ಒಂದೂವರೆ ವರ್ಷದಲ್ಲಿ ಹುಬ್ಬಳ್ಳಿಯಲ್ಲಿ ತರಬೇತಿ ಪಡೆದ ಸುಮಾರು 25ಕ್ಕೂ ಹೆಚ್ಚು ಜನರು ಯಾವುದೇ ಮಾತ್ರೆ, ಇನ್ಸುಲಿನ್‌ ಇಲ್ಲದೆ ಮಧುಮೇಹ ನಿಯಂತ್ರಣದಲ್ಲಿಟ್ಟುಕೊಂಡಿದ್ದಾರೆ. ಪುಣೆಯಲ್ಲಿನ ತರಬೇತಿಗೆ ಒಂದು ವಾರ ಅಲ್ಲಿಯೇ ಉಳಿಯಬೇಕು. ಹುಬ್ಬಳ್ಳಿಯಲ್ಲಿನ ತರಬೇತಿ ಪ್ರತಿ ಗುರುವಾರ ಹಾಗೂ ರವಿವಾರ ಬೆಳಗ್ಗೆ 10ರಿಂದ ಮಧ್ಯಾಹ್ನ 12 ಗಂಟೆವರೆಗೆ ನಡೆಯುತ್ತದೆ. ಎರಡು ತಾಸಿನಲ್ಲಿ ಬೇಸಿಕ್‌ ಮಾಹಿತಿ ನೀಡಲಾಗುತ್ತದೆ. ತರಬೇತಿಯಲ್ಲಿ ಹೇಳುವ ಜೀವನಶೈಲಿ, ಆಹಾರಕ್ರಮ ಹಾಗೂ ವ್ಯಾಯಾಮಗಳನ್ನು ಮನೆಗಳಲ್ಲಿ ಮುಂದುವರಿಸಬಹುದಾಗಿದೆ.