ಅನೀಶ್‌ ತೇಜೇಶ್ವರ್‌, “ಮಾಂಜ’ ಎಂಬ ಚಿತ್ರದಲ್ಲಿ ನಟಿಸುತ್ತಿರುವುದು ಗೊತ್ತಿರುವ ವಿಚಾರವೇ. ಈಗಾಗಲೇ ಆ ಚಿತ್ರದ ಎರಡು ಹಂತಗಳ ಚಿತ್ರೀಕರಣ ಮುಗಿದು, ಸದ್ಯದಲ್ಲೇ ಮೂರನೆಯ ಹಂತದ ಚಿತ್ರೀಕರಣ ಪ್ರಾರಂಭವಾಗಲಿದೆಯಂತೆ. ಈ ಮಧ್ಯೆ ಅವರು ಸದ್ದಿಲ್ಲದೆ ಒಂದು ಹೊಸ ಚಿತ್ರದಲ್ಲಿ ನಟಿಸುವುದಕ್ಕೆ ಸಜ್ಜಾಗಿದ್ದಾರೆ. ಮೇ ಮೊದಲ ವಾರದಲ್ಲಿ ಶುರುವಾಗಲಿರುವ ಈ ಚಿತ್ರದ ಹೆಸರೇನು ಗೊತ್ತಾ? “ವಾಸು – ನಾನ್‌ ಪಕ್ಕಾ ಕಮರ್ಷಿಯಲ್‌’ ಅಂತ.
ಈ ಚಿತ್ರದಲ್ಲಿ ಅನೀಶ್‌ ಬರೀ ಹೀರೋ ಅಷ್ಟೇ ಅಲ್ಲ, ಈ ಚಿತ್ರವನ್ನು ಅವರೇ ನಿರ್ಮಿಸುತ್ತಿದ್ದಾರೆ. ವಿಂಕ್‌ವಿಶಲ್‌ ಸ್ಟುಡಿಯೋಸ್‌ ಎಂಬ ಪ್ರೊಡಕ್ಷನ್‌ ಹೌಸ್‌ ಹುಟ್ಟುಹಾಕಿರುವ ಅನೀಶ್‌, ಆ ಸಂಸ್ಥೆಯ ಮೂಲಕ ಚಿತ್ರವನ್ನು ನಿರ್ಮಿಸುತ್ತಿದ್ದಾರೆ. “ನಿರ್ಮಾಣ ಮಾಡಬೇಕೆಂದು ಬಹಳ ದಿನಗಳಿಂದ ಆಸೆ ಇತ್ತು. ನನ್ನ ಸಿನಿಮಾ ಅಂದರೆ ನನಗೆ ಸ್ವಾತಂತ್ರ್ಯ ಇರುತ್ತದೆ. ಎಲ್ಲವೂ ನಮ್ಮ ಕೈಲೇ ಇರುತ್ತದೆ. ಹಾಗಾಗಿ ನಿರ್ಮಾಣಕ್ಕಿಳಿಯಬೇಕು ಎಂದು ಬಹಳ ದಿನಗಳಿಂದ ಆಸೆ ಇತ್ತು. ಅದು ಈ ಚಿತ್ರದ ಮೂಲಕ ಈಡೇರಿದೆ’ ಎನ್ನುತ್ತಾರೆ ಅವರು.
ಇನ್ನು “ಅಕಿರಾ’ ಚಿತ್ರತಂಡದಲ್ಲಿ ಅಜಿತ್‌ವಾಸನ್‌ ಅಂತ ಅಸೋಸಿಯೇಟ್‌ ಇದ್ದರಂತೆ. ಅವರಿಂದಲೇ ಈ ಚಿತ್ರ ಮಾಡಿಸುತ್ತಿದ್ದಾರೆ ಅನೀಶ್‌. “ನಾನು “ಅಕಿರಾ’ ಮಾಡಿದ ಸಂದರ್ಭದಲ್ಲಿ ಒನ್‌ಲೈನ್‌ ಹೇಳಿದ್ದರು ವಾಸನ್‌. ಬಹಳ ಹಿಡಿಸಿತ್ತು. ನಾನು ನಿರ್ಮಾಪಕನಾಗಬೇಕೆಂದುಕೊಂಡಾಗ, ಮೊದಲು ನೆನಪಾದವರೇ ಅವರು. ಅವರನ್ನು ಕರೆದೆ. ಅವರು ಸಿನಿಮಾ ಮಾಡೋಕೆ ಒಪ್ಪಿದರು. ಹೀಗೆ ಈ ಸಿನಿಮಾ ಶುರುವಾಯ್ತು. ಚಿತ್ರಕ್ಕೆ ಅವರೇ ಕಥೆ, ಚಿತ್ರಕಥೆ ಮತ್ತು ಸಂಭಾಷಣೆಗಳನ್ನ ರಚಿಸಿದ್ದಾರೆ.
ಚಿತ್ರಕ್ಕೆ ಅಜನೀಶ್‌ ಲೋಕನಾಥ್‌ ಸಂಗೀತ ಸಂಯೋಜಿಸಿದರೆ, ಶ್ರೀಕಾಂತ್‌ ಸಂಕಲನಕಾರರಾಗಿ ಕೆಲಸ ಮಾಡುತ್ತಿದ್ದಾರೆ. ಸದ್ಯಕ್ಕೆ ಪ್ರೀ-ಪ್ರೊಡಕ್ಷನ್‌ ಕೆಲಸಗಳು ನಡೆಯುತ್ತಿವೆ. ಮೇನಲ್ಲಿ ಚಿತ್ರ ಶುರುವಾಗಲಿದೆ. ಒಂದೇ ಹಂತದಲ್ಲಿ ಟಾಕಿ ಭಾಗದ ಚಿತ್ರೀಕರಣ ಮಾಡುವ ಯೋಚನೆಯಿದೆ’ ಎನ್ನುತ್ತಾರೆ ಅವರು. ಅಂದಹಾಗೆ, ಈ ಚಿತ್ರಕ್ಕೆ ಅವರಿಗೆ ನಾಯಕಿಯಾಗಿ ಸಂಯುಕ್ತಾ ಹೆಗ್ಡೆ ಆಯ್ಕೆಯಾಗಿದ್ದಾರೆ. “ಕಿರಿಕ್‌ ಪಾರ್ಟಿ’ಯಲ್ಲಿ ರಕ್ಷಿತ್‌ಗೆ ನಾಯಕಿಯಾಗಿದ್ದ ಸಂಯುಕ್ತಾಗೆ ಇದು ಎರಡನೆಯ ಚಿತ್ರ. ಉಳಿದ ಕಲಾವಿದರ ಆಯ್ಕೆ ಇನ್ನಷ್ಟೇ ಆಗಬೇಕು.
