ವೆನಿಲ್ಲಾ ಹುಡುಗ

ಸಿನಿಮಾದಲ್ಲಿ ಹೀರೋ ಆಗಬೇಕೆಂದು ಕನಸು ಕಾಣುವವರಿಗೇನು ಕಡಿಮೆಯಿಲ್ಲ. ಆದರೆ, ನನಸಾಗೋದು ಮತ್ತು ನನಸು ಮಾಡುವವರು ಕಡಿಮೆಯೇ. ಆದರೆ, ಅವಿನಾಶ್‌ ಮಾತ್ರ ಖುಷಿಯಾಗಿದ್ದಾರೆ. ಯಾವ ಅವಿನಾಶ್‌ ಎಂದು ಕೇಳಿದರೆ “ವೆನಿಲ್ಲಾ’ ಸಿನಿಮಾ ಬಗ್ಗೆ ಹೇಳಬೇಕು. ಜಯತೀರ್ಥ ನಿರ್ದೇಶನದ “ವೆನಿಲ್ಲಾ’ ಚಿತ್ರದಲ್ಲಿ ಅವಿನಾಶ್‌ ನಾಯಕರಾಗಿ ನಟಿಸಿದ್ದಾರೆ. ಈಗಾಗಲೇ ಚಿತ್ರದ ಆಡಿಯೋ ಬಿಡುಗಡೆಯಾಗಿದ್ದು, ಚಿತ್ರ ಸದ್ಯದಲ್ಲೇ ತೆರೆಗೆ ಬರಲಿದೆ. ಈ ಚಿತ್ರವನ್ನು ಅವಿನಾಶ್‌ ಅವರ ತಂದೆ ನಿರ್ಮಿಸಿದ್ದಾರೆ. ಕೆಲವರು ಮಕ್ಕಳ ಒತ್ತಾಯಕ್ಕೆ ಸಿನಿಮಾ ನಿರ್ಮಿಸುತ್ತಾರೆ. ಆದರೆ, ಅವಿನಾಶ್‌ ವಿಚಾರದಲ್ಲಿ ಇದು ಉಲ್ಟಾ. ಮಗನ ಟ್ಯಾಲೆಂಟ್‌ ನೋಡಿ ಅವಿನಾಶ್‌ ಅವರ ತಂದೆಯೇ ಆಸಕ್ತಿಯಿಂದ ಈ ಸಿನಿಮಾ ನಿರ್ಮಿಸಲು ಮುಂದಾದರಂತೆ. 

ಮೆಕ್ಯಾನಿಕಲ್‌ ಎಂಜಿನಿಯರಿಂಗ್‌, ಎಂಬಿಎ ಓದಿರುವ ಅವಿನಾಶ್‌ಗೆ ನಟನೆಯಲ್ಲಿ ಆಸಕ್ತಿ ಇದ್ದಿದ್ದರಿಂದ ನಟನಾಗೆ ಸೇರಿಕೊಂಡು ಅನೇಕ ಶೋಗಳನ್ನು ಕೊಟ್ಟರಂತೆ. ಅದೊಂದು ದಿನ ಇವರ ಶೋ, ಅದರಲ್ಲಿ ಅವಿನಾಶ್‌ ತೊಡಗಿಸಿಕೊಂಡ ರೀತಿಯಿಂದ ಖುಷಿಯಾದ ಇವರ ತಂದೆ ಇವರಿಗೆ ಹೇಳದೆಯೇ ನಿರ್ದೇಶಕ ಜಯತೀರ್ಥ ಅವರನ್ನು ಸಂಪರ್ಕಿಸಿ, ಸಿನಿಮಾ ಮಾಡಲು ಮುಂದಾಗಿದ್ದಾರೆ. ಅಂದಹಾಗೆ, “ವೆನಿಲ್ಲಾ’ದಲ್ಲಿ ಅವಿನಾಶ್‌ ಅವರ ಪಾತ್ರ ಅವರ ನಿಜ ಜೀವನಕ್ಕೆ ಹತ್ತಿರವಾಗಿದೆಯಂತೆ. ಇಲ್ಲೂ ಅವರು ಮೆಕ್ಯಾನಿಕಲ್‌ ಎಂಜಿನಿಯರ್‌ ಆಗಿಯೇ ಕಾಣಿಸಿಕೊಂಡಿದ್ದಾರೆ. 

ರವಿ ರೈ