ಡಿ.25ರಂದು ದಿವಂಗತ ಪ್ರಧಾನಿ ವಾಜಪೇಯಿ ಸ್ಮಾರಕ ಲೋಕಾರ್ಪಣೆ

ಹೊಸದಿಲ್ಲಿ : ಮಾಜಿ ಪ್ರಧಾನಿ ಅಟಲ್‌ ಬಿಹಾರಿ ವಾಜಪೇಯಿ ಸ್ಮರಣಾರ್ಥ ಇಲ್ಲಿನ ರಾಷ್ಟ್ರೀಯ ಸ್ಮತಿ ಸ್ಥಳದಲ್ಲಿ ನಿರ್ಮಿಸಲಾಗಿರುವ ಸ್ಮಾರಕವನ್ನು ನಾಳೆ ಮಂಗಳವಾರ ದೇಶಕ್ಕೆ ಲೋಕಾರ್ಪಣೆ ಮಾಡಲಾಗುವುದು. 

ರಾಷ್ಟ್ರಪತಿ ರಾಮನಾಥ್‌ ಕೋವಿಂದ್‌‌, ಪ್ರಧಾನಿ ನರೇಂದ್ರ ಮೋದಿ ಮತು ಇತರ ಗಣ್ಯರನೇಕರು ರಾಜಘಾಟ್‌ಗೆ ಸಮೀಪವಿರುವ ಈ ಸ್ಮಾರಕದಲ್ಲಿ ಪ್ರಾರ್ಥನಾ ಸಭೆಯಲ್ಲಿ ಪಾಲ್ಗೊಳ್ಳುವರು ಎಂದು ಈ ಸ್ಮಾರಕವನ್ನು ಅಭಿವೃದ್ದಿಪಡಿಸಿರುವ ಅಟಲ್‌ ಸ್ಮತಿ ನ್ಯಾಸ್‌ ಸೊಸೈಟಿ ತಿಳಿಸಿದೆ.

ಕೇಂದ್ರ ವಸತಿ ಮತ್ತು ನಗರಾಭಿವೃದ್ಧಿ ವ್ಯವಹಾರಗಳ ಸಚಿವಾಲಯವು ವಾಜಪೇಯಿ ಸ್ಮಾರಕ ನಿರ್ಮಾಣಕ್ಕಾಗಿ ಖಾಲಿ ನಿವೇಶನವನ್ನು ಒದಗಿಸಿತ್ತು ಎಂದು ಸೊಸೈಟಿ ಹೇಳಿದೆ. 

ವಾಜಪೇಯಿ ಅವರು ಕಳೆದ ಆಗಸ್ಟ್‌ ನಲ್ಲಿ ದಿಲ್ಲಿ ಏಮ್ಸ್‌ ಆಸ್ಪತ್ರೆಯಲ್ಲಿ ತಮ್ಮ 93ರ ಹರೆಯದಲ್ಲಿ ದೀರ್ಘ‌ಕಾಲದ ಅಸ್ವಾಸ್ಥದ ಬಳಿಕ ನಿಧನ ಹೊಂದಿದ್ದರು.