ಚಮೋಲಿ : ಆಳವಾದ ಕಮರಿಗೆ ಬಿದ್ದ ವಾಹನ ; 11 ಮಂದಿ ಬಲಿ

ಚಮೋಲಿ: ಉತ್ತರಾಖಂಡದ ಚಮೋಲಿ ಜಿಲ್ಲೆಯಲ್ಲಿ ಶುಕ್ರವಾರ (ನವೆಂಬರ್ 18) ನಡೆದ ದುರಂತವೊಂದರಲ್ಲಿ ಪ್ರಯಾಣಿಕರ ವಾಹನವೊಂದು ಆಳವಾದ ಕಮರಿಗೆ ಬಿದ್ದಿದ್ದು, ಇದು ಇಲ್ಲಿಯವರೆಗೆ ಹನ್ನೊಂದು ಜೀವಗಳನ್ನು ಬಲಿ ತೆಗೆದುಕೊಂಡಿದೆ, ಮೂವರು ಗಾಯಗೊಂಡಿದ್ದಾರೆ.

ಪೊಲೀಸ್ ವರದಿಗಳ ಪ್ರಕಾರ, ಉತ್ತರಾಖಂಡ್‌ನ ಜೋಶಿಮಠ ಪ್ರದೇಶದ ಉರ್ಗಾಮ್‌ನಲ್ಲಿ ಸಂಜೆ 4 ಗಂಟೆ ಸುಮಾರಿಗೆ ಘಟನೆ ನಡೆದಾಗ 16 ಪ್ರಯಾಣಿಕರು ವಾಹನದಲ್ಲಿದ್ದರು.

ಟಾಟಾ ಸುಮೋದಲ್ಲಿ ಹತ್ತಿದ ಪ್ರಯಾಣಿಕರು ಜೋಶಿಮಠದಿಂದ ಪಲ್ಲಾ ಜಖೋಲ್ ಗ್ರಾಮಕ್ಕೆ ತೆರಳುತ್ತಿದ್ದಾಗ ಅಪಘಾತ ಸಂಭವಿಸಿದೆ ಎಂದು ಡೆಹ್ರಾಡೂನ್‌ನಲ್ಲಿರುವ ರಾಜ್ಯ ತುರ್ತು ಕಾರ್ಯಾಚರಣೆ ಕೇಂದ್ರ ತಿಳಿಸಿದೆ. ಕ್ಷಣಾರ್ಧದಲ್ಲಿ ವಾಹನದಲ್ಲಿದ್ದ ಇಬ್ಬರು ವಾಹನದಿಂದ ಜಿಗಿದಿದ್ದಾರೆ ಎಂದು ಎಸ್ಪಿ ತಿಳಿಸಿದ್ದಾರೆ.

ಪೊಲೀಸರು ಮತ್ತು ರಾಜ್ಯ ವಿಪತ್ತು ನಿರ್ವಹಣಾ ಪಡೆ (ಎಸ್‌ಡಿಆರ್‌ಎಫ್) ತಂಡಗಳು ಸ್ಥಳಕ್ಕೆ ಧಾವಿಸಿದ್ದು, ರಕ್ಷಣಾ ಕಾರ್ಯಾಚರಣೆ ನಡೆಯುತ್ತಿದೆ. ಕಂದಕವು ಸುಮಾರು 300 ಮೀಟರ್ ಆಳದಲ್ಲಿದೆ ಮತ್ತು ವಾಹನದ ಅವಶೇಷಗಳು ಬಿದ್ದಿರುವ ಸ್ಥಳಕ್ಕೆ ತಲುಪುವುದು ಕಷ್ಟಕರವಾಗಿದೆ ಎಂದು ಪ್ರತ್ಯಕ್ಷದರ್ಶಿಯೊಬ್ಬರು ದೂರವಾಣಿಯಲ್ಲಿ ಪಿಟಿಐಗೆ ತಿಳಿಸಿದ್ದಾರೆ.

ವಾಹನದ ಮೇಲ್ಛಾವಣಿಯ ಮೇಲೆ ಕೆಲವು ಪ್ರಯಾಣಿಕರು ಸಹ ಕುಳಿತುಕೊಂಡಿದ್ದರಿಂದ ವಾಹನವು ಓವರ್‌ಲೋಡ್‌ ಆಗಿತ್ತು ಎಂದು ಹೇಳಲಾಗುತ್ತಿದೆ.