“ಎಸ್‌-400′ಹಾದಿ ಸುಗಮ! ಭಾರತದ ಮೇಲಿದ್ದ ನಿರ್ಬಂಧ ತೆರವು

ವಾಷಿಂಗ್ಟನ್‌: ರಷ್ಯಾದಿಂದ ಎಸ್‌-400 ಕ್ಷಿಪಣಿ ರಕ್ಷಣಾ ವ್ಯವಸ್ಥೆಯನ್ನು ಖರೀದಿಸುತ್ತಿರುವ ಭಾರತಕ್ಕೆ ಕಠಿಣ ನಿರ್ಬಂಧದಿಂದ ವಿನಾಯ್ತಿ ನೀಡುವ ಶಾಸನಾತ್ಮಕ ತಿದ್ದುಪಡಿಗೆ ಅಮೆರಿಕದ ಹೌಸ್‌ ಆಫ್ ರೆಪ್ರಸೆಂಟೇಟಿವ್ಸ್‌ ಧ್ವನಿಮತದ ಮೂಲಕ ಅಂಗೀಕಾರ ನೀಡಿದೆ.

ಚೀನದಂಥ ಆಕ್ರಮಣಕಾರಿ ದೇಶವನ್ನು ಎದುರಿಸುವ ಉದ್ದೇಶದಿಂದಲೇ ಭಾರತವು ಈ ವ್ಯವಸ್ಥೆಯನ್ನು ಖರೀದಿಸುತ್ತಿರುವುದರಿಂದ ವಿನಾಯ್ತಿ ನೀಡಲು ಅಮೆರಿಕ ಒಪ್ಪಿದೆ.

ಭಾರತೀಯ ಅಮೆರಿಕನ್‌ ಸಂಸದ ರೋ ಖನ್ನಾ ಅವರೇ ಈ ತಿದ್ದುಪಡಿ ವಿಧೇಯಕವನ್ನು ಮಂಡಿಸಿದ್ದಾರೆ. ಈಗ ಇದು ಅಂಗೀಕಾರಗೊಂಡಿರುವ ಕಾರಣ, ಭಾರತದ ವಿರುದ್ಧ ಅಮೆರಿಕವು ಕಾಟ್ಸಾ ಕಾಯ್ದೆ (ನಿರ್ಬಂಧಗಳ ಮೂಲಕ ಅಮೆರಿಕದ ವಿರೋಧಿಗಳನ್ನು ಎದುರಿಸುವ ಕಾಯ್ದೆ) ಅನ್ವಯ ಕ್ರಮ ಕೈಗೊಳ್ಳುವಂತಿಲ್ಲ.