Advertisement
ಅಮೆರಿಕ ಅಧ್ಯಕ್ಷ ಜೋ ಬೈಡೆನ್‌ ನೇತೃತ್ವದ ಸರಕಾರದ ಕ್ಲಿಷ್ಟಕರವಾದ ಬಜೆಟ್‌ ಪ್ರಕ್ರಿಯೆ ಮತ್ತು ಹಣಕಾಸು ನೀತಿಗಳಿಂದಾಗಿ ಜಗತ್ತಿನ ಪ್ರಮುಖ ರೇಟಿಂಗ್ಸ್‌ ಸಂಸ್ಥೆ ಫಿಚ್‌ ಆ ದೇಶದ ಅರ್ಥ ವ್ಯವಸ್ಥೆಗೆ ನೀಡಿದ್ದ ಟ್ರಿಪಲ್‌ ಎ (AAA) ರೇಟಿಂಗ್ಸ್‌ನಿಂದ ಎಎ ಪ್ಲಸ್‌ (AA+)ಗೆ ಇಳಿಕೆ ಮಾಡಿದೆ. ಸರಕಾರದಲ್ಲಿ ಹೆಚ್ಚುತ್ತಿರುವ ಸಾಲದ ಹೊರೆ ಮುಂದಿನ 3 ವರ್ಷಗಳಲ್ಲಿ ಬಿಗಡಾಯಿಸಲಿರುವ ಅರ್ಥ ವ್ಯವಸ್ಥೆಯಿಂದಾಗಿ ಈ ನಿರ್ಧಾರ ಕೈಗೊಳ್ಳಲಾಗಿದೆ ಎಂದಿದೆ.
ಅಂದ ಹಾಗೆ ಅಮೆರಿಕದ ಅರ್ಥ ವ್ಯವ ಸ್ಥೆಯ ರೇಟಿಂಗ್ಸ್‌ ತಗ್ಗಿಸಿದ್ದು ಮೊದಲಲ್ಲ. 2011ರಲ್ಲಿ ಸ್ಟಾಂಡರ್ಡ್‌ ಆ್ಯಂಡ್‌ ಪೂರ್‌ ಟ್ರಿಪಲ್‌ ಎ ರೇಟಿಂಗ್ಸ್‌ ಅನ್ನು ತಗ್ಗಿಸಿತ್ತು. ಆಗ ನಿರುದ್ಯೋಗ ಪ್ರಮಾಣ ಶೇ.9 ಆಗಿತ್ತು. ಪ್ರಸಕ್ತ ಸನ್ನಿವೇಶದಲ್ಲಿ ಶೇ.3.6 ಇದೆ. ಹೀಗಾಗಿ ಪರಿಸ್ಥಿತಿ ಉತ್ತಮವೇ ಎಂಬ ವಾದಗಳನ್ನು ಮುಂದಿಡಲಾಗುತ್ತಿದೆ. 22 ವರ್ಷಗಳಲ್ಲಿ ಅಧಿಕ
ಅಮೆರಿಕ ಹೊಂದುತ್ತಿರುವ ಸಾಲದ ಪ್ರಮಾಣ ವರ್ಷದಿಂದ ವರ್ಷಕ್ಕೆ ಏರಿಕೆಯಾಗುತ್ತಿದೆ. ಹೀಗಾಗಿ ಏರಿಕೆಯಾಗುತ್ತಿರುವ ಹಣದುಬ್ಬರ ನಿಯಂತ್ರಣಕ್ಕೆ ಫೆಡರಲ್‌ ರಿಸರ್ವ್‌ 22 ವರ್ಷಗಳಿಗೆ ಹೋಲಿಕೆ ಮಾಡಿದರೆ ಅಧಿಕವೆಂಬಂತೆ ಬಡ್ಡಿದರ ಏರಿಕೆ ಮಾಡಿತ್ತು. 2025ರ ವೇಳೆಗೆ ಅಮೆರಿಕದ ಸಾಲ ಪ್ರಮಾಣ ಅಲ್ಲಿನ ಜಿಡಿಪಿಯ ಶೇ.118ರ ವರೆಗೆ ಜಿಗಿಯಬಹುದು ಎಂದಿದೆ ಫಿಚ್‌.
Related Articles
ಅಂದಾಜು ಮಾಡಿದಂತೆ ಅತ್ಯಂತ ಕಳವಳಕಾರಿ ಎನ್ನಬಹುದಾದ ಪ್ರಭಾವ ಅಮೆರಿಕ ಮತ್ತು ಜಗತ್ತಿನ ಅರ್ಥ ವ್ಯವಸ್ಥೆಯ ಮೇಲೆ ಸದ್ಯಕ್ಕೆ ಬೀರಲಾರದು ಎಂಬ ವಾದಗಳು ಕೇಳಿ ಬಂದಿವೆ. ಆದರೆ ಅಮೆರಿಕ, ಯು.ಕೆ. ಸಹಿತ ಪ್ರಬಲ ಅರ್ಥ ವ್ಯವಸ್ಥೆಗಳ ಮೇಲೆ ಇರುವ ಆತಂಕದ ಛಾಯೆ ಇನ್ನೂ ಸರಿದಿಲ್ಲ ಎನ್ನುವುದು ಮತ್ತಷ್ಟು ಸ್ಪಷ್ಟವಾಗಿದೆ. ಹೀಗಾಗಿಯೇ ಭಾರತ ಸಹಿತ ಜಗತ್ತಿನ ಹಲವು ರಾಷ್ಟ್ರಗಳ ಷೇರು ಮಾರುಕಟ್ಟೆಗಳಲ್ಲಿ ಪದೇ ಪದೆ ಏರಿಳಿತಗಳು ಉಂಟಾಗುತ್ತಿವೆ.
Advertisement