ಯುಪಿಗೆ 7 ಹಂತ: ಬಿಜೆಪಿಗೆ ಲಕ್‌!

ನವದೆಹಲಿ: ಹಿಂದೂ ಧರ್ಮದಲ್ಲಿ 7ನೇ ಸಂಖ್ಯೆ ಶುಭ ಸೂಚಕವಾಗಿದ್ದು, ಉತ್ತರ ಪ್ರದೇಶದಲ್ಲಿ ಈ ಬಾರಿಯ ಲೋಕಸಭಾ ಚುನಾವಣೆಯೂ 7 ಹಂತಗಳಲ್ಲಿ ನಡೆಯುತ್ತಿರುವುದರಿಂದ ಆ ರಾಜ್ಯದಲ್ಲಿ ಬಿಜೆಪಿಗೆ ಈ ಬಾರಿ ಭಾರೀ ಅದೃಷ್ಟ ಒಲಿದುಬರಲಿದೆ” ಎಂದು ಉತ್ತರ ಪ್ರದೇಶ ಬಿಜೆಪಿಯ ಮಾಧ್ಯಮ ಸಂಚಾಲಕ ರಾಕೇಶ್‌ ತ್ರಿಪಾಠಿ ಅಭಿಪ್ರಾಯ ಪಟ್ಟಿದ್ದಾರೆ.

ರವಿವಾರ, ಮಾತನಾಡಿದ ಅವರು, “”ಸೂರ್ಯನ ಬೆಳಕು 7 ವರ್ಣಗಳನ್ನು ಒಳಗೊಂಡಿದೆ. ಸಂಗೀತವು ಸಪ್ತ ಸ್ವರಗಳಿಂದ ಕೂಡಿದೆ. ಹಿಂದೂಗಳ ಮದುವೆಯಲ್ಲಿ ಸಪ್ತಪದಿ ತುಳಿಯಲಾಗುತ್ತದೆ. ಹೀಗೆ, 7ನೇ ಅಂಕಿಗೆ ಹಿಂದೂಗಳ ಆಚರಣೆಯಲ್ಲಿ ಮಹತ್ವದ ಸ್ಥಾನವಿದೆ. ಬಿಜೆಪಿಗೂ ಸಹ 7ನೇ ಅಂಕಿ ಅದೃಷ್ಟ ಸಂಖ್ಯೆಯಾಗಿದ್ದು, 7 ಹಂತಗಳಲ್ಲಿ ನಡೆಯ ಲಿರುವ ಚುನಾವಣೆ ಪಕ್ಷದ ಪಾಲಿಗೆ ಅದೃಷ್ಟ ತರುತ್ತದೆ. ಇನ್ನು, ಈ 7 ಹಂತಗಳ ಮತದಾನ ಪಶ್ಚಿಮದಿಂದ ಶುರುವಾಗಿ ಪೂರ್ವದ ಕಡೆಗೆ (ಏರಿಕೆ ಕ್ರಮದಲ್ಲಿ) ಸಾಗುವುದೂ ಅದೃಷ್ಟದ ಸಂಕೇತವೇ ಆಗಿದೆ” ಎಂದಿದ್ದಾರೆ.