ಕೊಲೆ ಕೇಸಲ್ಲಿ ನಿರ್ಭೀತಿಯ ಸಾಕ್ಷಿ ನುಡಿದಾತನಿಗೆ ಪೊಲೀಸ್‌ ಪ್ರಶಸ್ತಿ

ಬುಲಂದ್‌ಶಹರ್‌, ಉ.ಪ್ರ.  : ಇಲ್ಲಿನ ಬರಾರಿ ಗ್ರಾಮದಲ್ಲಿ 9 ವರ್ಷಗಳ ಹಿಂದೆ ನಡೆದಿದ್ದ ಒಂದೇ ಕುಟುಂಬದ 9 ಮಂದಿಯ ಕೊಲೆ ಕೇಸಿನಲ್ಲಿ , ಜೀವ ಬೆದರಿಕೆ ಹಾಗೂ ಹಲ್ಲೆಯನ್ನು ಲೆಕ್ಕಿಸದೆ ಧೈರ್ಯದಿಂದ ಸಾಕ್ಷಿ ನುಡಿದಿದ್ದ ಅಮರ್‌ಪಾಲ್‌ ಲೋಧಿ ಎಂಬವರನ್ನು ಉತ್ತರ ಪ್ರದೇಶದ ಪೊಲೀಸ್‌ ಮಹಾ ನಿರ್ದೇಶಕ ಸೂರ್ಯ ಕುಮಾರ್‌ ಅವರು ಪ್ರಶಂಸಾ ಪತ್ರ ನೀಡಿ  ಶಾಲು ಹೊದೆಸಿ ಗೌರವಿಸಿದ್ದಾರೆ. 

9 ವರ್ಷಗಳ ಹಿಂದೆ ಬರಾರಿ ಗ್ರಾಮದ ಸುಖವೀರ್‌ ಸಿಂಗ್‌ ಎಂಬವರ ಕುಟುಂಬದ 9 ಮಂದಿಯನ್ನು  ಆಸ್ತಿ ವಿವಾದಕ್ಕೆ ಸಂಬಂಧಿಸಿದಂತೆ ಆತನ ನೆರೆಯವನಾಗಿದ್ದ ರಣವೀರ್‌ ಸಿಂಗ್‌ ಎಂಬಾತ ದಾರುಣವಾಗಿ ಕೊಂದಿದ್ದ. ಈ  ಕೇಸಿನಲ್ಲಿ ಲೋಧಿ ಪ್ರಮುಖ ಪ್ರಾಸಿಕ್ಯೂಶನ್‌ ಸಾಕ್ಷಿದಾರರಾಗಿದ್ದರು.  

ಪ್ರತಿಕೂಲ ಸನ್ನಿವೇಶದಲ್ಲೂ ಧೃತಿಗೆಡದೆ, ಪ್ರಾಣ ಭಯ ಲೆಕ್ಕಿಸದೆ, ತನ್ನ ಮೇಲಿನ ಮಾರಣಾಂತಿಕ ಹಲ್ಲೆಗೂ ಅಂಜದೆ, ಪ್ರಾಸಿಕ್ಯೂಶನ್‌ ಸಾಕ್ಷಿದಾರ ಲೋಧಿ ನಿರ್ಣಾಯಕ ಸಾಕ್ಷಿ ಹೇಳಿದ ಕಾರಣ ಆರೋಪಿ ರಣವೀರ್‌ ಸಿಂಗ್‌ಗೆ ನ್ಯಾಯಾಯಲವು ಮರಣ ದಂಡನೆಯನ್ನು ವಿಧಿಸಿತ್ತು.