‘ಬರ್ತ್‌ ಟೂರಿಸಂ’ಗೆ ಕಡಿವಾಣ : ಗರ್ಭಿಣಿಯರಿಗಿಲ್ಲ ವೀಸಾ?

ವಾಷಿಂಗ್ಟನ್‌: ವೀಸಾ ನಿರ್ಬಂಧ ಕ್ರಮ ಮುಂದುವರಿಸಿರುವ ಅಮೆರಿಕ ಅಧ್ಯಕ್ಷ ಟ್ರಂಪ್‌ ಈಗ ‘ಬರ್ತ್‌ ಟೂರಿಸಂ’ಗೆ ಕಡಿವಾಣ ಹಾಕಲು ಮುಂದಾಗಿದ್ದಾರೆ. ಅದರಂತೆ, ಗರ್ಭಿಣಿಯರು ಅಮೆರಿಕಕ್ಕೆ ಬಂದು, ಶಿಶುವಿಗೆ ಜನ್ಮ ನೀಡಿ ಸ್ವಾಭಾವಿಕವಾಗಿಯೇ ಆ ಮಗುವಿಗೆ ಅಮೆರಿಕದ ಪೌರತ್ವವನ್ನು ಪಡೆದುಕೊಳ್ಳುವ ವ್ಯವಸ್ಥೆಗೆ ಬ್ರೇಕ್‌ ಬೀಳಲಿದೆ.

ಹೆರಿಗೆಯ ಉದ್ದೇಶಕ್ಕೆಂದೇ ಅಮೆರಿಕಕ್ಕೆ ಬರುವುದನ್ನು ತಡೆಯಲು ಗರ್ಭಿಣಿಯರಿಗೆ ವೀಸಾ ನೀಡುವುದರ ಮೇಲೆ ಕಠಿನ ನಿಯಂತ್ರಣ ವ್ಯವಸ್ಥೆ ಹೇರಲು ನಿರ್ಧರಿಸಲಾಗಿದೆ. ಇನ್ನು ವೈದ್ಯಕೀಯ ಚಿಕಿತ್ಸೆಗೆ ಬರಲು ಬೇಕಾದ ನಿಯಮಗಳನ್ನು ಪಾಲಿಸುವ ರೀತಿಯಲ್ಲಿಯೇ ಗರ್ಭಿಣಿಯರಿಗೆ ವೀಸಾ ನೀಡುವುದರ ಬಗ್ಗೆ ನಿಯಮ ರೂಪಿಸಲು ಚಿಂತನೆ ನಡೆಸಲಾಗಿದೆ.