ಮೊಜಾಂಬಿಕ್‌ಗೆ 500 ಟನ್‌ ಆಹಾರ ರಫ್ತು

ನವದೆಹಲಿ: ಭಾರತದಿಂದ ಆಫ್ರಿಕಾದ ಮೊಜಾಂಬಿಕ್‌ಗೆ 500 ಟನ್‌ ಆಹಾರ ಉತ್ಪನ್ನ ಹೊತ್ತೂಯ್ದ ಐಎನ್‌ಎಸ್‌ ಕೇಸರಿ ಶನಿವಾರ ಮಪುಟೋ ಬಂದರು ತಲುಪಿದೆ. ಮಿಷನ್‌ ಸಾಗರ್‌(ಸೆಕ್ಯುರಿಟಿ ಅಂಡ್‌ ಗ್ರೋತ್‌ ಟು ಆಲ್‌ ರೀಜನ್‌) ಭಾಗವಾಗಿ ಆಹಾರ ಉತ್ಪನ್ನಗಳ ನ್ನು ಕಳುಹಿಸಿಕೊಡಲಾಗಿದೆ.

ಮೊಜಾಂಬಿಕ್‌ನಲ್ಲಿ ಕೊರೊನಾ ಸಾಂಕ್ರಾಮಿಕದಿಂದಾಗಿ ಉಂಟಾಗಿರುವ ಸಮಸ್ಯೆಗಳನ್ನು ಬಗೆಹರಿಸುವ ನಿಟ್ಟಿನಲ್ಲಿ ಆಹಾರ ಪದಾರ್ಥಗಳನ್ನು ಕಳುಹಿಸಿಕೊಡಲಾಗಿದೆ. ಅಲ್ಲಿನ ಸಶಸ್ತ್ರ ಪಡೆಯನ್ನು ಬಲಪಡಿಸಲು ಭಾರತ ಬದ್ಧವಾಗಿದೆ. ಸದ್ಯದಲ್ಲೇ ಐಎನ್‌ಎಸ್‌ ಕೇಸರಿಯು ಫಾಸ್ಟ್‌ ಇಂಟರ್‌ಸೆಪ್ಟರ್‌ ಕ್ರಾಫ್ಟ್ ಮತ್ತು ಸ್ವರಕ್ಷಣಾ ಸಾಧನಗಳನ್ನು ಮೊಜಾಂಬಿಕ್‌ಗೆ ಹೊತ್ತೂಯ್ಯಲಿದ್ದು, ಅಲ್ಲಿನ ಸೇನೆಗೆ ಹಸ್ತಾಂತರಿಸಲಾಗುವುದು ಎಂದು ವಿದೇಶಾಂಗ ಸಚಿವಾಲಯ ತಿಳಿಸಿದೆ.

ಈ ಹಿಂದೆ ಐಎನ್‌ಎಸ್‌ ಕೇಸರಿಯು ಇದೇ ರೀತಿಯ ಸೇವೆಯನ್ನು ಮಾಲ್ಡೀವ್ಸ್‌, ಮಾರಿಷಸ್‌ ಸೇರಿ ಅನೇಕ ರಾಷ್ಟ್ರಗಳಿಗೆ ಮಾಡಿದೆ.