ಸೋಲಿನ ಹಾದಿಯಲ್ಲಿದ್ದ ಆಸೀಸ್‌ ಕಿರಿಯರಿಗೆ ರೋಚಕ ಗೆಲುವು

ಕಿಂಬರ್ಲಿ: ಅಂಡರ್‌-19 ವಿಶ್ವಕಪ್‌ ಕ್ರಿಕೆಟ್‌ ಪಂದ್ಯಾವಳಿಯ ಗುರುವಾರದ ರೋಚಕ ಮುಖಾಮುಖೀಯಲ್ಲಿ ಆಸ್ಟ್ರೇಲಿಯ 2 ವಿಕೆಟ್‌ಗಳಿಂದ ಇಂಗ್ಲೆಂಡಿಗೆ ಸೋಲುಣಿಸಿದೆ.

ಇಂಗ್ಲೆಂಡ್‌ 7 ವಿಕೆಟಿಗೆ 252 ರನ್‌ ಪೇರಿ ಸವಾಲೊಡ್ಡಿದರೆ, ಆಸ್ಟ್ರೇಲಿಯ ಕೊನೆಯ ಎಸೆತದಲ್ಲಿ 8 ವಿಕೆಟ್‌ ನಷ್ಟದಲ್ಲಿ ಗೆಲುವಿನ ರನ್‌ ಬಾರಿಸಿತು. ಆಸ್ಟ್ರೇಲಿಯದ 8 ವಿಕೆಟ್‌ಗಳು 206ಕ್ಕೆ ಉದುರಿದಾಗ ಇಂಗ್ಲೆಂಡಿಗೆ ಗೆಲುವು ಖಾತ್ರಿಯಾಗಿತ್ತು. ಆದರೆ 9 ನೇ ವಿಕೆಟಿಗೆ ಜತೆಗೂಡಿದ ಕಾನರ್‌ ಸುಲ್ಲಿ (ಔಟಾಗದೆ 35) ಮತ್ತು ಟಾಡ್‌ ಮರ್ಫಿ (ಔಟಾಗದೆ 16) 47 ರನ್‌ ಪೇರಿಸಿ ಆಂಗ್ಲರ ಗೆಲುವಿನ ಕನಸನ್ನು ಛಿದ್ರಗೊಳಿಸಿದರು.

ವಿಂಡೀಸ್‌ ಜಯಭೇರಿ
ಇಲ್ಲೇ ನಡೆದ ಇನ್ನೊಂದು ಪಂದ್ಯದಲ್ಲಿ ವೆಸ್ಟ್‌ ಇಂಡೀಸ್‌ 246 ರನ್ನುಗಳ ಭಾರೀ ಅಂತರದಿಂದ ನೈಜೀರಿಯಾವನ್ನು ಮಣಿಸಿತು. ವಿಂಡೀಸ್‌ 8 ವಿಕೆಟಿಗೆ 303 ರನ್‌ ಬಾರಿಸಿದರೆ, ನೈಜೀರಿಯಾ 57 ರನ್ನಿಗೆ ಆಲೌಟ್‌ ಆಯಿತು.