ಐಪಿಎಲ್‌ ನಡೆಯದಿದ್ದರೆ ಧೋನಿ ನಿವೃತ್ತಿ?

ರಾಂಚಿ: ಕೋವಿಡ್-19 ವೈರಸ್‌ ಹಿನ್ನೆಲೆ ಯಲ್ಲಿ 13ನೇ ಆವೃತ್ತಿ ಐಪಿಎಲ್‌ (ಇಂಡಿಯನ್‌ ಪ್ರೀಮಿಯರ್‌ ಲೀಗ್‌) ಟಿ20 ಕೂಟ ನಡೆಯುವುದು ತೂಗುಯ್ನಾಲೆಯಲ್ಲಿದೆ. ಮುಂದೂಡಿಕೆ ಆಗಿರುವ ಕೂಟ ರದ್ದಾದರೂ ಅಚ್ಚರಿ ಇಲ್ಲ.

ಒಂದು ವೇಳೆ ಕೂಟ ರದ್ದುಗೊಂಡರೆ ಧೋನಿ ನಿವೃತ್ತಿಯಾಗುವ ಸಾಧ್ಯತೆ ಇದೆ ಎನ್ನಲಾಗಿದೆ. ಈ ಬಗ್ಗೆ ಮಾಧ್ಯಮಗಳಲ್ಲಿ ಸುದ್ದಿ ಹರಿದಾಡಿದೆ. ಧೋನಿ ಮುಂಬರುವ ಟಿ20 ವಿಶ್ವಕಪ್‌ ತಂಡದಲ್ಲಿ ಸ್ಥಾನ ಬಯಸಿದ್ದರು, ಐಪಿಎಲ್‌ ಮೂಲಕ ಪ್ರಚಂಡ ಫಾರ್ಮ್ ಪ್ರದರ್ಶಿಸಿ ತಂಡಕ್ಕೆ ವಾಪಸ್‌ ಆಗುವ ಚಿಂತನೆ ನಡೆಸಿದ್ದರು. ಆದರೆ ಐಪಿಎಲ್‌ ನಡೆಯದಿದ್ದರೆ ಧೋನಿ ವಿಶ್ವಕಪ್‌ ತಂಡದಲ್ಲಿ ಸ್ಥಾನ ಪಡೆಯುವುದು ಕಷ್ಟ. ಅವರು ನಿವೃತ್ತಿ ನೀಡುವುದು ಖಚಿತ ಎನ್ನಲಾಗಿದೆ.

ಆದರೆ ಆಸೀಸ್‌ ಸ್ಪಿನ್‌ ಬೌಲರ್‌ ಬ್ರಾಡ್‌ ಹಾಗ್‌ ಹೇಳುವುದೇ ಬೇರೆ, ಅವರ ಪ್ರಕಾರ ಧೋನಿ ಅವರು ಸದ್ಯಕ್ಕೆ ನಿವೃತ್ತಿ ತೆಗೆದುಕೊಳ್ಳುವುದಿಲ್ಲ ಎಂದಿದ್ದಾರೆ. ಮಾತ್ರವಲ್ಲ ಧೋನಿ ಅವರಲ್ಲಿ ಇನ್ನೂ 2 ವರ್ಷ ಕ್ರಿಕೆಟ್‌ ಆಡುವ ಸಾಮರ್ಥ್ಯ ಇದೆ ಎಂದು ಟ್ವಿಟರ್‌ನಲ್ಲಿ ತಿಳಿಸಿದ್ದಾರೆ.