ಪಾಕಿಸ್ಥಾನ ತಂಡಕ್ಕೆ ಮತ್ತೋರ್ವ ಅಫ್ರಿದಿ

ಲಾಹೋರ್‌: ಪಾಕಿಸ್ಥಾನ ತಂಡಕ್ಕೆ ಮತ್ತೋರ್ವ ಅಫ್ರಿದಿಯ ಪ್ರವೇಶವಾಗಿದೆ. ಶಾಹಿದ್‌ ಅಫ್ರಿದಿ, ಶಾಹೀನ್‌ ಶಾ ಅಫ್ರಿದಿ ಬಳಿಕ ಇದೀಗ ಎಡಗೈ ಸ್ಪಿನ್ನರ್‌ ಆಸಿಫ್ ಅಫ್ರಿದಿ ಸರದಿ.

ಆಸ್ಟ್ರೇಲಿಯ ವಿರುದ್ಧದ ಸೀಮಿತ ಓವರ್‌ ಪಂದ್ಯಗಳ ಸರಣಿಗಾಗಿ ಇವರನ್ನು ತಂಡಕ್ಕೆ ಸೇರಿಸಿಕೊಳ್ಳಲಾಗಿದೆ.

ಪಾಕಿಸ್ಥಾನ್‌ ಸೂಪರ್‌ ಲೀಗ್‌ನಲ್ಲಿ ನೀಡಿದ ಅತ್ಯುತ್ತಮ ಪ್ರದರ್ಶನ ಅಫ್ರಿದಿಗೆ ಲಾಭವಾಗಿ ಪರಿಣಮಿಸಿತು. ಅವರು ಮುಲ್ತಾನ್‌ ಸುಲ್ತಾನ್ಸ್‌ ಪರ   5 ಪಂದ್ಯಗಳಿಂದ 8 ವಿಕೆಟ್‌ ಉರುಳಿ ಸಿದ್ದರು. ವಿಕೆಟ್‌ ಕೀಪರ್‌ ಮೊಹಮ್ಮದ್‌ ಹ್ಯಾರಿಸ್‌ ಈ ತಂಡದ ಮತ್ತೋರ್ವ ಹೊಸ ಆಟಗಾರ.

ಸರಣಿಯಲ್ಲಿ 3 ಏಕದಿನ ಹಾಗೂ ಏಕೈಕ ಟಿ20 ಪಂದ್ಯವನ್ನು ಆಡಲಾಗುವುದು. ಏಕದಿನ ಪಂದ್ಯ ಮಾ. 29, 31 ಹಾಗೂ ಎ. 2ರಂದು; ಟಿ20 ಪಂದ್ಯ ಎ. 5ರಂದು ನಡೆಯಲಿದೆ. ಎಲ್ಲ ಪಂದ್ಯಗಳ ತಾಣ ರಾವಲ್ಪಿಂಡಿ.