ರಷ್ಯಾ ತಡೆಯುವ ಶಕ್ತಿ  ಐಸಿಜೆಗೆ ಉಂಟೇ?

ಉಕ್ರೇನ್‌ ಮೇಲಿನ ಯುದ್ಧವನ್ನು ತತ್‌ಕ್ಷಣ ನಿಲ್ಲಿಸುವಂತೆ ರಷ್ಯಾಕ್ಕೆ ಅಂತಾರಾಷ್ಟ್ರೀಯ ನ್ಯಾಯಾಲಯ (ಐಸಿಜೆ) ಆದೇಶ ನೀಡಿದೆ. ಆದರೆ ರಷ್ಯಾ ಈ ಆದೇಶವನ್ನು ಪಾಲಿಸಿಲ್ಲ.

ಐಸಿಜೆ ಆದೇಶವೇನು?  :

ಉಕ್ರೇನ್‌ನಲ್ಲಿ ರಷ್ಯಾ ನರಮೇಧ ಮಾಡುತ್ತಿದೆ, ಇದನ್ನು ನಿಲ್ಲಿಸಿ ಎಂದು ಐಸಿಜೆಗೆ ಉಕ್ರೇನ್‌ ಮನವಿ ಸಲ್ಲಿಸಿತ್ತು. ಈ ಕುರಿತ ವಿಚಾರಣೆ ಆರಂಭವಾದರೂ ರಷ್ಯಾ ಹಾಜರಾಗಲಿಲ್ಲ. ಕಡೆಗೆ ಅದು ಆದೇಶವೊಂದನ್ನು ನೀಡಿದ್ದು, ಈ ಕೂಡಲೇ ಯುದ್ಧ ನಿಲ್ಲಿಸಬೇಕು ಎಂದು ರಷ್ಯಾಗೆ ಸೂಚಿಸಿದೆ.

ಕಾರ್ಯವ್ಯಾಪ್ತಿ ಏನು? :

ಸಾಮಾನ್ಯವಾಗಿ ಈ ಅಂತಾರಾಷ್ಟ್ರೀಯ ಕೋರ್ಟ್‌ ಕೂಡ ವಿಶ್ವಸಂಸ್ಥೆಯ ಅಡಿಯಲ್ಲೇ ಬರುತ್ತದೆ. ನೆದರ್ಲೆಂಡ್‌ನ‌ ಹೇಗ್‌ನಲ್ಲಿ ಪ್ರಧಾನ ಕಚೇರಿ ಇದೆ. ಆದರೆ ವಿಶ್ವಸಂಸ್ಥೆಯ ಸದಸ್ಯ ರಾಷ್ಟ್ರಗಳೆಲ್ಲವೂ ಐಸಿಜೆಯ ವ್ಯಾಪ್ತಿಗೆ ಬರಲೇಬೇಕು ಅಂತೇನಿಲ್ಲ. ಆಯಾ ರಾಷ್ಟ್ರಗಳು ಐಸಿಜೆ ವ್ಯಾಪ್ತಿಗೆ ನಾವು ಬರುತ್ತೇವೆ ಎಂದು ಒಪ್ಪಿಗೆ ನೀಡಬೇಕು. ಸದ್ಯ 73 ದೇಶಗಳು ಮಾತ್ರ ಐಸಿಜೆ ಸದಸ್ಯತ್ವ ಹೊಂದಿವೆ.

ರಷ್ಯಾ-ಉಕ್ರೇನ್‌ ಸೇರಿವೆಯೇ? :

ರಷ್ಯಾ ವಿರುದ್ಧ ಉಕ್ರೇನ್‌ ಐಸಿಜೆಗೆ ಅರ್ಜಿ ಸಲ್ಲಿಸಿದೆ. ಆದರೆ ಈ ಎರಡೂ ದೇಶಗಳು ಐಸಿಜೆಯ ಸದಸ್ಯತ್ವ ಹೊಂದಿಲ್ಲ. ಆದರೂ ಉಕ್ರೇನ್‌, 1948ರ ಪ್ರಕರಣವೊಂದನ್ನು ಉಲ್ಲೇಖೀಸಿ, ನಮ್ಮ ದೇಶದಲ್ಲಿ ನರಮೇಧವಾಗುತ್ತಿದೆ, ನಿಲ್ಲಿಸಿ ಎಂದು ಅರ್ಜಿ ಸಲ್ಲಿಸಿದೆ.

ಆದೇಶ ಪಾಲಿಸದಿದ್ದರೆ ಏನಾಗುತ್ತದೆ? :

ಈ ಎರಡೂ ಅಂತಾರಾಷ್ಟ್ರೀಯ ಕೋರ್ಟ್‌ನ ಸದಸ್ಯ ರಾಷ್ಟ್ರವಾಗಿಲ್ಲದೇ ಇರುವುದರಿಂದ ಆದೇಶ ಪಾಲಿಸದಿದ್ದರೆ ಏನಾಗುತ್ತದೆ ಎಂದು ಹೇಳುವುದು ಕಷ್ಟ. ವಿಶ್ವಸಂಸ್ಥೆಯ ಆರ್ಟಿಕಲ್‌ 94(1) ಪ್ರಕಾರ, ಐಸಿಜೆಯ ಆದೇಶವನ್ನು ಎರಡೂ ಕಡೆಯವರು ಪಾಲಿಸಬೇಕು. ಪಾಲಿಸದಿದ್ದರೆ, ವಿಶ್ವಸಂಸ್ಥೆಯ ಭದ್ರತಾ ಮಂಡಳಿಯ ಮೊರೆ ಹೋಗಬಹುದು.

ಯುಎನ್‌ಎಸ್ಸಿಯಲ್ಲಿ ನ್ಯಾಯ ಸಿಗುತ್ತದೆಯೇ? :

ಉಕ್ರೇನ್‌ ಪಾಲಿಗೆ ಇದು ಕಷ್ಟಸಾಧ್ಯ. ವಿಶ್ವಸಂಸ್ಥೆಯ ಭದ್ರತಾ ಮಂಡಳಿಯಲ್ಲಿ ರಷ್ಯಾ  ವಿಟೋ ಪವರ್‌ ಹೊಂದಿದೆ. ಅಲ್ಲಿಗೆ ಈ ಕೇಸ್‌ ಹೋದರೂ ಇದು ಜಾರಿಯಾಗದಂತೆ ತಡೆಯುವ ಶಕ್ತಿ ರಷ್ಯಾಕ್ಕಿದೆ. ಹೀಗಾಗಿ ಪಾಲಿಸದಿದ್ದರೂ ರಷ್ಯಾಕ್ಕೆ ಏನೂ ನಷ್ಟವಿಲ್ಲ.