ತಾಂತ್ರಿಕ ದೋಷ: ಬ್ರಿಟನ್‌ನ ಅತಿದೊಡ್ಡ ಹಡಗಿನಲ್ಲಿ ಸಮಸ್ಯೆ

ಲಂಡನ್‌: ಯುನೈಟೆಡ್‌ ಕಿಂಗ್‌ಡಂನ ಅತಿದೊಡ್ಡ ವಿಮಾನವಾಹನ ನೌಕೆಯಾಗಿರುವ ಎಚ್‌ಎಂಎಸ್‌ ಪ್ರಿನ್ಸ್‌ ಆಫ್ ವೇಲ್ಸ್‌ನಲ್ಲಿ ತಾಂತ್ರಿಕ ದೋಷ ಕಂಡುಬಂದಿದೆ.

ಶನಿವಾರ ಬ್ರಿಟನ್‌ನ ಪೋರ್ಟ್ಸ್ ಮೌತ್‌ ನೌಕಾನೆಲೆಯಿಂದ ಅಮೆರಿಕದ ಕೆರಿಬಿಯನ್‌ ಬಂದರಿನತ್ತ ಸಂಚಾರ ಆರಂಭಿಸಿತ್ತು. ತಾಂತ್ರಿಕ ದೋಷಗಳು ಕಂಡುಬಂದ ಹಿನ್ನೆಲೆ ಹಡಗನ್ನು ದಕ್ಷಿಣ ಕರಾವಳಿಯ ಸಮರಾಭ್ಯಾಸ ಪ್ರದೇಶದಲ್ಲಿ ನಿಲ್ಲಿಸಿಕೊಂಡು ತಪಾಸಣೆ ನಡೆಸಲಾಗುತ್ತಿದೆ ಎಂದು ರಾಯಲ್‌ ನೇವಿ ತಿಳಿಸಿದೆ.

ಈ ಹಡಗು 65,000 ಟನ್‌ ತೂಕದ್ದಾಗಿದ್ದು, ಬರೋಬ್ಬರಿ 28 ಸಾವಿರ ಕೋಟಿ ರೂ. ವೆಚ್ಚದಲ್ಲಿ ತಯಾರಿಸಿರುವುದಾಗಿದೆ.

ಕಳೆದ ವರ್ಷವಷ್ಟೇ ಕಾರ್ಯಾಚರಣೆ ಆರಂಭಿಸಿರುವ ಈ ಹಡಗಿನಲ್ಲಿ ಒಂದು ವೇಳೆ ದೊಡ್ಡ ಮಟ್ಟದ ತಾಂತ್ರಿಕ ಸಮಸ್ಯೆಯಿದ್ದರೆ, ಅದು ರಾಯಲ್‌ ನೇವಿಗೆ ದೊಡ್ಡ ನಷ್ಟವಾಗಲಿದೆ ಎಂದು ತಿಳಿಸಲಾಗಿದೆ.