Ukraine: ಕ್ರೀಮಿಯಾದಲ್ಲಿ ರಷ್ಯಾ ಯುದ್ಧನೌಕೆ ಮೇಲೆ ಉಕ್ರೇನ್‌ ಕ್ಷಿಪಣಿ ದಾಳಿ

ಮಾಸ್ಕೋ: ಉಕ್ರೇನ್‌ನಲ್ಲಿ ರಷ್ಯಾ ವಶಪಡಿಸಿಕೊಂಡಿರುವ ಕ್ರೀಮಿಯಾ ಪ್ರದೇಶದಲ್ಲಿ ರಷ್ಯಾ ಯುದ್ಧ ನೌಕೆಯ ಮೇಲೆ ಉಕ್ರೇನ್‌ ವೈಮಾನಿಕ ದಾಳಿ ನಡೆಸಿದೆ. ಫಿಯೋಡೋಸಿಯಾ ನಗರದ ನೊವೋಚೆಕಾಸ್ಕ್ ನಲ್ಲಿ ಯುದ್ಧನೌಕೆಯ ಮೇಲೆ ಉಕ್ರೇನ್‌ ವಿಮಾನಗಳು ಕ್ಷಿಪಣಿ ದಾಳಿ ನಡೆಸಿವೆ ಎಂದು ರಷ್ಯಾ ರಕ್ಷಣಾ ಸಚಿವಾಲಯ ಹೇಳಿದೆ. ಅಲ್ಲದೇ, ಪ್ರತಿದಾಳಿಯಲ್ಲಿ ರಷ್ಯಾದ ಯುದ್ಧ ವಿಮಾನಗಳನ್ನು ಹೊಡೆದುರುಳಿಸಿರುವುದಾಗಿಯೂ ತಿಳಿಸಿದೆ.

ಹಡಗು ಯಾವ ಮಟ್ಟದಲ್ಲಿ ಹಾನಿಗೊಳಗಾಗಿದೆ ಎಂಬುದರ ಬಗ್ಗೆ ಅಥವಾ ಸಾವು-ನೋವುಗಳ ಬಗ್ಗೆ ರಕ್ಷಣಾ ಸಚಿವಾಲಯ ಯಾವುದೇ ಮಾಹಿತಿಯನ್ನೂ ನೀಡಿಲ್ಲ. ಆದರೆ, ಉಕ್ರೇನ್‌ನ ಮಾಧ್ಯಮಗಳು ಬೆಂಕಿಯಲ್ಲಿ ಹೊತ್ತು ಉರಿಯುತ್ತಿರುವ ಬೃಹತ್‌ ಯುದ್ಧನೌಕೆಯ ವಿಡಿಯೋ ಮತ್ತು ಚಿತ್ರಗಳು ವೈರಲ್‌ ಆಗಿವೆ. ಈ ನಡುವೆ ಕ್ಷಿಪಣಿ ದಾಳಿ ಸಂದರ್ಭದಲ್ಲಿ ತಮ್ಮ ಯುದ್ಧ ವಿಮಾನಗಳನ್ನು ಹೊಡೆದುರುಳಿಸಲಾಗಿದೆ ಎಂಬ ವಿಚಾರವನ್ನು ಉಕ್ರೇನ್‌ ನಿರಾಕರಿಸಿದೆ.