Udupi Nejaru Case ತ್ವರಿತ ನ್ಯಾಯಾಲಯಕ್ಕೆ ಶಿಫಾರಸು: ಅಬ್ದುಲ್‌ ಆಜೀಮ್‌

ಮಲ್ಪೆ: ನೇಜಾರು ನಡೆದ ನಾಲ್ವರ ಕೊಲೆ ಪ್ರಕರಣವನ್ನು ಅಪರೂಪದಲ್ಲಿ ಅಪರೂಪದ ಪ್ರಕರಣ ಎಂದು ನ್ಯಾಯಲಯದ ಎದುರು ಸಾಬೀತು ಪಡಿಸಬೇಕು, ವರ್ಷದೊಳಗೆ ಎಲ್ಲ ತನಿಖೆ ಮುಗಿಸಿ ತ್ವರಿತ ನ್ಯಾಯಾಲಯದ ಮುಂದೆ ದೋಷಾರೋಪಣ ಪಟ್ಟಿ ಸಲ್ಲಿಸಿ ಆರೋಪಿಗೆ ಮರಣ ದಂಡನೆಯನ್ನು ಕೊಡಿಸಬೇಕು ಎಂದು ನಿವೃತ್ತ ಪೊಲೀಸ್‌ ಅಧಿಕಾರಿ, ಕರ್ನಾಟಕ ರಾಜ್ಯ ಅಲ್ಪಸಂಖ್ಯಾಕರ ಆಯೋಗದ ಅಧ್ಯಕ್ಷ ಅಬ್ದುಲ್‌ ಅಜೀಮ್‌ ಅವರು ಸರಕಾರವನ್ನು ಒತ್ತಾಯಿಸಿದರು.

ಅವರು ಉಡುಪಿ ಜಿಲ್ಲೆಯನ್ನೇ ಬೆಚ್ಚಿ ಬೀಳಿಸಿದ ಕೊಲೆ ಪ್ರಕರಣ ನಡೆದ ನೇಜಾರಿನ ನೂರ್‌ ಮಹಮ್ಮದ್‌ ಅವರ ಮನೆಗೆ ಮಂಗಳವಾರ ಭೇಟಿ ನೀಡಿ ಸಾಂತ್ವನ ನೀಡಿದರು.

ಅಲ್ಪಸಂಖ್ಯಾಕ ಸಮುದಾಯದ ಹಿನ್ನೆಲೆಯಲ್ಲಿ ನಾನು ಘಟನೆ ನಡೆದ ದಿನದಿಂದ ಪೊಲೀಸ್‌ ಇಲಾಖೆಯೊಂದಿಗೆ ನಿರಂತರವಾಗಿ ಸಂಪರ್ಕದಲ್ಲಿದ್ದು ಸಮಾಲೋಚನೆ ನಡೆಸುತ್ತಿದ್ದೇನೆ. ನಾಲ್ವರನ್ನು ಹತ್ಯೆಗೈದಿರುವ ಸ್ಥಳವನ್ನು ಪರಿಶೀಸಿದಾಗ ಹಂತಕ ಎಲ್ಲ ತಯಾರಿ ಯನ್ನು ಮಾಡಿಕೊಂಡೇ ಬಂದಿದ್ದ ಎಂದು ದೃಢವಾಗಿದೆ ಎಂದರು. ಈ ಕೇಸಿನ ಮೇಲ್ವಿಚಾರಣೆಯನ್ನು ಮಂಗಳೂರು ಪಶ್ಚಿಮ ವಲಯದ ಐಜಿಪಿ ವಹಿಸಿಕೊಳ್ಳಬೇಕು, ಪ್ರಕರಣದ ತನಿಖೆಯನ್ನು ಜಿಲ್ಲೆಯ ಪೊಲೀಸರೇ ಮಾಡಲಿ, ಸಿಐಡಿ ತನಿಖೆ ಆಗತ್ಯವಿಲ್ಲ. ಯಾವುದೇ ಕಾರಣದಿಂದ ತನಿಖೆ ವಿಳಂಬವಾಗಬಾರದು. ಆಯೋಗದ ವತಿಯಿಂದ ಮುಖ್ಯಮಂತ್ರಿ, ಗೃಹಮಂತ್ರಿಗಳಿಗೆ ಈ ಬಗ್ಗೆ ಶಿಫಾರಸು ಮಾಡುವುದಾಗಿ ತಿಳಿಸಿದರು.

ಮಗನಿಗೆ ಕೆಲಸ; ಸರಕಾರಕ್ಕೆ ಪತ್ರ
ನೂರ್‌ ಮೊಹಮ್ಮದರ ಪುತ್ರ ಆಸಾದ್‌ ಮೊಹಮ್ಮದ್‌ ಈಗಾಗಲೇ ಇಂಡಿಗೋ ಏರ್‌ಪೋರ್ಟ್‌ನ ಉದ್ಯೋಗಿ
ಯಾಗಿದ್ದಾರೆ. ಬಿಬಿಎಂ ಪದವೀಧರನಾಗಿ ರುವ ಆತನನ್ನು ಪೊಲೀಸ್‌ ಇಲಾಖೆಯಲ್ಲಿ ಉನ್ನತ ಹುದ್ದೆಗೆ ನೇರ ನೇಮಕಾತಿ ಮಾಡಬೇಕು. ಆತನಿಗೆ ಬೇಕಾದ ತರಬೇತಿಯನ್ನು ನಾನೇ ಕೊಡುತ್ತೇನೆ ಎಂದ ಅವರು ರಾಜ್ಯದ ಮುಖ್ಯಮಂತ್ರಿ, ಗೃಹ ಮಂತ್ರಿಗಳಿಗೆ ಪತ್ರ ಬರೆದು ಮನವಿ ಮಾಡುವುದಾಗಿ ತಿಳಿಸಿದರು.

ಕುಸಿದ ನೂರ್‌ ಮೊಹಮ್ಮದ್‌
ಆರಂಭದಲ್ಲಿ ಅಬ್ದುಲ್‌ ಅಜೀಮ್‌ ಅವರು ನೂರ್‌ ಮೊಹಮದ್‌ ಅವರ ಮನೆಯಲ್ಲಿ ನಾಲ್ವರ ಕೊಲೆ ನಡೆದಿರುವ ಸ್ಥಳಗಳನ್ನು ಪರಿಶೀಲನೆ ನಡೆಸಿ ಮೊಬೈಲ್‌ನಲ್ಲಿ ಮೃತದೇಹಗಳ ಫೋಟೋ ವೀಕ್ಷಿಸುತ್ತಿದ್ದರು, ಈ ವೇಳೆ ಕೊನೆ ಮಗ ಅಸಿಮ್‌ ಪೋಟೋವನ್ನು ಕಂಡ ಕೂಡಲೇ ನೂರ್‌ ಮೊಹಮದ್‌ ಕುಸಿದು ಬಿದ್ದರು. ಸ್ಥಳದಲ್ಲಿದ್ದವರು ಅವರನ್ನು ಮೇಲೆತ್ತಿ ಉಪಚರಿಸಿದರು.

ನಮ್ಮ ನಾಡ ಒಕ್ಕೂಟದ ಜಿಲ್ಲಾ ಅಧ್ಯಕ್ಷ ಮುಸ್ತಾಕ್‌ ಅಹ್ಮದ್‌, ಕೇಂದ್ರ ಸಮಿತಿ ಸಂಘಟನ ಕಾರ್ಯದರ್ಶಿ ಹುಸೇನ್‌ ಹೈಕಾಡಿ, ಜಿಲ್ಲಾ ಪ್ರಧಾನ ಕಾರ್ಯದರ್ಶಿ ಝಹೀರ್‌ ಆಹ್ಮದ್‌, ಕೋಶಾಧಿಕಾರಿ ನಕ್ವ ಯಾಯ್ಯ, ವಕ್ಫ್ ಚೇರ್‌ಮನ್‌ ಮುತಾಲಿಫ್‌, ಕಾಂಗ್ರೆಸ್‌ ಮುಖಂಡ ಎಂ.ಎ. ಗಫೂರ್‌, ನೂರ್‌ ಮಹಮ್ಮದ್‌, ಸಹೋದರ ಇಕ್ಬಾಲ್‌ ಹೈಕಾಡಿ, ಆಶ್ರಫ್‌ ನೇಜಾರು ಉಪಸ್ಥಿತರಿದ್ದರು.